Landssamband íslenskra Kvennakóra

Í tilefni 85 ára afmælis Ingibjargar Þorbergs verður boðið til veislu í Salnum 25. október og hefst hún kl. 18:00.

Ingibjörg er bæði þekkt sem tónskáld og textahöfundur og ættu allir að getað raulað lögin hennar eins og til dæmis Aravísur, sem er eitt ástsælasta barnalag Íslands. Í tilefni afmælis hennar verður boðið til veislu í Salnum. Þar munu lög hennar hljóma í flutningi margra okkar færustu tónlistarmanna.

Meðal flytjenda á þessum tónleikum verða bæði Kvennakór Reykjavíkur og Kvennakór Kópavogs.

Aðgangur er ókeypis og allir velkomnir á meðan húsrúm leyfir.

http://www.salurinn.is/midasala-og-dagskra/vidburdir-framundan/nr/105

Vox feminae heldur tónleika í Hallgrímskirkju miðvikudaginn 24. október kl. 20:30. Listrænn stjórnandi er að vanda Margrét J. Pálmadóttir kórstjóri sem nú tvinnar saman spuna tónlistarmannanna Sigurðar Flosasonar á saxófón og Gunnars Gunnarssonar á orgel við flutning kvennakórsins Vox feminae, auk auðfúsu gesta úr Stúlknakór Reykjavíkur, á trúarlegum verkum. Tónleikarnir eru helgaðir minningu látinna, kærkomin kyrrðarstund umvafin fagurri tónlist.

Efnisskrá tónleikanna er fjölbreytt, hana prýða jafnt verk 16. aldar tónskáldanna Orlando de Lasso og Tomás Luis de Victoria sem verk eftir Hreiðar Inga Þorsteinsson og Kristján Kristjánsson. Vox feminae hefur löngum haft heilaga guðsmóður í hávegum, að þessu sinni verða flutt verk helguð Ave María m.a. eftir tónskáldin Biebl, Schubert og Sigvalda Kaldalóns. Hljóðfæraskipan og flutningur tónlistarinnar er með nýstárlegum hætti þar sem spuni ræður ríkjum í framsetningu úrvalshljóðfæraleikara, kórs og kórstjóra.

Vetur gengur brátt í garð, ljósin lifna á næturhimni meðan jörðin sefur snævi þakin. Allra heilagra messa er Vox feminae kær, Margréti J. Pálmadóttur hefur ævinlega tekist að laða fram angurblíða stemningu á tónleikum sem kórinn hefur haldið á þessum árstíma. Unnendum trúarlegrar tónlistar sem samin hefur verið til að veita huggun harmi gegn gefst hér einstakt tækifæri til að eiga ljúfa stund í Hallgrímskirkju.

Sunnudaginn 14. október kl. 16:00 mun Kvennakór Kópavogs, í samstarfi við Digraneskirkju, standa fyrir tónleikum til styrktar Mæðrastyrksnefnd Kópavogs. Listamennirnir sem koma fram á tónleikunum eru Kvennakór Kópavogs og Stúlknakór Kópavogs ásamt stjórnanda sínum Gróu Hreinsdóttur og Huldu Maríu Halldórsdóttur sem syngur á táknmáli, Karlakór Kjalnesinga, nemendur úr Tónlistarskóla Kópavogs, Gissur Páll Gissurarson, Sigrún Hjálmtýsdóttir (Diddú), Sigtryggur Baldursson, betur þekktur sem Bogomil Font og Áslaug Helga Hálfdánardóttir.

Ræðumaður verður sr. Gunnar Sigurjónsson sóknarprestur í Digraneskirkju.

Þetta er fjórða árið í röð sem Kvennakór Kópavogs stendur fyrir góðgerðartónleikum undir yfirskriftinni Hönd í hönd. Allir listamenn og aðrir sem koma að skipulagningu og framkvæmd tónleikanna gefa vinnu sína og miðaverð rennur því óskipt til Mæðrastyrksnefndar Kópavogs. Tónleikarnir verða haldnir í Digraneskirkju og aðgangseyrir er 2.500 kr.

Hægt er að panta miða með því að senda póst á netfangið hondkk@gmail.com. Einnig verður hægt að kaupa miða við innganginn meðan húsrúm leyfir.

Kyrjukórinn í Þorlákshöfn fór í vel heppnaða kórferð til Ohrid í Makedóníu í sumar en þar er árlega haldið kóramót. Í ár var mótið haldið í fimmta sinn dagana 23. - 27. ágúst en hægt var að skrá kóra til þátttöku í fimm tegundir tónlistar sem voru: útitónleikar í Ohrid sem allir taka þátt í, kórakeppni, kirkjuleg tónlist, þjóðlagatónlist og popptónlist. Kyrjukórinn tók þátt í þjóðlagahlutanum en 48 kórar frá 15 löndum tóku þátt í mótinu allt frá atvinnukórum til áhugamannakóra en karlakvartett var minnsta einingin sem tók þátt.

Undirbúningur og utanumhald mótsins var til fyrirmyndar og mæla kórkonur óhikað með mótinu. Boðið var upp á ýmsar skoðunarferðir um nágrennið sem kórinn nýtti sér óspart því það er ekki á hverjum degi sem ferðast er til Makedóníu. Í öllum ferðum fylgdi kórnum sami leiðsögumaður en hún var bæði fróð og skemmtileg. Kórinn gisti á hótelinu Inex Gorica rétt utan við bæinn en það er staðsett á höfða við Ohrid vatn með útsýni yfir vatnið af svölum veitingastaða hótelsins og þeirra herbergja sem þangað snúa. Mótið sjálft var haldið á hótelinu sem var mjög þægilegt fyrir kórkonur en flestir kóranna gistu annars staðar. Kórinn eyddi síðustu tveimur dögunum í höfuðborg Makedóníu, Skopje, þar sem margt er hægt að skoða auk þess að versla og njóta frísins.

Myndir úr ferðinni er hægt að skoða á vef Kyrjukórsins. 

Frekari upplýsingar um mótið má sjá hér.

Upplýsingar um hótelið sem kórinn gisti á má sjá hér.