Einn af hinum árvissu vorboðum eru tónleikar hinna ýmsu kóra, sem halda uppi öflugu félags- og menningarstarfi. Hjá Jórukórnum hefur starfsárið verið einkar ánægjulegt. Síðastliðið haust fékk kórinn til liðs við sig nýjan stjórnanda, Stefán Þorleifsson og hefur hann slegið nýjan tón í efnisvali og áherslum kórsins. Það er ánægjuefni að talsverð endurnýjun hefur orðið í kórnum, ungar og öflugar söngkonur hafa bæst í hópinn og hafa yfir 40 konur æft af kappi og uppskera nú árangur vetrarstarfsins.
Að þessu sinni verður boðið upp á tvenna tónleika. Í Selfosskirkju sunnudaginn 21. apríl kl. 20.00 og í félagsheimilinu Þingborg mánudagskvöldið 22. apríl kl. 20.30, þar verður kaffihúsastemning ríkjandi og boðið verður upp á kaffi og konfekt.
Efnisskráin er afar fjölbreytt, þar er að finna kunn íslensk ættjarðar- og alþýðulög, íslensk dægurlög frá ýmsum tímum, þar á meðal eru lög eftir Björk Guðmundsdóttur og Of Monsters and Men. Einnig eru þekkt erlend dægurlög á dagskránni, sem í heildina eru mjög lífleg og skemmtileg.
Frumflutt verður lag Stefáns Þorleifssonar, sem hann samdi fyrir Jórukórinn til minningar um Rannveigu Guðjónsdóttur sem söng lengi með kórnum, en féll frá langt um aldur fram. Lagið er við ljóð skáldkonunnar Erlu. Erla orti ljóðið til dóttur sinnar, Grétu, sem var móðir Rannveigar.
Hljóðfæraleikarar með kórnum verða Róbert Dan Bergmundsson á bassa og Stefán Ingimar Þórhallsson á trommur en þeir ásamt Stefáni Þorleifssyni mynda kjarnann í Djassbandi Suðurlands.
Fyrir Jórur eru vortónleikarnir hápunkturinn í kórstarfinu og vonast kórkonur til að sjá sem flesta á tónleikunum sem framundan eru og hlakka til að njóta þeirra með tónleikagestum.
Miðaverð er kr. 2.500.-, frítt fyrir 12 ára og yngri.