Landssamband íslenskra Kvennakóra

Vox feminae hefur mörg undanfarin ár tekið þátt í árlegum styrktartónleikum Caritas. Að þessu sinni syngur kórinn meðal annars með þeim Kristjáni Jóhannssyni stórtenór og Sigrúnu Hjálmtýsdóttur sópran sunnudaginn 15. nóvember kl 16.00.

Þetta verða 16. styrktartónleikar Caritas sem hljómað hafa reglulega í Kristskirkju við Landakot frá árinu 1994.

Í ár mun allur ágóði tónleikanna renna til Mæðrastyrksnefndar. Margir af helstu listamönnum þjóðarinnar leggja þessu þarfa málefni lið.

Efnisskrá tónleikanna er glæsileg og fluttar verða skærustu perlur tónbókmenntanna ásamt einsöngvurum, strengjasveit og kórum.

Caritas tónleikarnir marka upphaf aðventunnar fyrir marga og fjölmargir gestir koma ár eftir ár á þessa eftirsóttu tónleika, njóta fagurra lista og leggja góðu málefni lið. Í ár verður hvergi slegið af kröfum og má líklega lofa bestu tónleikum til þessa enda hefur flytjendahópurinn aldrei verið glæsilegri. Þetta eru án efa einir af bestu tónleikum ársins.

Kristján Jóhannsson og Diddú færa þér aðventuna ásamt Rúnari Guðmundssyni, Guðnýju Guðmundsdóttur, Ara Þór Vilhjálmssyni, Helgu Þórarinsdóttur, Gunnari Kvaran, Hávarði Tryggvasyni, Einari Jóhannessyni, Eiríki Erni Pálssyni, Hilmari Erni Agnarssyni, Vox feminae og Stúlknakór Reykjavíkur undir stjórn Margrétar J. Pálmadóttur.

Miðaverð er kr. 3000.- og upplýsingar um miðasölu er að finna hér

Kvennakór Háskóla Íslands undir stjórn Margrétar Bóasdóttur syngur tónleika í Hjallakirkju sunnudaginn 8. nóvember kl. 16.

Gestakór á tónleikunum er Uppsveitarsystur úr Árnessýslu undir stjórn Magneu Gunnarsdóttur. Orgelleikari er Björn Steinar Sólbergsson og pianóleik annast  Gróa Hreinsdóttir.

Á efnisskrá kóranna eru gullfalleg kirkjuleg verk, t.d. Drottinn er minn hirðir eftir Franz Schubert, Ave Maria eftir Bach-Gounod og Eitt er orð Guðs eftir Gabriel Fauré. Einnig verða sungin íslensk, bandarísk og suður-amerísk lög.  Björn Steinar Sólbergsson leikur orgelverk eftir Felix Mendelssohn og kvennakór Háskólans flytur Denn er hat seinen Engeln úr óratoríunni Elía eftir Mendelssohn í nýrri útsetningu Martin Goettsche fyrir tvo kvennakóra. Þetta er í fyrsta sinn sem þessi útsetning er flutt hér á landi.

Kvennakórinn við Háskólann hefur starfað í 4 ár og var stofnaður með kjarna kórstúlkna sem hafa margra ára söngreynslu. Kórinn skipa nú 32 stúlkur sem eru flestar nemendur eða starfsfólk háskólans. Kórinn hefur verið vinsæll hjá söngelskum, erlendum skiptinemum og nú syngja sjö stúlkur frá fimm mismunandi löndum með í kórnum.

Uppsveitasystur hófu söngstarf sitt 2006. Þær hafa haldið fjölda tónleika og tóku þátt í Kórastefnu við Mývatn 2007. Kórinn skipa 28 konur víðs vegar að úr Árnessýslu og hefur Magnea Gunnarsdóttir stjórnað þeim frá upphafi.

Aðgangseyrir er kr. 2000.- fyrir fullorðna en ókeypis fyrir börn og alla nemendur.

Uppsveitarsystur úr Árnessýslu

Kvennakórinn Ljósbrá í Rangárvallasýslu varð 20 ára í febrúar síðastliðnum.

Kórinn var stofnaður af nokkrum söngelskum konum úr Rangárþingi í febrúar 1989. Fyrstu árin voru kórmeðlimir 10 til15, en nú eru í kórnum um 40 konur úr Rangárvalla- og Árnessýslu. Stjórnandi kórsins síðan 2003 er Eyrún Jónasdóttir. Kvennakórinn Ljósbrá fékk Menningarverðlaun Töðugjalda og Sunnlenska fréttablaðsins árið 2006.

Í tilefni afmælisársins gefur kórinn út geisladisk sem ber nafnið Fljóðaljóð. Lögin á honum eiga öll eitthvað kvenlegt sameiginlegt, sum eru um konur, önnur samin af konum og öll eru þau að sjálfsögðu flutt af konum í Kvennakórnum Ljósbrá.

Haldnir verða afmælis- og útgáfutónleikar laugardagskvöldið 7. nóvember næstkomandi í Hvolnum á Hvolsvelli kl. 20. Þar verður stiklað á stóru í sögu kórsins með söng, gríni og gamanleikjum. Á tónleikunum leikur undir það góða tónlistarfólk sem annaðist undirleik við gerð disksins, en það eru; Djassband Suðurlands, Grétar Geirsson harmonikkuleikari, Uelle Hahndorf sellóleikari og Arnhildur Valgarðsdóttir píanóleikari.

Þeir sem hafa áhuga á að eignast geisladiskinn Fljóðaljóð með Kvennakórnum Ljósbrá geta sent póst á omargret(hjá)simnet.is eða hringt í Margréti Hörpu í síma 868 2543. Geisladiskurinn kostar kr. 1800. Þess má geta að kórkonur hafa bróderað í hvert umslag og fylgir nál með diskinum.

Hönd í hönd – skemmtun til styrktar Mæðrastyrksnefnd Kópavogs

Á vordögum kom upp sú hugmynd hjá kórkonum í Kvennakór Kópavogs hvort ekki væri hægt að gera eitthvað gagn í þessu efnahagslega fárviðri sem gengur yfir landann.  Söngurinn gefur okkur í Kvennakór Kópavogs aukna orku, hressir, bætir og kætir andlega og líkamlegan líðan og þá orku vildum við nýta til að láta gott af okkur leiða.  Ákveðið var að blása til skemmtunar með þátttöku ýmissa flytjenda úr Kópavogi og afhenda síðan Mæðrastyrksnefnd Kópavogs ágóðann af skemmtuninni, en þar er þörfin mikil þessa dagana.

Hönd í hönd er nafnið sem valið var á skemmtunina og er hún nefnd eftir verkefni sem varð til þegar Kópavogsbær, prestar í Kópavogi, Menntaskólinn í Kópavogi, heilsugæslan, Kópavogsdeild Rauða krossins og Mæðrastyrksnefnd Kópavogs tóku höndum saman til að styðja við Kópavogsbúa í því erfiða ástandi sem skapast hefur við hrun fjármálamarkaðarins.

Skemmtunin verður haldin sunnudaginn 8. nóvember kl. 20.00 í Hjallakirku en þangað höfum við stefnt hátt í 100 manns sem ætla að leggja hönd á plóginn við að skapa skemmtilega stemmingu með okkur.  Það er frábært hvað vel var tekið í erindi okkar þegar leitað var til aðila með þátttöku og ljóst er að mikill samhugur er hér í bæjarfélaginu.  Allir sem koma að þessari skemmtun gefa vinnu sína og kunnum við þeim bestu þakkir fyrir.

Þeir sem koma fram á skemmtuninni eru:
Sr. Íris Kristjánsdóttir sóknarprestur í Hjallakirkju
South River Band; Ólafur Þórðarsson og félagar
Kvennakór Kópavogs
Karlakór Kópavogs
Leikfélag Kópavogs
Rannveig Guðmundsdóttir fyrrverandi alþingismaður
Hljóðfæraleikarar úr Skólahljómsveit Kópavogs
BERG söngsystur

Aðeins verður um þessa einu skemmtun að ræða og því betra fyrir þá sem vilja tryggja sér miða að ná sér í þá í forsölu.  Miða má panta og kaupa hjá Kvennakór Kópavogs í síma 821 6624 (Jófríður) og 862 2022 (Dröfn) eða á netfangið kvennakorkopavogs(hja)gmail.com.  Miðaverð er kr. 3000.- og forsala á miðum verður til 5. nóvember.

Í Kópavogi er starfrækt Mæðrastyrksnefnd sem var stofnuð af Kvenfélagasambandi Kópavogs 1968 og starfar innan vébanda þess.  Að sambandinu standa kvenfélögin Dimma, Freyja og Kvenfélag Kópavogs og það eru samtals 12 konur frá þeim félögum sem leggja fram alla sjálboðavinnu í sambandi við starfsemi nefndarinnar.  Tilgangur nefndarinnar er líknarstarfsemi, að styrkja bágstaddar mæður og aðra sem á hjálp þurfa að halda eftir því sem aðstæður leyfa.  Mæðrastyrksnefndin er til húsa í Fannborg 5 og er með fataúthlutun einu sinni í viku á þriðjudögum frá kl. 16 til 18.  Á sama stað og tíma er einnig tekið á móti fatnaði og hvetjum við bæjarbúa til að kíkja í skúffur og skápa og finna til og afhenda þar, þvegið og flokkað. Margt smátt gerir eitt stórt.

Við hvetjum alla til að sýna samstöðu mæta og eiga skemmtilega kvöldstund með okkur öllum og styrkja gott málefni í leiðinni.

Samstöðukveðjur frá Kvennakór Kópavogs