Landssamband íslenskra Kvennakóra

Hátíðarbragur var yfir aðventutónleikum kvennakórsins Vox feminae, sem haldnir voru sunnudaginn 7. desember í St. Thomas Kirche í Berlín. Tónleikarnar voru vel sóttir og vakti kórinn hrifningu þýskra tónleikagesta en dagskrá tónleikanna spannaði allt frá trúarlegri tónlist til íslenskrar jólatónlistar.

Þá söng kórinn í fjölsóttir messu í Gethsemanekirche í Prenzlauer Berg í Berlín. Kirkjan er að jafnaði afar vel sótt en svo skemmtilega vildi til að þennan sunnudag fóru fram þrjár skírnir í messunni. Þátttakan var því að þessu sinni einstaklega góð en áætlað er að yfir 200 manns hafi hlýtt á söng kórsins. Ennfremur heimsótti kórinn sendiráð Íslands í Berlín og söng fyrir gesti og gangandi í sameiginlega húsi norrænu sendiráðanna í Berlín.

Var það fyrir milligöngu sendiráðsins í Berlín að kórinn söng í Gethsemanekirche. Þónokkrir íslenskir kórar hafa sungið í kirkjunni við mikla hrifningu gesta en hin sterka kórahefð á Íslandi er um margt ólík þeirri þýsku. Á síðustu misserum hafa margir framúrskarandi kórar heimsótt Þýskalanda og hafa með tónleikahaldi sínu kynnt íslenska menningu og þá sérstöðu sem Ísland státar af á þessu sviði.

Kvennakórinn Vox feminae var stofnaður árið 1993 og er vel kynntur á Íslandi og Ítalíu en árið 2000 lenti hann í öðru sæti í VIII. alþjóðlegu kórakeppni í kirkjulegri tónlist, sem haldin er í nafni tónskáldsins Giovanni Pierluigi Da Palestrina í Vatikaninu í Róm. Kórinn hefur haldið fjöldann allan af sjálfstæðum tónleikum og flytur aðallega eldri tónlist, andlega og veraldlega. Hefur kórinn gefið út þrjá geisladiska.

Heimild:
Stiklur, fréttablað utanríkisráðuneytisins um menningarmál

Kvennakórinn Norðurljós hefur gefið út sinn fyrsta geisladisk sem ber nafnið Norðurljós.

Stjórnandi kórsins er Sigríður Óladóttir.

Undirleikarar á diskinum eru þeir Kjartan Valdemarsson, Gunnar Þórðarson, Vilhjálmur Guðjónsson og Jóhann Hjörleifsson. Einsöngvari með kórnum er María Mjöll Guðmundsdóttir.

Hljóðupptökur fóru fram í Hólmavíkurkirkju í apríl 2008 en þær önnuðust Vilhjálmur Guðjónsson og Zakarías Gunnarsson og Vilhjálmur sá einnig um hljóðblöndun og tónjöfnun.

Hægt er að panta diskinn með því að senda póst á solgull(hjá) islandia.is eða hringja í síma 451 3117.

Lögin á diskinum Norðurljós eru:
1.  Leiðarljós
2.  Þú varst sá eini
3.  Lukkudagur Svantes
4.  If I fell
5.  Ástarsæla
6.  Shenandoah
7.  Air
8.  Mamma
9.  Er hann birtist
10. Af stað
11. Ég heillaðist
12. Aðeins þú
13. Viltu alltaf unna mér
14. I have a dream

Kvennakórinn Norðurljós
Kvennakórinn Norðurljós var stofnaður  haustið 1999 af söngglöðum konum á Hólmavík og nærsveitum.
Sigríður Óladóttir hefur verið stjórnandi frá upphafi en margt tónlistarfólk hefur liðsinnt kórnum á þeim tíu árum sem hann hefur starfað.

Vortónleikar og þátttaka í aðventukvöldi eru fastir liðir í starfsemi kórsins auk þess sem hann hefur tekið þátt í mörgum viðburðum innan héraðs sem utan. Kórinn hefur tekið þátt í tveimur landsmótum Gígjunnar.

Haustið 2004  heimsótti kórinn vinabæ Hólmavíkur í Danmörku, Årslev og tók þar þátt í tónleikum og söng við guðsþjónustu.

Vorið 2007 hélt kórinn í söngferð til Skotlands og hélt þar tvenna tónleika í samvinnu við kvennakórinn Harmony21 í Edinborg.

Efnisskrá kórsins hefur jafnan verið af léttara tagi og margir hagmæltir velunnarar Norðurljósa hafa ort eða þýtt söngtexta sérstaklega fyrir kórinn.

Hornfirsku Dívurnar eru mæta í sínu fínasta pússi.

Árlegir jólatónleikar Kvennakórs Hornafjarðar verða haldnir í Nýheimum miðvikudaginn 10. desember, kl 20.

Efnisskráin er að vanda fjölbreytt, létt og leikandi. Ýmsir listamenn koma fram með kórnum. Stjórnandi kórsins er Jóhann Morávek og undirleikari er Jónína Einarsdóttir.

Að venju er boðið upp á dýrlegt kaffihlaðborð sem svignar undan tertum, brauðréttum og fleiri gómsætum réttum.

Miðaverð er kr. 2000 á mann en frítt fyrir 12 ára og yngri.

Á tónleikunum verður einnig hægt að verða sér úti um hin frábæru dagatöl kvennakórskvenna sem eru einmitt svo góð í jólapakkann.

Jólastemmning var á tónleikum í Ísafjarðarkirkju síðasta sunnudagskvöld þar sem kórsöngur og hörpuhljómar spiluðu stærsta hlutverkið.

Flutt voru ljúf jólalög og leikið undir á hörpu en hápunktur tónleikanna var kórverkið „A Ceremony of Carols“ eftir Benjamin Britten sem stúlknakór Tónlistarskóla Ísafjarðar og Vestfirsku valkyrjurnar sameinuðust um að syngja.

Verkið er skrifað fyrir þrjár raddir og hörpu og inniheldur 11 lög, sem segja m.a. frá fæðingu frelsarans, boðun Maríu og freistingu Adams, en er fyrst og síðast lofgjörð til Guðs. Britten var eitt af höfuðtónskáldum Breta á 20. öld. Eftir hann liggja ótal verk, stór og smá, en hann samdi talsvert af tónlist sérstaklega fyrir börn, m.a. verkið „A Ceremony of Carols“.

Flytjendur á tónleikunum voru Sophie Schoonjans á hörpu, Barnakór Tónlistarskóla Ísafjarðar, Stúlknakór Tónlistarskóla Ísafjarðar, Kvennakórinn Valkyrjurnar, Helga Margrét Marzellíusardóttir sópran, Arna Björk Sæmundsdóttir alt. Meðleikarar auk Sophie eru Hulda Bragadóttir, píanó/orgel og Jónas Tómasson, flauta.

Stjórnandi er Bjarney Ingibjörg Gunnlaugsdóttir og hefur hún borið mestallan hita og þunga af undirbúningi tónleikanna.

Heimild