Hinn ársgamli kvennakór, kvennakórinn Fjalladísir óskar eftir lagvísum og hressum konum í kórinn.
Inntökupróf fara fram fimmtudaginn 13. september milli kl. 18 - 19 í tónmenntastofu í Hólabrekkuskóla og geta allar konur frá aldrinum 16-60 ára komið og skráð sig þá.
Skráning í kórinn er í síma 699 4686.
Þegar sumri lýkur fara farfuglarnir að hefja sig til flugs og það sama má segja um söngfuglana í Kvennakór Suðurnesja. Kórkonur eru reyndar aðeins búnar að hita upp fyrir veturinn með söng á Ljósanótt en kórinn tók þátt í tónlistardagskrá í Duushúsum. Kvennakór Suðurnesja hefur tekið þátt í hátíðinni frá upphafi enda er þetta frábær vettvangur fyrir menningarstarf og skemmtileg leið til að kveðja sumarið og hefja vetrarstarfið. Kvennakórinn tók líka þátt í Sandgerðisdögum en þar sáu kórkonur um kósýkvöld kvenna sem var haldið í sundlauginni í Sandgerði og tókst það frábærlega. Góð mæting var enda flott dagskrá í boði. Bláa lónið var með kynningu á vörum sínum, lesið var úr bókum frá bókaútgáfunni Lesstofunni, glæsilegt happdrætti með flottum vinningum, söngur og tískusýning þar sem kórkonur brugðu sér í hlutverk fyrirsætna og sýndu föt frá hönnuðum af Suðurnesjum.
Vetrarstarfið hefst síðan af fullum krafti mánudaginn 10. september en þá verður haldin opin æfing í Listasmiðjunni, Keilisbraut 773 á Ásbrú en þar er kórinn með æfingaaðstöðu. Kvennakórinn hvetur allar konur sem hafa áhuga á söng til að kíkja við því þó það séu margar skemmtilegar og söngelskar konur í kórnum er nóg pláss fyrir fleiri. Kórkonur ætla líka að slá upp Pálínuboði og verður eflaust ýmislegt girnilegt á borðum. Æfingin hefst kl. 20.
Kvennakór Suðurnesja er elsti starfandi kvennakór á landinu en hann var stofnaður 22. febrúar 1968 og verður því 45 ára í vetur. Dagskrá vetrarins er ekki fullmótuð en gert er ráð fyrir að kórinn komi fram á tónleikum fyrir jólin auk þess sem haldnir verða vortónleikar. Í febrúar fara kórkonur í æfingabúðir í Skálholti. Ýmislegt fleira skemmtilegt er á döfinni sem verður nánar kynnt síðar.
Kórinn æfir á mánudögum kl. 20 og raddæfingar eru á miðvikudögum á sama tíma.
Jórukórinn á Selfossi vantar stjórnanda. Í Jórukórnum eru um 40 hressar konur og hefur hann starfað í 15 ár. Starfsemi hefst aftur í byrjun september eftir sumarfrí.
Áhugasamir hafi samband á netfangið:
paolayr@gmail.com
Salka kvennakór á Dalvík leitar að nýjum kórstjóra fyrir veturinn en Margot Kiis sem hefur stjórnað kórnum undanfarin ár er á leið til Noregs. Salka var stofnuð árið 2008 og hefur sérhæft sig í flutningi dægurlaga í léttum djössuðum útsetningum.
Kórkonur leita að hressum, ákveðnum og skapandi stjórnanda. Þær bjóða söngglaðan hóp kvenna sem er tilbúinn að takast á við spennandi ný verkefni.
Upplýsingar um starfið gefur Guðrún Inga formaður í síma 865-1983. Einnig má senda fyrirspurn á netfang kórsins.
