Landssamband íslenskra Kvennakóra

Föstudaginn 5. desember næstkomandi klukkan 20.30 munu fimm kórar úr Rangárvallasýslu halda sameiginlega aðventutónleika á Laugalandi í Holtum.

Kórarnir sem fram koma eru Samkór Rangæinga undir stjórn Kristínar Sigfúsdóttur, Hringur kór eldriborgara í Rangárvallasýslu undir stjórn Haraldar Júlíussonar, Kvennakórinn Ljósbrá undir stjórn Eyrúnar Jónasdóttur, Sönghópurinn Góðir grannar einnig undir stjórn Eyrúnar Jónasdóttur og Stúlknakórinn Hekla undir stjórn Nínu Maríu Morávek. Undirleikari á tónleikunum er Arnhildur Valgarðsdóttir

Flutt verður fjölbreytt jólatónlist úr öllum áttum.  Kórarnir munu syngja sitt í hvoru lagi og einnig sameinast í glæsilegan stóran kór og flytja nokkur af þekktustu og hátíðlegustu jólalögum okkar tíma. Einsöngvari með stórkórnum er Hermundur Guðsteinsson
 
Kvennakórinn mun frumflytja jólalag Jóns Ásgeirssonar Jólanótt með texta eftir Þorstein Valdimarsson sem var samið fyrir aðildarkóra Gígjuna, samband íslenska kvennakóra.

Boðið verður uppá heitt kakó og smákökur í hléi. Vonumst til að sem flestir sjái sér fært að koma og eiga saman notalega kvöldstund.  Aðgangseyrir er kr. 1500, frítt fyrir 16 ára og yngri og kr. 1000 fyrir eldri borgara og öryrkja.

Eftirfarandi grein eftir Helga blaðamann birtist í Morgunblaðinu mánudaginn 1. desember 2008. Myndin er tekin af Golla ljósmyndara Morgunblaðsins af skáldinu taka á móti blómvendi frá Sigrúnu Þorgeirsdóttur stjórnanda Kvennakórs Reykjavíkur 
 

KVENNAKÓRAR frumfluttu í gær nýtt jólalag eftir Jón Ásgeirsson tónskáld í átta kirkjum víðsvegar um landið.

KVENNAKÓRAR frumfluttu í gær nýtt jólalag eftir Jón Ásgeirsson tónskáld í átta kirkjum víðsvegar um landið. Lagið samdi Jón við ljóð eftir Snorra Hjartarson, „Ég heyrði þau nálgast“, að ósk kvennakóra landsins, í tilefni áttræðisafmælis hans 11. október sl.

Mikil gróska er í starfi kvennakóranna í landinu. Nú eru 28 kórar starfandi, með á annað þúsund félaga. Gígjan, landssamband kvennakóra, stofnaði tónverkasjóð fyrir skömmu. Honum er ætlað að efla og styrkja kvennakóra, meðal annars með því að fá tónskáld til að semja tónverk fyrir kórana. Jólalag Jóns Ásgeirssonar er fyrsta verkið sem tónverkasjóðurinn kostar.

Kvennakórarnir fluttu lagið í gær í Ytri-Njarðvíkurkirkju, Kópavogskirkju, Vídalínskirkju kl. 11 og kl. 20, Fríkirkjunni í Hafnarfirði, Bústaðakirkju, Breiðholtskirkju og Seljakirkju. Tónskáldið var viðstatt þegar Kvennakór Reykjavíkur söng lagið í Breiðholtskirkju.

Morgunblaðið 01.12.2008 bls. 34 (innlendar fréttir)

Kvennakór Garðabæjar heldur sína árlegu aðventutónleika mánudaginn 8. desember í Digraneskirkju og hefjast tónleikarnir kl. 20.00.

Að þessu sinni rennur allur ágóði af tónleikunum til Garðabæjardeildar Rauða krossins, í sérstakan sjóð fyrir aðstoð innanlands. Með þessu vill kórinn leggja sitt af mörkum til aðstoðar þeim fjölmörgu sem bágstaddir eru eftir að aðstæður breyttust skyndilega á haustdögum. Til þess að gera sem flestum kleift að sækja tónleikana er verði aðgöngumiða mjög í hóf stillt; 1500 kr. í forsölu og fyrir lífeyrisþega en 1800 kr. við inngang. Á móti er öllum kostnaði haldið í lágmarki og áherslan fyrst og fremst lögð á fagmennsku, fegurð og hátíðleika í flutningi tónlistar.

Efnisskráin er einkar geðþekk blanda af léttum, sígildum jólaperlum og hátíðlegri verkum. Af þeim fyrrnefndu má t.d. nefna Hin fyrstu jól Ingibjargar Þorbergs, sem að margra áliti er fegursta íslenska jólalagið, Yfir fannhvíta jörð sem Pálmi Gunnarsson gerði ódauðlegt um árið og Hvít jól sem í hugum fjölmargra er jólalag allra tíma.  Af þeim síðarnefndu mætti nefna Gloriu eftir Antonio Vivaldi en hluti úr því undurfagra verki er á efnisskrá tónleikanna. Er þá fátt eitt talið af efnisskránni sem studd verður af lúðrablæstri og djasssveiflu. Síðast en ekki síst mun kórstjórinn Ingibjörg Guðjónsdóttir, ein af ágætustu sópransöngkonum landsins, syngja einsöng með kórnum.

Garðbæingar og aðrir eru hvattir til að fjölmenna á tónleikana og styrkja göfugt málefni en njóta um leið ljúfrar og hátíðlegrar tónlistar í amstri dagsins.

Forsölumiðar fást hjá kórkonum og einnig er tekið við pöntunum á kvennakor(hjá)kvennakor.is. Upplýsingar um Kvennakór Garðabæjar er að finna á heimsíðu kórsins: www.kvennakor.is

Vefsetur sambandsins er í stöðugri þróun og stjórn Gígjunnar er sífellt að leita nýrra leiða til þess að gera það öflugra. Við vekjum athygli á nýrri undirsíðu sem nú hefur verið opnuð. Hana er að finna vinstra megin á síðunni og heitir hún Tónleikar.

Nýja síðan hefur að geyma upplýsingar um tónleika aðildarkóranna í tímaröð, en til að fá frekari upplýsingar um ákveðna tónleika er einfaldlega smellt á nafn kórs og þá opnast fréttatilkynning um tónleikana. Það er von okkar að þetta nýtist þeim sem þurfa að fá yfirlit yfir alla tónleika sem framundan eru.

Allar ábendingar um vefsetrið, það sem betur má fara eða nýjar hugmyndir má senda á netfang sambandsins.