Landssamband íslenskra Kvennakóra

Aðventutónleikar Kvennakórs Garðabæjar verða mánudagskvöldið 3. desember nk. kl. 20 í Digraneskirkju, Kópavogi. 

Að vanda verður efnisskrá tónleikanna einkar fjölbreytt og hátíðleg og ættu mörg þekkt jólalög að koma tónleikagestum í sannkallaða jólastemningu.

Sérstakur gestur verður Ármann Helgason, klarínettuleikari en kórstjóri er Ingibjörg Guðjónsdóttir og píanóleikari Sólveig Anna Jónsdóttir.

Forsala aðgöngumiða er hjá kórkonum og á netfangi kórsins. Miðaverð í forsölu er 2000 kr. og 500 kr. fyrir börn á grunnskólaaldri.

Nánari upplýsingar má finna á heimasíðu kórsins og á facebook.

Kvennakór Reykjavíkur býður alla velkomna á aðventutónleika kórsins í Fella- og Hólakirkju. 

Tónleikarnir eru að þessu sinni tileinkaðir Ingibjörgu Þorbergs, sem á sérstakan sess meðal þjóðarinnar. Í gegnum tíðina hefur þjóðin sungið lög hennar við börnin sín, dansað við þau, hlegið með þeim og grátið með þeim. Á 85 ára afmæli Ingibjargar hlaust kórnum sá heiður, að frumflytja tvö lög eftir hana. Lagið Með bjartsýni og brosi skýrir sig sjálft og þar segir Ingibjörg í tali og tónum að óskastjarnan sé alltaf til staðar, hvað sem á bjátar. Þú varst þar samdi Ingibjörg í minningu manns síns, Guðmundar Jónssonar, við ljóð Þorvaldar Þorsteinssonar. Í þessu undurfallega lagi segir Ingibjörg frá kærleik, minningum og væntingum og má með sanni segja að það lætur engan ósnortinn. Jólakötturinn eftir Jóhannes úr Kötlum „vekur í hjörtunum hroll“ í meðförum Ingibjargar, í snilldarútsetningu Vilbergs Viggóssonar, en hann útsetti þessi þrjú lög fyrir kórinn.

Kórinn mun flytja jólalög úr ýmsum áttum, bæði erlend og íslensk, allt frá Jesú mín morgunstjarna úr Hólabók frá 1619 til hins þekkta Jingle Bells eftir James Pierpont með óvæntri viðbót frá Tchaikovsky. Kórinn syngur einnig þætti úr Gloriu eftir Vivaldi og að sjálfsögðu Hin fyrstu jól eftir Ingibjörgu Þorbergs.
Stjórnandi kórsins er Ágota Joó. Píanóleikari á tónleikunum er Vilberg Viggósson. Gunnar Leó Pálsson leikur á slagverk, Helga Vala Sigurðardóttir á flautu og Valdimar Olgeirsson á kontrabassa. Sérstakur gestur er Sigríður Thorlacius.

Staður og stund: Í Fella- og Hólakirkju, fimmtudaginn 29. nóvember kl. 20:00 og laugardaginn 1. desember kl. 16:00.
Miðaverð í forsölu kr. 2500, miðar fást hjá kórkonum, í síma 8966468 eftir kl. 17:00 eða á kvkor@mmedia.is.
Miðaverð kr. 3000 við innganginn.

Kvennakór Akureyrar heldur sína 10. tónleika til styrktar Mæðrastyrksnefnd Akureyrar á sunnudaginn kemur, en fyrstu styrktartónleikarnir voru haldnir 4. desember 2003. Síðan þá hafa fjölmargir kórar og tónlistarmenn tekið þátt í þessum tónleikum og hafa allir undantekningalaust gefið sína vinnu og ágóðinn því runnið beint til Mæðrastyrksnefndar Akureyrar.

Að þessu sinni fær kórinn liðstyrk góðra gesta, en það eru þau Eyrún Unnarsdóttir og Friðrik Ómar.

Eyrún Unnarsdóttir er fædd og uppalin á Akureyri og hóf hún sína tónlistarmenntun í Tónlistarskólanum á Akureyri. Eftir það stundaði hún nám í 5 ár við Tónlistarháskólann í Vínarborg undir handleiðslu Leopolds Spitzers og lauk þaðan tveimur diplómaprófum. Hún hefur sungið einsöng við fjölda tilefna hér á landi sem og í Vínarborg og tekið þátt í ýmsum  verkefnum og óperuuppfærslum. Til dæmis söng hún hlutverk seiðkonunnar í uppfærslu Hymnodiu á Dido og Aeneas eftir Henry Purcell sem flutt var í Hofi fyrr á þessu ári.

Friðrik Ómar Hjörleifsson er fæddur á Akureyri 1981, ólst upp á Dalvík frá árinu 1988, en flutti til Reykjavíkur 2003. Hann fór ungur að spila á trommur og önnur hljóðfæri, og um 10 ára gamall samdi hann sitt fyrsta lag. Friðrik Ómar hefur starfað með öllum helstu listamönnum þjóðarinnar og gefið út fjöldamargar plötur sem hafa selst í yfir 60 þúsund eintökum hér á landi. Friðrik Ómar sendi nýverið frá sér sína 5. sólóplötu sem ber heitið "Outside the ring".

Á tónleikunum annast undirleik hljómsveit sem skipuð er þeim Aladár Rácz á píanó, Stefáni Daða Ingólfssyni á bassa og Emil Þorra Emilssyni á slagverk.

Efnisskráin verður að vanda fjölbreytt og skemmtileg, bæði tónlist sem tengist aðventunni og einnig önnur lög sem kórinn hefur á efnisskrá sinni. Friðrik Ómar og Eyrún syngja lög af sínum efnisskrám en kórinn syngur einnig með þeim í nokkrum lögum. Stjórnandi Kvennakórs Akureyrar er Daníel Þorsteinsson.

Kvennakór Akureyrar hvetur alla sem vettlingi geta valdið að taka nú höndum saman og styrkja Mæðrastyrksnefnd Akureyrar og hjálpa með því bágstöddum fjölskyldum fyrir jólin. Um leið og tónleikagestir láta gott af sér leiða fá þeir að eiga notalega stund og hlýða á ljúfa tónlist. Tónleikarnir verða í Hamraborg í Hofi sunnudaginn 25. nóvember kl. 16:00. Miðasala er hafin í Hofi og á midi.is.

Kvennakór Kópavogs fagnar 10 ára starfsafmæli 2012. Áfanganum hefur verið fagnað á árinu með tónleikum, skemmtun, glens og gleði.

Í Kvennakór Kópavogs eru í dag hátt í fimmtíu kórsystur. Í kórnum eru allar gerðir af konum, langar, stuttar, dökkhærðar, ljóshærðar, mjóar, aðeins minna mjóar, ungar, ungar í anda og svo auðvitað líka bæði dimmraddaðar og skrækróma. 

Við erum konur í kjólum, kvartbuxum, lopapeysum, bomsum, síðbuxum, pilsum, hælaskóm, silkiblússum, íþróttafötum, með trefil o.s.frv.

Við eigum það þó allar sameiginlegt að njóta samveru hvor annarrar og vera söngelskar. 

Árin 10 hafa verið bæði skemmtileg og gefandi. Haldnir hafa verið fjölmargir tónleikar og skemmtanir sem margir hafa sótt og erum við afskaplegar þakklátar fyrir það.

Í lok afmælisárs viljum við fá að þakka fyrir okkur og bjóða til tónleika í Kópavogskirkju þriðjudaginn 30. október kl. 20:00. 

Bjóðum við gesti velkomna á meðan að húsrými leyfir.

Með kveðju,

Kórsystur úr Kvennakór Kópavogs

Frekari upplýsingar hjá Kvennakór Kópavogs eða á facebook síðu kórsins