Sunnudaginn 3. nóvember n.k. kl. 16:00 stendur Kvennakór Kópavogs fyrir fjáröflunartónleikum í Digraneskirkju til styrktar Mæðrastyrksnefnd Kópavogs. 

Kvennakórinn hefur fengið til liðs við sig hóp af frábærum listamönnum sem allir gefa vinnu sína. Það eru auk Kvennakórsins:

  • Kór Álfhólsskóla, stjórnandi Þórdís Sævarsdóttir
  • Blásarasveit úr Skólahljómsveit Kópavogs, stjórnandi Össur Geirsson
  • Söngvararnir Helgi Björnsson, Þór Breiðfjörð og Þuríður Sigurðardóttir
  • Ræðumaður verður Sr. Gunnar Sigurjónsson sóknarprestur í Digraneskirkju
  • Stjórnandi Kvennakór Kópavogs er Gróa Hreinsdóttir
Nú fer í hönd sá tími árs sem fólk finnur hvað sárast fyrir skorti og er ástæða til að hvetja þá sem eru aflögufærir að láta gott af sér leiða. Stór hluti skjólstæðinga Mæðrastyrksnefndar eru barnafjölskyldur og einstæðar mæður en í hverri viku sækja að meðaltali 40-50 manns sér aðstoð hjá nefndinni og mun fleiri er nálgast jól og aðrar hátíðir.    Allir listamenn og aðrir sem vinna að undirbúningi og framkvæmd tónleikanna gefa vinnu sína svo allur ágóði rennur óskiptur til Mæðrastyrksnefndar Kópavogs.   Aðgangseyrir er 2500 kr. og verða miðar seldir við innganginn.

Í tengslum við fjáröflunartónleikana vilja kórkonur hvetja fólk til að líta í skápa og geymslur hjá sér og athuga hvort ekki leynist þar sitthvað sem getur komið að notum. Mæðrastyrksnefnd Kópavogs tekur með þökkum við fatnaði, leikföngum, bókum, rúmfatnaði, gluggatjöldum, dúkum og eldhúsáhöldum.

Nefndin er til húsa í Fannborg 5 á jarðhæð, á bak við gamla pósthúsið við Digranesveg. Þar er opið á þriðjudögum kl. 16:00-18:00 og tekið á móti framlögum frá fólki.

Nánari upplýsingar um Mæðrastyrksnefnd Kópavogs.

Eldri fréttir