Landssamband íslenskra Kvennakóra

Að loknum vel heppnuðum vortónleikum Kvennakórs Reykjavíkur, 3. maí, er stefnan tekin á Kórastefnu við Mývatn 4. - 7. júní. Á kórastefnunni verða um 400 manns að meðtöldum Sinfóníuhljómsveit Norðurlands og Kammerkór Tónlistarháskólans í Bremen.

Dagskráin er þéttsetin með námskeiðum og stífum æfingum sem enda með hátíðartónleikum í Reykjahlíð þann 7. júní. Kórarnir taka líka þátt í tónleikum 4. júní í Skjólbrekku og 5. júní í hvelfingu Laxárstöðvar í Aðaldal. Kvennakór Reykjavíkur undirbýr þessa ferð af kappi og getur ekki beiði eftir því að skella sér í jarðböðin í Mývatnssveit.
 
 
 

Vortónleikar Heklanna verða haldnir í sal FÍH, Rauðagerði 27 klukkan 16.00 sunnudaginn 10. maí.
Mjög fjölbreytt lagaval, allt frá ættjarðarsöngvum til Abba. Boðið verður upp á Kósí kaffihúsastemningu við kertaljós og góða tónlist. Boðið verður einnig upp á léttar veitingar gegn vægu verði. Aðgangseyrir er 1.500 kr. og frítt fyrir 12 ára og yngri, því miður þá er enginn posi á staðnum.

Kórstjóri Heklanna er Björk Jónsdóttir og undirleikari á tónleikunum verður Aðalheiður Þorsteinsdóttir.

Kvennakórinn Vox feminae heilsar vori miðvikudaginn 6. maí kl. 20 í Hafnarborg með flutningi tónlistar frá 16. og 17. öld undir yfirskriftinni „Þar sýprus grær“. Fluttir verða madrigalar og söngvar frá ýmsum löndum, þar á meðal eftir Claudio Monteverdi, Passerau, Giovanni Gastoldi, John Dowland, Thomas Morley, Orlando Gibbons og O. Vecchi.

Madrigalar eru fjölradda veraldleg sönglög og má rekja uppruna þeirra til tíma endurreisnarinnar á Ítalíu, er aðalsmenn tóku að ráða tónlistarmenn í þjónustu sína. Við ítalskar hirðir störfuðu þannig litlir sönghópar sem sungu madrigala fyrir húsbændur og gesti þeirra. Smám saman breiddist þetta tónlistarform út og náði miklum vinsældum og þá einkum á Englandi. Flest ljóðanna fjalla um ástina í sinni margbreytilegu mynd, gleði, unaði, angist, söknuði og kvöl.

Á tónleikunum koma fram ásamt Vox feminae, einsöngvarar úr röðum kórfélaga, Símon Ívarsson gítarleikari og Marion Herrera hörpuleikari.

Listrænn stjórnandi tónleikanna er Margrét J. Pálmadóttir.

Miðasala hjá kórfélögum og í síma 863 4404.

Senjóríturnar verða með vortónleika sína í Neskirkju laugardaginn 9. maí kl. 14:00.

Miðaverð á tónleikana: Fullorðnir kr. 1500
                                     Börn kr. 600