Landssamband íslenskra Kvennakóra

Kvennakór Reykjavíkur mun syngja vortónleika sína í Ými fimmtudaginn 11. maí og föstudaginn 12. maí kl. 20.00 bæði kvöldin. Stjórnandi kórsins er Sigrún Þorgeirsdóttir. Friðrik Ómar mun syngja með kórnum og verða tónleikarnir ekki með hefðbundnu sniði.Fréttatilkynning frá Kvennakór Reykjavíkur
Þá er komið að vortónleikum Kvennakórs Reykjavíkur. Þeir verða í fjörugri kantinum hjá okkur í ár. Við fáum til liðs við okkur ungan og upprennandi söngvara, Friðrik Ómar, sem m.a. söng í haust inn á bráðskemmtilegan geisladisk með Guðrúnu Gunnarsdóttur og söng eitt lagið í forkeppni Íslands í Eurovision. Að auki verður hljómsveit með okkur; Vignir Þór Stefánsson leikur á píanó, Hjörleifur Valsson á fiðlu, Birgir Bragason spilar á bassa og Erik Qvick á trommur. Verkefnið er sótt í söngleiki og nefnast tónleikarnir „Lífið er söngleikur“. Stjórnandi okkar er sem fyrr Sigrún Þorgeirsdóttir. Tónleikarnir verða ekki með hefðbundnu sniði, heldur bregður kórinn á leik með leikmunum, leik og dansi sem hæfir hverjum söngleik. Tónleikarnir verða tvennir, fimmtudaginn 11. maí og föstudaginn 12. maí kl. 20.00 bæði kvöldin og verða þeir haldnir í tónlistarhúsinu Ými. Vonumst til að sjá ykkur sem flest og góða skemmtun, Kvennakór Reykjavíkur

Kvennakór Garðabæjar heldur vortónleika mánudaginn 15. maí kl. 20.00 í Digraneskirkju. Stjórnandi kórsins er Ingibjörg Guðjónsdóttir. Kristinn Örn Kristinsson píanóleikari kórsins sér um undirleik, en auk hans koma fram fiðluleikararnir Júlíana Kjartansdóttir og Sigurlaug Eðvaldsdóttir, ásamt Helgu Björgu Ágústsdóttur sellóleikara.

Fréttatilkynning frá Kvennakór Garðabæjar
Kvennakór Garðabæjar hefur fest sig í sessi í menningarlífi Garðabæjar og heldur nú vortónleika 6. árið í röð, að vanda undir stjórn Ingibjargar Guðjónsdóttur, sópransöngkonu. Söngskráin er sem fyrr metnaðarfull með hátíðlegum blæ enda mörg verkanna af andlegum toga og til þess fallin að færa áheyrendum gleði og upplyftingu. Tónleikarnir í ár verða haldnir mánudaginn 15. maí kl. 20.00 í Digraneskirkju. Kristinn Örn Kristinsson píanóleikari kórsins sér um undirleik, en auk hans koma fram fiðluleikararnir Júlíana Kjartansdóttir og Sigurlaug Eðvaldsdóttir, ásamt Helgu Björgu Ágústsdóttur sellóleikara. Miðaverð er 1.800 kr. við innganginn en 1.500 kr. í forsölu og fyrir lífeyrisþega. Forsala tónleikamiða er í Bókabúðinni Grímu, Garðatorgi, hjá kórkonum og á netfanginu kvennakor@kvennakor.is. Frítt er fyrir 15 ára og yngri.

Sönghúsið Domus Vox heldur tvenna tónleika sunnudaginn 30. apríl í Langholtskirkju kl. 16:00 og 18:00 undir stjórn Margrétar J. Pálmadóttur. Dagskráin er mjög fjölbreytt og verða m.a. flutt verk eftir Ríkharð Örn Pálsson, Stefán S. Stefánsson, Selge Mence, Jaakko Mäntyjärvi, Rossini, Siecynski og Prince. Miðasala er í sönghúsinu Domus Vox, Skúlagötu 30 alla virka daga milli kl. 16:00 og 18:00 í síma 511 3737 og 863 4404.

Vorsveifla. Sunnudagur til sigurs
Sönghúsið Domus Vox heldur tvenna tónleika sunnudaginn 30. apríl í Langholtskirkju kl. 16:00 og 18:00 undir stjórn Margrétar J. Pálmadóttur. Þetta eru styrktartónleikar og eru haldnir vegna flutnings sönghúss okkar að Laugavegi 116. Á tónleikunum koma fram Gospelsystur Reykjavíkur, Stúlknakór Reykjavíkur, Vox Junior og Vox feminae. Auk þeirra koma fram einsöngvararnir Maríus Sverrisson, Inga Backman, Xu Wen, Hanna Björk Guðjónsdóttir, Ingunn Ragnarsdóttir, Margrét J. Pálmadóttir og Seth Sharp. Hljómsveit hússins skipa Agnar Már Magnússon, Gunnar Hrafnsson, Stefán S. Stefánsson, Gunnar Þórðarson, Kjartan Guðnason, Stefanía Ólafsdóttir, Hjörleifur Valsson, Arnhildur Valgarðsdóttir og Ástríður Haraldsdóttir. Dagskráin er mjög fjölbreytt og verða m.a. flutt verk eftir Ríkharð Örn Pálsson, Stefán S. Stefánsson, Selge Mence, Jaakko Mäntyjärvi, Rossini, Siecynski og Prince. Miðaverð er kr. 2000,- Miðasala er í sönghúsinu Domus Vox, Skúlagötu 30 alla virka daga milli kl. 16:00 og 18:00 í síma 511 3737 og 863 4404.

Á þessu ári eru 10 ár liðin frá stofnun Jórukórsins á Selfossi. Vortónleikar kórsins verða að þessu sinni fimmtudaginn 4. maí kl. 20:30 í Hólmaröst á Stokkseyri þar sem kaffihúsastemning verður ráðandi og í Selfosskirkju sunnudaginn 7. maí kl. 17:00. Gestasöngvari með Jórukórnum er söngstjarnan Regína Ósk Óskarsdóttir. Gígjan óskar Jórukórnum hjartanlega til hamingju með 10 ára afmælið.

Fréttatilkynning frá Jórukórnum á Selfossi
Jórukórinn og Regína Ósk
Á þessu ári eru 10 ár liðin frá stofnun Jórukórsins á Selfossi. Vortónleikar kórsins verða að þessu sinni fimmtudaginn 4. maí kl. 20:30 í Hólmaröst á Stokkseyri þar sem kaffihúsastemning verður ráðandi og í Selfosskirkju sunnudaginn 7. maí kl. 17:00. Gestasöngvari er söngstjarnan Regína Ósk Óskarsdóttir, sem vakti mikla athygli í undankeppni Eurovision keppninnar, hún tekur lagið með kórnum og flytur einnig eigin lög. Efnisskráin er mjög fjölbreytt með léttu yfirbragði. Þar er að finna íslenskar söngperlur í bland við vinsæl dægurlög. Í tilefni að afmælisárinu eru líka rifjuð upp nokkur uppáhaldslög frá fyrri árum. Stjórnandi kórsins er sópransöngkonan Hlín Pétursdóttir og undirleik á píanó annast Þórlaug Bjarnadóttir. Einnig leggja góðir hljóðfæraleikarar kórnum lið þeir Jóhann Stefánsson, Smári Kristjánsson og Gunnar Jónsson. Það verður hátíðarstemning í bland við létta sveiflu á tónleikum Jórukórsins í ár.

Hlökkum til að sjá ykkur í Hólmaröstinni og Selfosskirkju.