Landssamband íslenskra Kvennakóra

17. - 22. ágúst 2010 verður haldin í Reykjavík 6th Nordic Baltic Choral Festival - United Voices.

Sjö af aðildarkórum Gígjunnar taka þátt í hátíðinni:
Kvennakór Garðabæjar
Kvennakór Háskóla Íslands
Kvennakór Reykjavíkur
Kvennakór Öldutúns
Kvennakórinn Ymur
Kyrjurnar
Kyrjukórinn í Þorlákshöfn
  Um 67 kórar taka þátt. 1800 kórsöngvarar frá 10 þjóðlöndum, mæta til hátíðarinnar; þar af tæplega 500 íslenskir þátttakendur. Ísland, Danmörk, Noregur, Svíþjóð, Finnland, Eistland, Lettland, Litháen, Færeyjar og Grænland.
Hátíðin fer fram í Laugardalshöll, en tónleikar verða í helstu tónleikahúsum borgarinnar bæði í hádegi og á kvöldin. Kórarnir taka þátt í Menningarnótt og fylla stræti og torg með söng og litríkum kórbúningum yfir daginn. Um kvöldið verða lokatónleikarnir í Laugardalshöll. Þar syngja kórarnir allir saman, eitt lag frá hverju landi og flytja einnig kórverk sem þeir hafa unnið í fjórum mismunandi vinnusmiðjum yfir mótsdagana.
Kórarnir fara einnig í skoðunarferð um Gullna hringinn og Bláa lónið verður uppfullt af kórsöngvurum sem örugglega taka lagið í lóninu.

Þetta er langstærsta kórahátíð sem haldin hefur verið hér á landi og meðan fresta þarf hestamannamótum og ferðamenn hræðast afleiðingar eldgoss, þá eru kórsöngvarar bæði hugumstórir og við hestaheilsu.
Framkvæmdastjórn mótsins skipa þau: Margrét Bóasdóttir, formaður, Garðar Cortes, listrænn stjórnandi Guðríður St. Sigurðardóttir, verkefnisstjóri Matthías Kjartansson, ráðstefnur og fundir, Kópavogi.
Smelltu hérna til að skoða vefsetur hátíðarinnar

Nú fer brátt í hönd sjötta kóramótið þar sem Norðurlönd og Baltnesku löndin mætast og leggja saman krafta sína. Mót þetta, Kórahátíð Norðurlandanna og Eystrasaltslandanna (The Nordic – Baltic Choral Festival 2010) var fyrst haldið í Riga í Lettlandi árið 1995 og hefur síðan verið haldið fjórum sinnum í Svíþjóð, Noregi, Litháen og Eistlandi.

Sjötta Kórahátíð Norðurlandanna og Eystrasaltslandanna verður haldin í Reykjavík dagana 17. - 22. ágúst. Kvennakór Reykjavíkur lætur sig ekki vanta og hefjast æfingar hjá kórnum 10. ágúst.

Áhugamannakórar jafnt sem atvinnukórar mæta til leiks á þessu kóramóti, góðir fulltrúar landa sinna. Hátt í 1800 þátttakendur hafa boðað komu sína og margt spennandi verður í boði. Vinnuhópar með 100-700 þátttakendum verða að störfum á mótinu og munu flytja afrakstur vinnu sinnar á tónleikum.

Kórarnir koma einnig víða fram, 2-4 syngja á sömu tónleikum. Boðið verður upp á hádegistónleika og kvöldtónleika að ógleymdum tónleikum á Menningarnótt Reykjavíkurborgar. Allir kórarnir munu svo syngja saman á lokahnykk mótsins og verður tilkomumikið að sjá og heyra í hátt í 1800 manna kór.

Lokatónleikar verða haldnir í Laugardalshöll 21. ágúst kl. 19.30. Samtals verða flutt 26 verk þetta lokakvöld.

Þegar kóramótinu lýkur hefst vetrarstarf Kvennakórs Reykjavíkur. Æfingar verða haldnar í húsnæði Reykjavíkurborgar að Vitatorgi eins og tvo undanfarna vetur. Nánar verður tilkynnt um tilhögun æfingatíma síðar. Í upphafi vetrarstarfs viljum við gjarnan sjá nýjar konur bætast í hópinn og bjóðum þær alltaf velkomnar. Áhugasamar konur eru hvattar til að hafa samband.

Smelltu hérna til að skoða heimasíðu The Nordic – Baltic Choral Festival

Á kvenréttindadaginn þann 19. júní kemur út ljósmyndabókin „da capo‟. Meginstef hennar eru portrettmyndir af kórkonum í Vox feminae ásamt minningabrotum úr kórstarfinu og hugleiðingar kórfélaga um hlutverk söngsins í lífi þeirra. Að auki hefur bókin að geyma sögu Vox feminae í máli og myndum, erindi um sögu kvennasöngs á Íslandi og erindi frá listamönnum um samstarfið við Vox feminae. Formála ritar Vigdís Finnbogadóttir, fyrrverandi forseti Íslands.

Vox feminae heldur tónleika í Þjóðmenningarhúsinu við Hverfisgötu á útgáfudaginn kl. 15.00. Stjórnandi er Margrét J. Pálmadóttir. Á sama tíma verður opnuð sýning í Þjóðmenningarhúsinu þar sem bókin verður til sýnis ásamt ágripi af sögu kórsins. Aðgangur er ókeypis meðan húsrúm leyfir.

Bókinni er ætlað að veita innsýn í starf kvennakórs á Íslandi og þeirra kvenna sem hann skapa. Portrettmyndirnar af kórfélögum Vox feminae tók Sigríður Soffía Gunnarsdóttir á fimmtán ára afmæli kórsins

Samfelld saga kvennakóra á Íslandi er ekki löng og ritnefnd þótti því mikilvægt að varpa ljósi á líf og starf kvennakórs í samtímanum, ekki síst með tilliti til hinnar miklu uppbyggingar sem hefur átt sér stað síðustu áratugina í kvennakórastarfi á Íslandi. Í bókinni er ágrip af sögu kórsins og skrá yfir tónleika og myndir úr viðburðum í lífi hans auk skrár yfir alla félaga í Vox  feminae og þá listamenn sem hafa starfað með kórnum frá stofnun hans. Auk þess eru í bókinni erindi um sögu kvennasöngs á Íslandi og erindi um samstarf einsöngvara og raddþjálfara, píanóleikara, búningahönnuðar, gestastjórnanda og tónskálda við Vox feminae. Bókin er 200 blaðsíður, innbundin og ríkulega myndskreytt.  Bókinni fylgir geisladiskur sem hefur að geyma tvö lög af hverjum þeirra þriggja geisladiska sem kórinn hefur gefið út.

Hægt er að panta eintak af bókinni með því að senda línu á netfang kórsins: voxfeminae(hjá)voxfeminae.is

Vortónleikar Kvennakórs Akureyrar verða haldnir í Akureyrarkirkju 30. maí kl. 15.00. Stjórnandi tónleikanna er Daníel Þorsteinsson og undirleikari á píanó er Helga Bryndís Magnúsdóttir. Boðið verður upp á fjölbreytta efnisskrá með lögum úr ýmsum áttum.

Miðaverð er 1500 krónur og frítt er fyrir 12 ára og yngri. Vinsamlegast athugið að ekki er hægt að taka á móti greiðslukortum.

Kvennakór Akureyrar var stofnaður á vordögum 2001. Í honum starfa að jafnaði um 70 konur frá Akureyri og nærsveitum. Frá haustinu 2008 er formaður kórsins Snæfríð Egilson og stjórnandi frá því í janúar 2009 er Daníel Þorsteinsson.

Kórinn gaf út sinn fyrsta geisladisk vorið 2008, hann ber nafnið Sólardans á vori og er fáanlegur hjá kórfélögum, hjá Ragnhildi í síma 896 2273 og í netfangi kórsins kvak(hjá)kvak.is.