Landssamband íslenskra Kvennakóra

Kvennakór Suðurnesja heldur vortónleika í hinum nýja sal, Bergi, í Hljómahöllinni í Reykjanesbæ mánudaginn 5. maí og miðvikudaginn 7. maí og hefjast báðir tónleikarnir kl. 20:00.

Dagskrá tónleikanna litast af því að kórinn mun í haust taka þátt í hátíð Leifs Eiríkssonar sem haldin er árlega í Minneapolis í Bandaríkjunum og verður Kvennakór Suðurnesja fyrsti íslenski kórinn til að koma fram á þessari hátíð. Kórinn verður því á þjóðlegu nótunum og syngur eingöngu íslensk lög á tónleikunum; þjóðlög, ættjarðarlög, dægurlög og lög eftir íslensk samtímaskáld.

Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir.

Kórkonur taka sér ýmislegt fyrir hendur í fjáröflunarskyni til að fjármagna starfsemi kórsins og ferðina sem framundan er. Þær hafa m.a. tekið að sér hlutverk í leikverkinu Djöfulgangi eftir framandverkaflokkinn Kviss Búmm Bang og aukahlutverk í kvikmyndinni Afinn sem frumsýnd verður í haust. Síðastliðið sumar tóku kórkonur að sér undirbúning og skipulagningu bæjarhátíðarinnar Sandgerðisdaga sem haldin er í lok ágúst ár hvert í Sandgerði og hefur kórinn gert samkomulag við Sandgerðisbæ um að endurtaka leikinn í ár. Mörg undanfarin ár hefur Reykjanesbær gert þjónustusamning við kórinn og stutt myndarlega við starfsemi hans. Auk þess hefur verið leitað til fyrirtækja eftir styrkjum og kunna kórkonur þeim sem styrkt hafa starfsemi kórsins miklar þakkir fyrir stuðninginn.

Tónleikarnir verða sem áður segir í Bergi í Hljómahöllinni mánudaginn 5. maí og miðvikudaginn 7. maí og hefjast kl. 20:00 bæði kvöldin. Forsala aðgöngumiða er hjá kórkonum og á netfanginu kvennakorsudurnesja@gmail.com. Miðaverð í forsölu er 1500 kr. en 2000 kr. við innganginn.

Vortónleikar Kvennakórs Hafnarfjarðar verða haldnir þann 1. maí n.k. og bera yfirskriftina Vorið kallar. Tónleikarnir verða í Hásölum við Strandgötu og hefjast kl. 20:00.

Dagskráin er fjölbreytt en þó ber hæst tónlist frá frændum okkar á hinum Norðurlöndunum og mega tónleikagestir eiga von á léttri og leikandi stemmningu. Auk sönglaga eftir Sibelius og fleiri norræn tónskáld mun kórinn flytja nokkur þekkt dægurlög sem eiga uppruna sinn vestanhafs um og eftir miðja síðustu öld og hafa notið vinsælda æ síðan.

Hin fjölhæfa handverkskona, Arndís Sigurbjörnsdóttir, mun sjá um að skreyta Hásali í anda vorkomunnar en jólaskreytingar hennar vöktu mikla athygli á tónleikum kórsins í Víðistaðakirkju í desember s.l.

Stjórnandi Kvennakórs Hafnarfjarðar er Erna Guðmundsdóttir, Antonía Hevesi leikur á píanó og flautuleikari er Kristrún Helga Björnsdóttir. Um 50 konur starfa nú með Kvennakór Hafnarfjarðar en viku eftir tónleikana heldur kórinn til Akureyrar þar sem u.þ.b. 700 konur munu taka þátt í Landsmóti íslenskra kvennakóra.

Miðaverð á tónleikana er 2500 krónur og fer miðasala fram hjá kórkonum og við innganginn. Gestum verður boðið að þiggja kaffi og konfekt í tónleikahléi.

Freyjukórinn í Borgarfirði heldur sína árlegu vortónleika í Reykholtskirkju síðasta vetrardag, 23. apríl kl. 20:30. Kórinn hefur fengið meistara Magnús Eiríksson til liðs við sig. Undirleik annast Gunnar Ringsted á gítar, Sigurður Jakobsson á bassa og Renata Ivan á píanó.

Í vetur hefur starf kórsins verið mjög öflugt, með þátttöku á Vökudögum í Borgarnesi, 200 ára ártíðartónleikum helguðum Wagner og Verdi á vegum Tónlistarskóla Borgarfjarðar, tvennum aðventutónleikum með Karlakór Kjalnesinga, í mars stóð kórinn í 3ja sinn fyrir söngbúðum með Kristjönu Stefánsdóttur eina helgi sem kallast Syngjandi konur á Vesturlandi, en söngbúðirnar eru opnar öllum konum á Vesturlandi og hafa um 70 konur tekið þátt ár hvert. Syngjandi konur héldu þrenna tónleika, í Borgarnesi, Grundarfirði og Reykjavík. Auk þessa tók kórinn þátt í minni atburðum af ýmsu tagi. Framundan eru svo landsmót kvennakóra á Akureyri og þátttaka í einum tónleikum í Borgarnesi í maí.

Nú líður að árlegum vortónleikum Jórukórsins. Eins og undanfarin ár verður boðið upp á tvenna tónleika, í Selfosskirkju laugardaginn 5. apríl kl. 16:00 og félagsheimilinu Þingborg sunnudaginn 6. apríl kl. 20:30, þar verður kaffihúsastemning ríkjandi og boðið er upp á kaffi og konfekt. 

Lagavalið er mjög fjölbreytt, létt og skemmtilegt. Vinsæl íslensk og erlend dægurlög sem Stefán Þorleifsson hefur raddsett fyrir kórinn og einnig klassísk lög úr ýmsum áttum. Þjóðlög frá Ítalíu og Chile eru líka á dagskrá en tveir kórfélagar koma frá þessum löndum. Við vonum að tónleikagestir á öllum aldri finni þarna eitthvað við sitt hæfi.

Hljóðfæraleikarar með kórnum verða Róbert Dan Bergmundsson á bassa og Stefán Ingimar Þórhallsson á trommur að ógleymdum stjórnandanum Stefáni Þorleifssyni á píanó/hljómborð en þeir félagar mynda kjarnann í Djassbandi Suðurlands. 

Milli 40 og 50 konur hafa æft saman í vetur undir styrkri stjórn Stefáns, sem nú er að ljúka sínu öðru starfsári með kórnum.  Vetrarstarfið hefur verið afar ánægjulegt og árangurinn kemur í ljós á tónleikunum, sem eru okkar uppskeruhátíð og hápunktur í kórstarfinu.