Landssamband íslenskra Kvennakóra

Aðalfundar Gígjunnar 2010
Laugardaginn 23. október kl. 16:00 - 18:00 verður aðalfundur Gígjunnar haldinn í Söngskólanum Domus Vox, Laugavegi 116, 105 Reykjavík.

Dagskrá aðalfundar:

1. Skýrsla stjórnar.
2. Reikningar.
3. Umræða um skýrslu og reikninga.
4. Tillögur og lagabreytingar.
5. Ákvörðun árgjalds.
6. Kosning formanns.
7. Kosning stjórnar og varamanna.
8. Kosning tveggja skoðunarmanna reikninga.
9. Önnur mál.

Lagabreytingar og aðrar tillögur frá aðildarkórum skulu berast stjórn eigi síðar en tveimur vikum fyrir aðalfund.

Að loknum hefðbundnum aðalfundarstörfum mun Ingibjörg Pétursdóttir heiðursfélagi Léttsveit Reykjavíkur flytja erindi með yfirskriftinni "það er gaman að syngja saman". Í lok fundar munu fulltrúar frá Jórukórnum halda kynningu á landsmóti kvennakóra sem haldið verður á Selfossi vorið 2011.

Aðildarkórar Gígjunnar eru hvattir til þess að senda formann og stjórnir sínar á fundinn. Við viljum vekja athygli á að hver kór getur sent eins marga fulltrúa og hann vill á fundinn. Tveir fulltrúar hvers aðildarkórs hafa atkvæðisrétt á aðalfundi skv. lögum Gígjunnar.

Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína. Aðildarkórar eru einnig hvattir til að koma með tillögur að lagabreytingum. Breytingartillögur þurfa að berast fyrir fundinn þannig að hægt sé að kynna þær fyrir öðrum kórum með tölvupósti. Vinsamlegast sendið allar tillögur eða hugmyndir að lagabreytingum á netfangið gigjan2003@gmail.com fyrir laugardaginn 9. október.

Í tengslum við aðalfund Gígjunnar er áformað að halda málþing kórstjóra kvennakóra sama dag kl. 14. Kórstjórar munu þá hittast og skiptast á skoðunum um þeirra störf. Kórstjórar eru beðnir að láta vita með tölvupósti á netfangið gigjan2003@gmail.com hvort þeir hafa áhuga á að mæta á málþingið eigi síðar en föstudaginn 1. október. Ef næg þátttaka fæst verða sendar nánari upplýsingar til kórstjóra er nær dregur.

Við hlökkum til þess að sjá ykkur sem flestar á fundinum.

Með bestu kveðjum frá stjórn Gígjunnar;
Heiða, Kvennakór Suðurnesja
Jófríður, Kvennakór Kópavogs
Anna Inga, Léttsveit Reykjavíkur
Steiney, Kvennakór Hafnarfjarðar
Anna, Kvennakór Reykjavíkur

Kvennakórinn Léttsveit Reykjavíkur söng ásamt mörgum fleiri á tónleikum sem haldnir voru í tilefni 70 ára afmælis Jóns Kr. Ólafssonar í sal FÍH síðast liðið laugardagskvöld. Þetta var mikil söngveisla og Jóni færðar margar gjafir og viðurkenningar. Einnig var stofnaður sjóður sem styrkja á safnið hans, Melódíur minninganna.
 
Léttsveitin heldur í söngferðalag til Krakár í Póllandi þann 9. október. Kórinn mun halda eina tónleika í borginni og gestir á tónleikunum verða karlakórinn Echo frá Kraká. Kórinn mun flytja íslensk þjóðlög, ættjarðarlög  og lög eftir Tómas R. Einarsson.

Léttsveitarkonur ásamt ferðafélögum munu einnig skoða sig um í hinum frægu Saltnámum og fara í ferð til Auschwitz og Birkenau.

Kvennakórinn Vestfrisku Valkyrjurnar á Ísafirði hefur fengið nýtt nafn og nýja stjórn. Nafn kórsins er nú Kvennakór Ísafjarðar. Við stjórn kórsins tók altrödd kórsins og skiptir hún með sér verkum. Ritarar eru Anna Guðrún Gylfadóttir og Arna Björk Sæmundsdóttir, gjaldkeri er Anna Ragnheiður Grétarsdóttir, formaður er Dagný Þrastardóttir. Einnig eru tveir meðstjórnendur og það eru þær Liene Tiesnese og Vilma Kuuliala. Kórstjóri Kvennakórs Ísafjarðar er Bjarney Ingibjörg Gunnlaugsdóttir. Fjöldi kvenna í kórnum er núna um 23 konur og enn eru söngkonur að bætast í hópinn.

Kórinn stefnir á að vera með á Landsmótinu sem haldið verður á Selfossi dagana 29. apríl - 1. maí 2011. Enn er að vísu ekki komið á hreint hvað margar úr kórnum geta mætt enda ennþá góður tími til stefnu.

Á dagskrá  kórsins í vetur eru tónleikar þann 13. nóvember þar sem við ætlum að flytja lög sem við æfðum og fluttum á kóramótinu á Mývatni 2007 og 2009. Kórinn syngur á aðventukvöldi þann 29. nóvember ásamt öðrum kórum hér á svæðinu. Eftir áramótin er ætlunin að flytja Gloriu eftir A. Vivaldi með einsöngvurum og lítilli kammersveit.
Einnig munum við halda vortónleika og taka þátt í kvennakóramótinu.

Ljósanótt, menningar- og fjölskylduhátíð Reykjanesbæjar verður haldin í  11. sinn dagana 2. – 5. september.

Dagskráin þessa hátíðardaga er fjölbreytt og sniðin að þörfum allrar fjölskyldunnar. Bæjarbúar taka virkan þátt í hátíðinni og framboð menningarviðburða hefur aukist ár frá ári jafnt og gestafjöldi. Áhersla er lögð á viðamiklar uppákomur frá fimmtudegi til sunnudags en hápunktur hátíðarinnar er á laugardeginum.

Tónlistin leikur stórt hlutverk á Ljósanótt, má þar nefna rokktónleika í Rokkheimum Rúnars Júlíussonar, bílskúrstónleika eldri kappa, tónleikasyrpu í Duushúsum þar sem Kvennakór Suðurnesja mun koma fram í Bíósalnum kl. 16.30 og hátíðartónleika í Stapa. Tónleikar unga fólksins verða í Frumleikhúsinu á fimmtudagskvöldið og á útisviðinu á föstudeginum koma fram ýmsir tónlistarmenn. Hátíðarhöldin ná hámarki á laugardagskvöldið en þá leika Hjaltalín og Páll Óskar, Hjálmar, Mannakorn og Ellen Kristjánsdóttir.  Gert verður hlé á dagskránni á meðan á flugeldasýningu stendur upp úr tíu en Hjálmar munu leika áfram í nokkra stund að henni lokinni.

Boðið verður upp á kjötsúpu fyrir gesti og gangandi á föstudeginum og árgangagangan á laugardeginum er viðburður sem enginn vill missa af. Skemmtileg barnadagskrá verður á stóra sviðinu á laugardeginum auk þess sem boðið verður upp á ratleik í Duushúsum og Tilraunalandið ásamt hoppuköstulum og kassaklifri verður í skrúðgarðinum. Skessan í hellinum er í hátíðarskapi og mun hún bjóða gestum hátíðarinnar upp á heitar lummur við smábátahöfnina í Gróf.

Fjöldi myndlistarmanna sýnir verk sín víðs vegar um bæinn auk þess sem gallerý og vinnustofur listamanna verða opnar. Þess má geta að á þriðja hundrað einstaklinga eru að sýna verk sín á einn eða annan hátt.

Hátíðartónleikar á vegum Tónlistarfélags Reykjanesbæjar verða haldnir í Stapa á Ljósanótt með aðkomu helstu kóra og einsöngvara í Reykjanesbæ.
Meðal þátttakenda eru: Kvennakór Suðurnesja, Kór Keflavíkurkirkju, Karlakór Keflavíkur og sönghópurinn Orfeus. Einnig stíga á stokk einsöngvararnir Bylgja Dís Gunnarsdóttir, Jóhann Smári Sævarsson, Rúnar Þór Guðmudsson og  Rósalind Gísladóttir ásamt fjölda annarra. Tónlist og útsetningar eru í höndum Arnórs B. Vilbergssonar sem hefur fengið til liðs við sig fjölda hljóðfæraleikara af svæðinu sem leika undir. Einnig kemur fram Ragnheiður Skúladóttir píanóleikari og núverandi Listamaður Reykjanesbæjar.
Efnisskráin er fjölbreytt og má þar nefna kórverk, íslensk sönglög og aríur auk lokakaflans úr Brúðkaupi Fígarós eftir Mozart og kórs úr Hallgrímspassíu Sigurðar Sævarssonar. Auk þess verða fluttar aríur úr Nabucco eftir Verdi, Casta Diva eftir Bellini og Nessun Dorma eftir Puccini.
Listrænn stjórnandi tónleikanna er Jóhann Smári Sævarsson. Tónleikarnir hefjast kl. 16:00 sunnudaginn 5. september og standa í tvo klukkutíma með hléi þar sem seldar verða léttar veitingar. Hér er um að ræða metnaðarfulla og glæsilega dagskrá þar sem ekkert er til sparað. Aðgangur er ókeypis og öllum heimilt að koma og njóta á meðan húsrúm leyfir. Takið daginn frá og njótið glæsilegrar tónlistarveislu.

Frekari upplýsingar um dagskrá ljósanætur er að finna á www.ljosanott.is.