Landssamband íslenskra Kvennakóra

Stöð 2 og Sagafilm leita að kórum til að koma fram í þáttunum Kórar Íslands sem sýndir verða í beinni útsendingu á Stöð 2 í vetur.

Þar munu 20 kórar syngja til sigurs um titilinn Kór Íslands.

Ef kórinn þinn telur fleiri en tíu meðlimi og allir orðnir 16 ára er ekki eftir neinu að bíða.

Við leitum að kórum hvaðanæva af landinu og af öllum gerðum t.d. kvenna-, karla-, blönduðum-, kirkju-, eða átthagakórum.

Þetta er frábært tækifæri fyrir kóra að vekja á sér athygli, efla starfið og taka þátt í að búa til frábært sjónvarpsefni fyrir íslenska áhorfendur.

Kórarnir flytja lögin án undirleiks (acappella). 

Sæktu um, komdu kórnum þínum á framfæri og taktu þátt í að kynna hið fjölbreytta kórastarf í landinu.

Nánari upplýsingar um þættina

Þættirnir skiptast í þrjár hluta: undankeppnina, undanúrslit og úrslit

Undankeppnin eru 5 þættir (þættir 1 til 5):

Í hverjum þætti mætast fjórir kórar og flytja tvö lög í beinni útsendingu.

Lögin skulu valin í samráði við framleiðendur þáttanna og skal hvort lag vera um 2,30 - 3,0 mínútur að lengd. Hugmyndin er að kórarnir flytji tvö ólík lög t.d. þjóðlag, popplag eða rokklag.

Tveir kórar komast áfram úr hverjum þætti í undankeppninni. 

Samtals fara því 10 kórar (tveir kórar úr hverjum þætti) áfram í næsta hluta keppninnar sem eru undanúrslitaþættirnir.

Ath. Símakosning í lok hvers þáttar ásamt atkvæðum dómara ráða úrslitum um hvaða kórar komast áfram í næsta hluta keppninnar.

Undanúrslitaþættirnir eru tveir talsins (þættir 6 og 7):

Í hvorum þætti mætast fimm kórar í beinni útsendingu. Hver kór syngur eitt lag sem á að vera um 3 - 4 mín að lengd.

Tveir kórar úr hvorum þætti komast áfram í úrslitaþáttinn.  Samtals fara því fjórir kórar í úrslitaþáttinn.

Ath. Símakosning í lok hvers þáttar ásamt atkvæðum dómara ráða úrslitum um hvaða kórar komast áfram í lokahluta keppninnar.

Úrslitaþátturinn (þáttur 8):

Fjórir kórar keppa til úrslita í úrslitaþættinum og þurfa kórarnir að flytja tvö lög.

Hvort lag má vera um 2,30 til 3,0 mínútur að lengd. 

Ath. Símakosning ræður úrslitum.

Fjöldi þátta og mikilvægar dagsetningar.

Þættirnir verða  átta talsins og fara þeir allir fram í beinni útsendingu á Stöð 2.

• 5 þættir í undankeppninni (24. sept, 1. okt, 8. okt. 15. okt. 22. okt).

                  Hver kór mætir á eina af þessum dagsetningum

• 2 þættir í undanúrslitum (29. Okt, og 5. nóv)

                  Þeir kórar sem komast áfram úr undanúrslitunum mæta annan hvorn daginn.

• 1 úrslitaþáttur (12. nóv)

                  Fjórir kórar mæta í úrslitaþáttinn, tveir úr hvorum undanúrslitaþættinum.

Tímabil

Í  lok ágúst og byrjun september komum við til með að heimsækja alla kórana sem verða valdir til þátttöku og gera um þá stutta kynningu. Þar kynnumst við kórunum og umhverfi þeirra betur. Tekin verða stutt viðtöl við nokkra kórfélaga og  fylgst með æfingum.

Beinu útsendingarnar  fara fram á sunnudögum frá 24. september til 12. nóvember. Gera skal ráð fyrir að allur dagurinn fari í æfingar og annan undirbúning fyrir útsendinguna.

Á fimmtudeginum fyrir hverja beina útsendingu fara fram æfingar á sviðinu.

Hver kór fær um 1,30 tíma til æfingar.

Tónlistarstjóri verður kórunum innan handar fyrir hönd framleiðanda.

Verðlaun

Verðlaunin eru ekki af verri endanum og munu koma hvaða kór sem er að góðum notum í þeirra starfi. Verðlaunin verða kynnt fljótlega.

Dómnefnd

Þriggja manna fagleg dómnefnd verður kynnt til sögunnar síðar í sumar.

Gaman væri að fá ykkur í lið með okkur

og taka þátt í að búa til skemmtilegt sjónvarpsefni!

Nánari upplýsingar á: korar@sagafilm.is

Það eru tónleikar framundan!
Kvennakór Reykjavíkur ætlar að fara um víðan völl á vortónleikum sínum þann 18. maí í Guðríðarkirkju. Eitt af því skemmtilegasta sem kórinn gerir er að takast á við allskonar tónlist og það mun hann sannarlega gera þetta vorið. Við reynum okkur við smellna þýðingu Þórarins Eldjárns á ABBA lagi úr Mamma Mia, Bítlarnir leggja til nokkur lög og aðdáendur Prúðuleikaranna verða ekki fyrir vonbrigðum. Við dustum rykið af óborganlegu skúringanúmeri og tökumst á við krefjandi klapp í White Whinter Hymnal. Ungversk, bandarísk, norsk, bresk og að sjálfsögðu íslensk lög eru á dagskránni og eru þau hvert öðru fallegra. Efnisskráin er í ætt við íslenskt sumarveður svo gestir ættu að vera við öllu búnir, með sól í hjarta.
Stjórnandi er Ágota Joó. 
Um undirleik sjá Birgir Bragason á Bassa, Erik Robert Qvick á slagverk og Vilberg Viggósson á píanó. 

Miðaverð: 3.000 kr í forsölu, 3.500 kr við innganginn. 
Miðar fást hjá kórkonum eða með því að senda tölvupóst á netfangið postur@kvennakorinn.is

Kvennakór Hafnarfjarðar heldur sína árlegu vortónleika í Hásölum við Strandgötu laugardaginn 13. maí kl. 15:00.

Á tónleikunum  fá gestir að heyra mörg þeirra laga sem kórkonur hafa æft fyrir söngferðalag sem farið verður til Ítalíu í júní næst komandi en þangað er ferðinni heitið til þess að syngja í tveimur borgum í Suður-Týról og njóta um leið menningar og stórbrotins landslags í ítölsku Ölpunum.

Í þeim hluta Ítalíu sem Kvennakór Hafnarfjarðar sækir heim er töluð þýska jafnt sem ítalska og það er skemmtilegt að geta þess að kórinn var svo heppinn að fá í hendur fallega, þýska þýðingu af Maístjörnu Halldórs Laxness. Hún verður að sjálfsögðu með í farteskinu til Ítalíu og á vortónleikunum í Hásölum mun kórinn frumflytja fyrsta erindi hennar.

Það verður komið víða við í lagavali á vortónleikunum og eins og oft áður er það ástin og kærleikurinn sem er kórkonum ofarlega í huga. Lagavalið er fjölbreytt, má þar nefna tónlist frá endurreisnartímabilinu, íslensk og norræn sönglög og gospelsöngva. Kórkonur létu ekki hjá líða að spreyta sig aðeins á ítölskunni fyrir Ítalíuferðina og að sjálfsögðu verða nokkur ítölsk lög á efnisskránni.

Stjórnandi Kvennakórs Hafnarfjarðar er Erna Guðmundsdóttir og píanóleikari er Antonía Hevesi.

Miðar verða seldir á 2.500 kr. og fer miðasala fram hjá kórkonum og við innganginn. Einnig má senda tölvupóst á kvennakor.hafnarfjardar@gmail.com eða skilaboð á Facebook síðu kórsins.

Frítt er fyrir börn 12 ára og yngri.

Tónleikagestum verður boðið að þiggja kaffi og konfekt í tónleikahléi.

Vortónleikar Jórukórsins 2017 verða haldnir í Skálholtsdómkirkju þann 3. maí kl. 20.00 og Selfosskirkju þann 7. maí kl. 20.00.

Í ár er áhersla lögð á íslensk ljóð og lög, bæði gömul og ný og sum alveg splunkuný. Stefán Þorleifsson kórstjóri hefur samið lög við ljóð eftir skáldkonurnar Gerði Kristnýju, Elísabetu Jökulsdóttur og Evu Rún Snorradóttur. Ljóð skáldkvennanna þriggja fjalla meðal annars um Bravóblöð, auglýsingabæklinga og kramin kattarhræ, en einnig dýpri leyndarmál, kleinur og pilluát. Efnisskráin í ár er mjög metnaðarfull og auk fyrrnefndra laga verða á efnisskrá gamalkunn þjóðlög og íslensk dægurlög eftir Ásgeir Trausta, Gunnar Þórðarson og Björk, svo einhver séu nefnd.

Mannauður kórsins verður nýttur til fullls, því ekki er nóg með að Stefán útsetji og semji lög sérstaklega fyrir kórinn, heldur eru einsöngvarar og hljóðfæraleikarar einnig úr röðum kórsins, ásamt Ingibjörgu Erlingsdóttur á kontrabassa.

Það er því með sérstakri tilhlökkun og gleði sem Jórukórinn býður bæjarbúa og nærsveitarfólk velkomið á vortónleika Jórukórsins 2017 og vonast til að sjá sem flesta. Miðasala við innganginn og í forsölu hjá kórkonum.

Með vorkveðju

Jórukórinn