Landssamband íslenskra Kvennakóra

Loksins, loksins er Kvennakórinn í Kaupmannnahöfn búinn að gefa út disk. Kórinnn átti 10 ára afmæli á síðasta starfsári og réðist af því tilefni í upptökur og útgáfu á geisladsiknum Yfir heim eða himin - in coeli et in terra.

Diskurinn inniheldur eins og titillinn gefur til kynna, bæði andleg og veraldleg verk og eru flest verkanna skrifuð eða útsett á síðustu 20 árum, fyrir einmitt þessa raddskipan. Mest er um íslensk verk en okkur þótti tilhlíðilegt einnig að kynna fyrir ykkur nokkur úrvalsverk eftir dönsk tónskáld. Auk þess er á disknum verk eftir Nínu Björk Elíasson, sem samið var sérstaklega fyrir kórinn af tilefni 200 ára afmælis Jónasar Hallgrímssonar í fyrra. Segja má að efnisvalið sé ætlað til að sýna bæði hvað okkur fynnst gaman að fást og eins hvað í okkur býr.

Upplýsingar verða sendar fljótlega á póstlista Gígjunnar um það hvernig hægt er að nálgast diskinn.

Laugardaginn 22. nóvember safnaðist fríður flokkur kvenna úr Kvennakór Suðurnesja ásamt fjölskyldum sínum saman í mötuneyti Slippsins í Njarðvík í þeim tilgangi að búa til laufabrauð, en það er árleg fjáröflun Kvennakórs Suðurnesja.

Það er alltaf góð stemmning þegar kórinn fer í laufabrauðsgerð, mikið spjallað og hlustað á tónlist og fær jólatónlistin að fljóta með þó aðventan sé ekki byrjuð, því það að gera laufabrauð tilheyrir náttúrulega jólaundirbúningnum.  Allt gekk þetta vel, þær fyrstu mættu kl. 9 um morguninn og var byrjað að skera út, en steikingunni seinkaði aðeins þar sem feitin sem var pöntuð kom ekki með kökunum og varð því að redda því öðruvísi.  Sigurjón bakari bjargaði því og var byrjað að steikja á fullu um ellefuleytið. 

Mætingin var góð og því var búið að skera allt út fyrir fjögur og búið að steikja fyrir fimm, alls 1200 kökur sem margar hverjar voru listaverk, svo flottur var útskurðurinn. Laufabrauðin hjá kvennakórnum eru geysilega vinsæl og þykja mjög góð, enda seldust þau upp á nokkrum dögum.

Kvennakórinn Vestfirsku valkyrjurnar syngja á jólatónleikum 8. desember í Ísafjarðarkirkju.

Söngvasveigur á aðventu nefnast tónleikar sem fara fram í Ísafjarðarkirkju 8. desember kl. 20. Á dagskrá er fjölbreyttur tónlistarflutningur, kórsöngur og hörpuhljómar. Flytjendur á tónleikunum eru Sophie Schoonjans, harpa, Barnakór Tónlistarskóla Ísafjarðar, Stúlknakór Tónlistarskóla Ísafjarðar, Kvennakórinn Valkyrjurnar, Helga Margrét Marzellíusardóttir, sópran, Arna Björk Sæmundsdóttir, alt. Meðleikarar auk Sophie eru Hulda Bragadóttir, píanó/orgel og Jónas Tómasson, flauta.

Stjórnandi tónleikanna er Bjarney Ingibjörg Gunnlaugsdóttir.

Á dagskránni eru hugljúf jólalög og kórverkið „A Ceremony of Carols“ eftir Benjamin Britten. Einnig leikur Sophie Schoonjans einleik á hörpuna.

Aðgangseyrir er 1.000 krónur en ókeypis fyrir börn 12 ára og yngri.

Heimild

Hin geysivinsælu dagatöl Kvennakórs Hornafjarðar líta dagsins ljós á Jólamarkaðsdegi Hornfirðinga laugardaginn 6. desember kl. 10.00 að staðartíma.

Þetta er í fjórða skipti sem dagatölin koma út og má með sanni segja að kórkonum hafi tekist vel upp að þessu sinni. Ljósmyndari er eins og í öll hin skiptin, Sigurður Mar. Mikil leynd hvílir yfir dagatalinu og verður ekki gefið upp hvernig  konurnar mynduðust að þessu sinni, það eina sem hægt er að segja á þessu stigi er að þær mynduðust ákaflega vel.

Dagatalið verður selt á jólamarkaðsdegi Hornfirðinga, laugardaginn 6. desember. Kórkonur ætla einnig að bjóða gestum og gangandi uppá kakó og heitar vöfflur með rjóma. Mikið húllumhæ er á þessum árlega jólamarkaði og hefur Kvennakór Hornafjarðar ekki látið sitt eftir liggja. 

Dagatölin kosta kr. 2000,- eins og fyrri ár og hafa því ekki hækkað í kreppunni eins og svo margt annað. Með þessu móti vill Kvennakórinn koma til móts við velunnara sína og bjóða þeim dagatölin á hagstæðu verði. Dagatölin má nálgast hjá kórkonum og þær eru ansi liðlegar við að senda hvert á land sem er.

Myndin með þessari frétt er forsíðan af 2007 dagatalinu.