Landssamband íslenskra Kvennakóra

Senjorítukór Kvennakórs Reykjavíkur hóf æfingar 2. september sl. Tónleikar féllu niður hjá kórnum í vor, en þær ætla að bæta úr því með tónleikum í Grensáskirkju laugardaginn 19. október kl. 14:00. Sungin verða ný og gömul lög eftir innlenda og erlenda höfunda og er söngskráin fjölbreytt að vanda. 

Stjórnandi kórsins er Ágota Joó og undirleikari Vilberg Viggósson. 

Miðaverð er aðeins kr. 1500 fyrir fullorðna og kr. 600 fyrir börn frá 12 ára aldri. Ókeypis er fyrir börn yngri en 12 ára. 

Kórkonur hlakka til að sjá ykkur.

Laugardaginn 26. október kl. 14:00 - 16:00 verður aðalfundur Gígjunnar haldinn í Söngskólanum Domus Vox, Laugavegi 116, 105 Reykjavík.

Dagskrá aðalfundar:

1. Skýrsla stjórnar.
2. Reikningar.
3. Umræða um skýrslu og reikninga.
4. Tillögur og lagabreytingar.
5. Ákvörðun árgjalds.
6. Kosning formanns.
7. Kosning stjórnar og varamanna.
8. Kosning tveggja skoðunarmanna reikninga.
9. Önnur mál. 

Lagabreytingar og aðrar tillögur frá aðildarkórum skulu berast stjórn eigi síðar en tveimur vikum fyrir aðalfund.

Í lok fundar munu fulltrúar frá Kvennakór Akureyrar halda kynningu á landsmóti kvennakóra sem haldið verður á Akureyri vorið 2014.

Aðildarkórar Gígjunnar eru hvattir til þess að senda formann og stjórnir sínar á fundinn. Við viljum vekja athygli á að hver kór getur sent eins marga fulltrúa og hann vill á fundinn.  Tveir fulltrúar hvers aðildarkórs hafa atkvæðisrétt á aðalfundi skv. lögum Gígjunnar.

Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína. Aðildarkórar eru einnig hvattir til að koma með tillögur að lagabreytingum. Breytingartillögur þurfa að berast eigi síðar en tveimur vikum fyrir fundinn þannig að hægt sé að kynna þær fyrir öðrum kórum með tölvupósti. Vinsamlegast sendið allar tillögur eða hugmyndir að lagabreytingum á netfangið gigjan2003@gmail.com fyrir laugardaginn 12. október.

Vetrarstarfið hefst hjá Kvennakór Suðurnesja miðvikudaginn 18. september en þá verður opin æfing í Listasmiðjunni á Ásbrú. Æfingin hefst kl. 20 og eru allar konur sem hafa gaman af söng og góðum félagsskap velkomnar.

Þó að vetrarstarfið sé rétt að hefjast hafa kvennakórskonur síður en svo setið auðum höndum í sumar. Þessar kraftmiklu konur tóku að sér skipulagningu og framkvæmd bæjarhátíðar Sandgerðinga, Sandgerðisdaga, og var mikil ánægja með störf þeirra. Auk þess söng kórinn á hátíðardagskrá Sandgerðisdaga í Safnaðarheimilinu í Sandgerði og síðan í Bíósal Duushúsa á Ljósanótt.

Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir. Æfingaaðstaða kórsins er í Listasmiðjunni, Keilisbraut 773 á Ásbrú. Æfingar eru á mánudögum og miðvikudögum kl. 20:00 - 22:00, en önnur æfingin er raddæfing og skiptast raddirnar þá á að mæta þannig að hver rödd mætir á raddæfingu þriðju hverja viku en hinar vikurnar er ein æfing. Þegar nær dregur tónleikum mæta þó allar konur tvisvar í viku. Kórstarfið snýst auðvitað fyrst og fremst um söng en kórkonur gera sér einnig ýmislegt til skemmtunar og er þetta frábær félagsskapur.

Konur sem hafa áhuga á söng og vilja taka þátt í skemmtilegu starfi með flottum konum eru hvattar til að mæta á miðvikudaginn og kynna sér starf kórsins. Boðið verður upp á veitingar að hætti kórkvenna.

Kvennakór Hafnarfjarðar (stofnaður 1995) hélt í söngferð til Slóveníu dagana 11. - 19. júní 2013 með stjórnandann Ernu Guðmundsdóttur og undirleikarann Antoníu Hevesi í fararbroddi. Í farteskinu voru íslensk þjóðlög, fimmundarsöngvar og kirkjuleg verk. Bændaferðir sáu um allt skipulag ferðarinnar og fararstjóri var Soffía Halldórsdóttir. Flogið var til Munchen og ekið þaðan að Bledvatni þar sem við gistum eina nótt. Siglt var út í eyjuna Blejski otok og sungið „Heyr himnasmiður“ í Maríukirkjunni með frægu óskabjöllunni sem þar er.

Eftir hádegi var síðan haldið af stað til Portoroz þar sem dvalið var næstu sex nætur.

Fimmtudaginn 13. júní kl 20:00 voru svo fyrri tónleikar okkar. Þeir voru haldnir við Hótel Delfin í Isola, litlum bæ við Istríaströndina. Með okkur á þessum tónleikum voru einnig þarlendur karlakór sem ber það skemmtilega nafn Lopar og lítill kvennakór, Laseh. Í lok tónleikanna sungu allir kórarnir saman fallegt slóvenskt þjóðlag „Slovenija od kod lepote tvoje“ (hér má hlusta á lagið)

Er skemmst frá því að segja að vel og höfðinglega var tekið á móti okkur og tókust tónleikarnir ljómandi vel.

Næstu dagar voru notaðir til að skoða okkur um og fórum við meðal annars til Rovinj og Porec, sem eru fallegir litlir bæir í Króatíu.

Sunnudaginn 16. júní var svo komið að tónleikum okkar í St. Georgs kirkjunni í Piran sem er lítill bær stutt frá Portoroz. Þar sungu einnig blandaður kór, kvennakór og veiðimanna karlakór. Hófust þeir tónleikar kl. 21:00

Tókust þeir mjög vel og fannst okkur alveg yndislegt að syngja í þessari gömlu fallegu kirkju. Eftir tónleikana var kórkonum og mökum boðið til móttöku í garði kirkjunnar. Var þá orðið áliðið kvölds og komið myrkur og var garðurinn lýstur með örfáum kertaljósum svo úr varð hálfgerður ævintýraheimur.

Á þjóðhátíðardaginn okkar 17. júní héldum við óformlega tónleika á hóteli stutt frá þar sem við gistum. Gengum við þá fylktu liði með fána og sungum „Öxar við ána“ og vöktum töluverða athygli þeirra sem á vegi okkar urðu. Að sjálfsögðu tókum við svo lagið hér og þar okkur og öðrum til yndis og ánægju.

 Veðrið lék við okkur alla dagana og var það kærkomin tilbreyting frá rigningunni hér heima.

Heimasíða Kvennakórs Hafnarfjarðar er: http://www.kvennakorinn.org/joomla/