Landssamband íslenskra Kvennakóra

Kvennakór Kópavogs heldur vortónleika sunnudaginn 26. apríl, kl. 16:00, í Hásölum við Hafnarfjarðarkirkju.
Kórinn ákvað í haust að fara nýjar leiðir varðandi tónleikahald. Kórinn er orðinn sjö ára og okkur fannst vera komin tími til þess að breyta út af vananum og fara út fyrir “þæginda-svæðið” okkar með því að brjóta svolítið upp þá ramma sem við höfum haldið okkur við undanfarin ár.

Tekin var sú ákvörðun að vera hvorki með jólatónleika eða vortónleika í maí, heldur hafa eina stærri tónleika í mars-apríl og taka þá fyrir eitthvert þema. Ákváðum við að syngja eingöngu lög úr söngleikjum ýmisskonar. Lögin eru mjög ólík, frá ólíkum tímum, sum í syrpu og önnur stök. Efnisskráin er mikið til á ensku en nokkur lögin hafa þó verið þýdd á íslensku og eitt franskt lag flýtur einnig með.

Þetta var allt ákveðið fyrir kreppu en kannski höfum við fundið á okkur að tíminn framundan yrði þungur mörgum – því dagskráin er einstaklega hressileg og engum ætti að leiðast. Sagt er að söngur létti lundina og það höfum við kórkonur fengið finna í vetur. Áhyggjur fjúka burt um leið og við setjumst niður og syngjum.

Að syngja söngleiki á ensku reyndist ekki næg ögrun því við höfum einnig stigið niður af kórpöllunum og bætt smá hreyfingum við sönginn. Það getur nú verið vandasamt stundum að samhæfa söng og hreyfingar.
Með okkur eru tvær söngkonur sem munu syngja á tónleikunum, annars vegar Kristjana Stefánsdóttir og svo kórstjórinn okkar Natalía Chow Hewlett en auk þeirra munu nokkrar konur í kórnum stíga sín fyrstu spor í einsöng, dúettum, tríóum og kvartettum.

Miðaverð í forsölu: 
2000 kr hjá kórkonum eða hafa samband í póstfangið kvennakorkopavogs(hjá)gmail.com
Miðverð við inngang:
2300 kr, 1500 kr fyrir aldraða og öryrkja, frítt fyrir börn 16 ára og yngri.
Innifalið í miðaverði eru léttar veitingar í hléi.

Hægt er að fá með nánari upplýsingar um tónleikana á vefsetri Kvennakórs Kópavogs.

Nú líður að vori og söngfuglarnir farnir að láta í sér heyra og sama er að segja um konurnar í Kvennakór Suðurnesja. Kórinn mun halda tvenna vortónleika á næstunni, mánudaginn 27. apríl í Safnaðarheimilinu í Sandgerði og miðvikudaginn 29. apríl í Bíósal Duushúsa í Reykjanesbæ og hefjast báðir tónleikarnir kl. 20. Það verður alþjóðlegur blær yfir tónleikunum að þessu sinni því auk nokkurra íslenskra laga og syrpu úr Mamma Mia söngleiknum sem samanstendur af lögum með hinni sænsku ABBA sveit, mun kórinn flytja lög frá Filippseyjum, Rússlandi, Serbíu, Japan, Kenýa og Suður-Ameríku.

Auk þess að syngja á tónleikunum mun kórinn einnig syngja við messu í Ytri-Njarðvíkurkirkju á sumardaginn fyrsta kl. 14 og laugardaginn 25. apríl syngur kórinn á Frístundahátíð í sal Listasmiðjunnar í Ásbrú (áður Vallarheiði) kl. 15, en Kvennakórinn hefur fengið aðstöðu fyrir starfsemi sína í Listasmiðjunni ásamt fleiri hópum listamanna.

Stjórnandi kórsins er Dagný Þórunn Jónsdóttir og meðleikarar á tónleikunum verða Geirþrúður Fanney Bogadóttir á píanó, Jón Árni Benediktsson á bassa og Þorvaldur Halldórsson á trommur.

Það er fátt betra til að létta lundina á erfiðum tímum en tónlist og er það reynsla kórkvenna að söngurinn og félagsskapurinn í kórnum sé góð leið til að gleyma áhyggjum hversdagsins og auka vellíðan. Með þetta að leiðarljósi er áhersla lögð á létta og skemmtilega tónlist á tónleikunum og til þess að leggja sitt af mörkum svo að sem flestir getið notið þess að lyfta sér aðeins upp býður Kvennakórinn ókeypis aðgang á tónleikana.

Margrét Eir og Freyjukórinn undir stjórn Zsuzsönnu Budai verða með tónleika í Reykholtskirkju laugardaginn 28. mars kl. 16:00.
Fjölbreytt og skemmtileg dagskrá.
Miðaverð kr. 1500.-  frítt fyrir 12 ára og yngri.
Enginn posi.

Um síðustu helgi, 20-22. mars, fór Kvennakór Hornafjarðar í æfingabúðir að Smyrlabjörgum í Suðursveit. Með þeim í för var Sigrún Þorgeirsdóttir stjórnandi Kvennakórs Reykjavíkur. Sigrún var sérstakur gestur kórsins í þessum æfingarbúðum og sá um raddþjálfun á kórnum, sem heppnaðist afar vel. Vegleg árshátíð með mökum og gestum var svo haldin á laugardagskvöldinu eftir erfiði helgarinnar.