Landssamband íslenskra Kvennakóra

Þann 20. nóvember síðast liðinn voru Menningarverðlaun Reykjanesbæjar 2008 afhent. Að venju voru það tveir aðilar sem hlutu verðlaunin og að þessu sinni voru það Kvennakór Suðurnesja og Leikfélag Keflavíkur. Bæði félög héldu nýverið upp á 40 ára afmæli, Leikfélagið í fyrra og Kvennakórinn í febrúar á þessu ári.
 
Menningarverðlaunin eru afhent árlega einstaklingum, félagasamtökum eða fyrirtækjum sem hafa unnið að eflingu menningarlífs í bænum. Verðlaunagripurinn er í formi grips sem listamaðurinn Karl Olsen úr Reykjanesbæ hannaði og smíðaði.  Má þar sjá Súluna, sem er í merki bæjarins, gerða úr málmi, og er hún fest á stein úr landi Reykjanesbæjar.  Árið 2005 gerði listakonan Elísabet Ásberg nýjan grip. Þar má einnig sjá Súluna en nú aðeins sem höfuð sem gert er úr silfri og fest á lítinn stöpul úr steini. Einnig er afhent undirritað og innrammað verðlaunaskjal.
 
Mikil gróska hefur verið í starfi Kvennakórs Suðurnesja undanfarið en hann hélt upp á fjörutíu ára afmæli á þessu ári eins og áður sagði. Kórinn tók þátt í alþjóðlegri kórakeppni á Ítalíu í október 2007 með frábærum árangri, þar sem kórinn lenti í gullflokki. Í febrúar voru síðan haldnir glæsilegir afmælistónleikar í sal Íþróttaakademíunnar ásamt Léttsveit Tónlistarskólans í Reykjanesbæ og einsöngvurunum Bjarna Thor og Dagný Jónsdóttur, stjórnanda kórsins. Kórinn tók þátt í landsmóti kvennakóra sem haldið var á Höfn í Hornafirði í apríl. Auk þess söng kórinn í Ráðhúsi Reykjavíkur á Menningarnótt 2008 og í Duushúsum á Ljósanótt í Reykjanesbæ og við fleiri tækifæri.

Á myndinni er Erla Arnoddsdóttir formaður Kvennakórs Suðurnesja með verðlaunagripinn.

Aðventutónleikar Sinfóníuhljómsveitar Norðurlands verða í Íþróttahúsi Glerárskóla laugardaginn 6. desember kl. 18:00.

Með hljómsveitinni koma fram  söngvararnir Dísella Lárusdóttir og Jóhann Smári Sævarsson ásamt
Kvennakór Akureyrar undir stjórn Jaan Alavere. Kórinn mun meðal annars flytja tvö lög efir Jaan.
Einleikur á trompet annast Vilhjálmur Ingi Sigurðarson.

Stjórnandi tónleikanna er Guðmundur Óli Gunnarsson

Miðasala: Penninn Eymundsson, Hafnarstræti Akureyri og Hamar félagsheimili Þórs við Skarðshlíð

Miðaverð kr. 2.500.-

Vefsetur Kvennakórs Akureyrar

Vefsetur Sinfóníuhljómsveitar Norðurlands

Styrktartónleikar Kvennakórs Akureyrar fyrir Mæðrastyrksnefnd Akureyrar sem haldnir voru sunnudaginn 30. nóvember tókust afar vel.  Húsfyllir var í Akureyrarkirkju og var góður rómur gerður að söng  kóranna þriggja sem þar komu fram.

Í lok tónleikanna var fulltrúi Mæðrastyrksnefndar, Jóna Berta Jónsdóttir kölluð upp og henni færður afraksturinn kr. 500 þúsund. Þess má geta að aldrei fyrr hefur safnast svona vel eins og á þessum sjöttu styrktartónleikum.

Kvennakór Akureyrar vill færa öllum þeim sem sóttu tónleikana bestu þakkir fyrir góða þáttöku, án ykkar hefði þetta ekki verið mögulegt.  Sömuleiðis bestu þakkir til Karlakórs Akureyrar Geysis, Söngfélagsins Sálubótar, stjórnenda, undirleikara, auglýsenda og Akureyrarkirkju fyrir þeirra framlag.

Eftirfarandi frétt eftir Bergþóru Jónsdóttur blaðamann birtist í Morgunblaðinu þriðjudaginn 2. desember 2008. Myndin er tekin af Golla ljósmyndara Morgunblaðsins af Kvennakór Reykjavíkur að flumflytja lag Jóns Ásgeirssonar "Ég heyrði þau nálgast" 

Gígjan, landssamband íslenskra kvennakóra, stofnar tónverkasjóð.
Meira en þúsund konur í 28 kórum Gígjunnar.
Hildigunnur Rúnarsdóttir semur næsta verk.

Um helgina frumfluttu átta kvennakórar á Íslandi nýtt kórverk, samið af Jóni Ásgeirssyni tónskáldi. Kórarnir eru allir í Gígjunni, landssambandi íslenskra kvennakóra, og það var fyrir tilstilli tónverkasjóðs Gígjunnar, að Jón var fenginn til að semja verkið “Ég heyrði þau nálgast” við ljóð eftir Snorra Hjartarson.

Vildu strax láta semja fyrir sig
Dagbjört Sigurbergsdóttir er formaður Gígjunnar. “Gígjan var stofnuð árið 2003 í þeim tilgangi að sameina kvennakórana í landinu og styrkja þá, til dæmis með kvennakóramótum, sem við höldum þriðja hvert ár. En það var okkur strax hugleikið að tengja kórana í sameiginlegu markmiði eins og því að láta semja kórverk fyrir þá, einu sinni á ári, eða um það bil.”

Með útgáfu á kórsöng á plötum eiga kvennakórarnir tilkall til endurgreiðslu úr sjóðum Sambands flytjenda og hljómplötuframleiðenda, og segir Dagbjört að þær endurgreiðslur fari allar í tónverkasjóðinn, sem var formlega stofnaður nú í haust. Félagsgjöld í Gígjunni séu það lág, að þau rétt dugi til að halda úti vefsetri sambandsins, og því hafi þurft sérstakt fé í þetta verkefni. Stofnfé var 420 þúsund krónur, og skal sjóðurinn notaður til kaupa á nýjum tónverkum. Um markmið sjóðsins segir í stofnskrá: “Þannig mun sjóðurinn efla fjölbreytni og úrval tónlistar sem kvennakórar eiga kost á að flytja. Gert er ráð fyrir að kórarnir flytji verkið hverju sinni, hver í sinni sveit á svipuðum tíma, t.d. í kringum 24. október (afmæli kvennafrídagsins), 8. mars (alþjóðlegan baráttudag kvenna), 19. júní (afmæli kosningaréttar íslenskra kvenna) eða um jól og páska.”

Að sögn Dagbjartar var einróma samþykkt á aðalfundi Gígjunnar að stofna tónverkasjóðinn. “Verk Jóns Ásgeirssonar er fyrsta verkið sem við látum semja fyrir okkur, og við erum þegar farnar af stað að velja næstu tónskáld.”  

Öflugt menningarstarf
Dagbjört segir að Gígjan hafi nánast enga styrki fengið til starfsemi sinnar. “Það hefur verið okkur þrándur í götu starfsemi Gígjunnar, að menntamálaráðuneytið skuli ekki hafa verið tilbúið til að styrkja okkur neitt. Þess vegna er það ekki síður ánægjulegt að þetta verkefni skuli vekja athygli. Það er virkilega öflugt menningarstarf sem á sér stað hjá kvennakórum landsins. Þetta eru félög sem hafa algjörlega staðið undir sér sjálf og öll vinna er sjálfboðavinna. Það er mikilvægt fyrir okkur að ná kórunum saman á þessum grundvelli til að gera okkur sterkari sem heild. Kórana hefur sárlega vantað ný verk, sérsamin fyrir þá, og mesti styrkur okkar er að geta gert þetta.”

Verk Jóns var að sögn Dagbjartar krefjandi og afar fagurt. “Það er spennandi fyrir okkur að takast á við slík verk, sérstaklega samin fyrir kvennaraddir, og allt öðru vísi og betra en þegar verið er að útsetja önnur verk fyrir kvennakóra. Þetta finnst mér eitt það merkilegasta sem við höfum gert í Gígjunni.”

Það er stjórn Gígjunnar sem ákveður hvaða tónskáld eru beðin um að semja, en hefur til hliðsjónar ábendingar frá kórstjórum og formönnum kóranna. “Jón er þekktur að því að hafa samið mikið fyrir kvennakóra og þess vegna var hann valinn fyrstur. Næsta tónskáld sem við leitum til er Hildigunnur Rúnarsdóttir.”  

Morgunblaðið 02.12.2008 bls. 34 (menning)