Landssamband íslenskra Kvennakóra

Tónleikar Vox Feminae sem halda átti í Reykholtskirkju í Borgarfirði á laugardag falla niður af óviðráðanlegum ástæðum.

Þess í stað mun kórinn syngja við messu á allraheilagramessu, sunnudaginn 1. nóvember kl 14. Að henni lokinni mun kórinn syngja nokkur verk af efnisskrá tónleikanna. Listrænn stjórnandi er Margrét J. Pálmadóttir.

Hin árlega Haustvaka Kvennakórs Garðabæjar var haldin fimmtudagskvöldið 15. október sl. í safnaðarheimilinu Kirkjuhvoli. Haustvakan markar upphafið að veglegu 10 ára afmælisári Kvennakórsins sem stendur til septembermánaðar á næsta ári.
Haustvakan er sannkölluð menningarveisla sem hefur fest sig í sessi í listalífi Garðabæjar og skapað vettvang fyrir listafólk úr bænum til að kynna sig. Bæjarbúar og aðrir velunnarar kórsins brugðust ekki sl. fimmtudagskvöld frekar en fyrri ár því fjölmennt var og stemmning afar góð. Þakklátir gestir gæddu sér á heimalöguðu góðgæti kórkvenna í hlýlega skreyttum sal Kirkjuhvols á meðan þeir nutu þess sem fram var borið, í tali og tónum.
Fyrst ber að nefna kynninn; rithöfundinn og gleðigjafann Kristínu Helgu Gunnarsdóttur, sem stjórnaði Haustvökunni af leiftrandi snilld eins og henni einni er lagið.
Sólveig Birna Júlíusdóttir, nemandi í sellóleik við Tónlistarskóla Garðabæjar, spilaði verk eftir Ravel og Schumann við píanóleik Guðrúnar Dalíu Salómonsdóttur og heilluðu þær gesti með fallegum og öruggum flutningi.
Sú hefð hefur skapast að bæjarlistarmaður Garðabæjar mætir á Haustvökuna og kynnir sig og verk sín. Laufey Jensdóttir myndlistarmaður og listamaður Garðabæjar 2009, hélt gestum hugföngnum með erindi sínu um fjársjóð þann sem fólginn er æsku landsins. Tengdi hún það umræðuefni m.a. við vannýtta starfskrafta og reynslu eldri borgara á einkar áhugaverðan hátt.
Ármann Helgason klarinettuleikari og Sólveig Anna Jónsdóttir píanóleikari stigu næst á stokk og fóru á kostum í túlkun sinni á frönskum tónverkum eftir Pierné og Messager og hlutu ákaft lófaklapp og bravóhróp fyrir.
Í fyrri hluta samkomunnar flutti kórinn nokkur af Jónasarlögum Atla Heimis Sveinssonar, við ljóð ættjarðarskáldsins Jónasar Hallgrímssonar. Lögin eru einstaklega fallegar tónsmíðar en auk píanóleikara kórsins, Sólveigar Önnu Jónsdóttur, spilaði Ármann Helgason með kórnum. Í lok vökunnar hljómaði austur-evrópsk sveitastemmning í Moravískum dúettum eftir tékkneska tónskáldið Anton Dvorak við íslenska texta Böðvars Guðmundssonar.
Haustvakan er einn liður í samstarfssamningi kórsins við Garðabæ. Kórkonum og stjórnandanaum, Ingibjörgu Guðjónsdóttur, er það sérstakt ánægjuefni að geta lagt sitt af mörkum til að auka á fjölbreytni í menningarlífi bæjarbúa með þessum hætti.
Í upphafi aðventunnar sameina svo Kvennakór Garðabæjar og Kvennakór Hafnafjarðar söngkrafta sína og halda tvenna jólatónleika þar sem m.a. verður flutt tónverk spænskra og suður-amerískra jólalaga fyrir kvennakór, hörpu, gítar og marimbu. Auk sameiginlegra laga syngja kórarnir sín eigin aðventulög. Tónleikarnir verða 30. nóvember kl. 20 í Digraneskirkju og 2. desember kl. 20 í Víðistaðakirkju. Fylgist með á heimasíðu kórsins www.kvennakor.is

Vox feminae syngur í Kristskirkju, Landakoti og Reykholtskirkju í Borgarfirði, undir stjórn Margrétar J. Pálmadóttur.

Vox feminae hefur mörg undanfarin ár haldið trúarlega tónleika í kringum allra heilagra messu og að þessu sinni heldur kórinn tónleika í Kristskirkju, Landakoti fimmtudaginn 29. október kl. 20 og í Reykholtskirkju í Borgarfirði laugardaginn 31. október kl. 16. Listrænn stjórnandi tónleikanna er Margrét J. Pálmadóttir. 

Á tónleikunum flytur Vox feminae trúarlega tónlist eftir íslensk tónskáld.  Yfirskrift tónleikanna er Kyrie og uppbygging þeirra skírskotun í hið hefðbundna messuform. Mörg þeirra verka sem flutt verða hafa fylgt kórnum lengi og má þar nefna verk Þorkels Sigurbjörnssonar og Atla Heimis Sveinssonar. Þá er kórnum sérstök ánægja að flytja Salve Regina eftir Hjálmar H. Ragnarsson og Beatus Vir eftir John A. Speight, en hið síðarnefnda frumflutti kórinn í alþjóðlegri kórakeppni á vegum Vatikansins í Róm árið 2000, þar sem kórinn vann til silfurverðlauna. 

Vox feminae hefur lagt metnað sinn í að takast á við flutning nýrra verka eftir íslenska höfunda og það er ávallt mikið ánægjuefni þegar kórnum berast ný verk, raddsetningar eða umritanir sem lagaðar hafa verið að kvenröddum. 

Margrét J. Pálmadóttir, stjórnandi kórsins, nýtur listamannalauna um þessar mundir og ákvað  að verja hluta þeirra til kaupa á nýju tónverki eftir Báru Grímsdóttur. Vox feminae er það mikill heiður að fá á þessum tónleikum að flytja fyrstur kóra tvo kafla úr verkinu, Kyrie og Agnus Dei.

Miðaverð er kr. 2.500.- 
Forsala aðgöngumiða er hjá kórfélögum og í síma 863 4404.
Í Reykholtskirkju verður einnig miðasala við innganginn.

Laugardaginn 17. október kl. 16-18 verður aðalfundur Gígjunnar haldinn í Söngskólanum Domus Vox, Laugavegi 116, 105 Reykjavík.

Dagskrá aðalfundar:

1. Skýrsla stjórnar.

2. Reikningar.

3. Umræða um skýrslu og reikninga.

4. Tillögur og lagabreytingar.

5. Ákvörðun árgjalds.

6. Kosning formanns.

7. Kosning stjórnar- og varamanna.

8. Kosning tveggja skoðunarmanna reikninga.

9. Önnur mál.

Lagabreytingar og aðrar tillögur frá aðildarkórum skulu berast stjórn eigi síðar en tveimur vikum fyrir aðalfund.

Í lok fundar verður til umfjöllunar Gildi nefnda og öflugs félagsstarfs í kvennakórum.

Framsögu hafa fulltrúar úr kvennakórum sem hafa mikla reynslu af þátttöku í félagsstarfi á vegum sinna kóra.

Aðildarkórar Gígjunnar eru hvattir til þess að senda formann og stjórnir sínar á fundinn. Hver kór fer með tvö atkvæði á fundinum.

Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína.

Aðildarkórar eru einnig hvattir til að koma með tillögur að lagabreytingum. Breytingartillögur þurfa að berast fyrir fundinn þannig að hægt sé að kynna þær fyrir öðrum kórum með tölvupósti. Vinsamlegast sendið allar tillögur eða hugmyndir að lagabreytingum á netfangið: gigjan2003(hjá)gmail.com fyrir laugardaginn 3. október.

Við hlökkum til þess að sjá ykkur sem flestar á fundinum.
Með bestu kveðjum frá stjórn Gígjunnar;

Dagbjört, Kyrjurnar
Jófríður, Kvennakór Kópavogs
Þorgerður, Vox feminae
Þuríður, Kvennakór Reykjavíkur
Heiða, Kvennakór Suðurnesja