Jórukórinn á Selfossi vill byrja á því að óska öllum kvennakórskonum nær og fjær gleðilegs árs með von um að nýju ári fylgi ljós og friður.
Við Jórur fögnum nýju ári með sól í hjarta og sól í sinni því mörg spennandi verkefni eru framundan hjá okkur, þar ber þó hæst undirbúningur fyrir Landsmótið 2011. Við erum komnar á fullt með skipulagninguna, dagsetningin er á hreinu eins og þið sjáið hér að ofan. Búið er að fá mótsstjóra, Margrét Bóasdóttir hefur samþykkt að taka það verkefni að sér og verður að segjast að þar komum við ekki að tómum kofanum. Margrét er hafsjór af hugmyndum og einnig með mikla reynslu á þessu sviði.
Við erum komnar með margar hugmyndir af skemmtilegum og áhugaverðum vinnuhópum og er líklegt að einhverjir munu tengjast sunnlenskum tónskáldum – en við nánari athugun eru þau býsna mörg og fjölbreytileiki þeirra líka mikill. Einnig höfum við sett okkur það markmið að hafa sameiginlegu lögin þannig að það verði ógleymanlegt að syngja þau í yfir 500 kvennakór.
Næsta skref er síðan að fá tónskáld til þess að semja fyrir okkur mótslagið og einnig að ræða við tónlistarmenn hér heima í héraði um samstarf.
Markmið okkar í Jórukórnum á Selfossi er að standa fyrir spennandi og skemmtilegu kvennakóramóti vorið 2011.
Við hvetjum alla kóra að taka þessa helgi frá og skella sér á Selfoss.
Öll bréf sem landsmótsnefndin sendir frá sér til aðildarkóra Gígjunnar eru sett undir linkinn Landsmót hér á vefsetrinu.