Landssamband íslenskra Kvennakóra

Kvennakórinn Léttsveit Reykjavíkur heldur sína árlegu jólatónleika í Bústaðakirkju þriðjudaginn 9. desember og fimmtudaginn 11. desember. Tónleikarnir hefjast kl. 20:00

Á dagskrá verða íslensk og erlend jólalög, m.a. verður flutt nýtt jólalag eftir Jón Ásgeirsson sem hann samdi sérstaklega fyrir alla kvennakóra landsins.

Einsöngvarar með kórnum verða Bjarni Thor Kristinsson og Aðalheiður Stefánsdóttir. Undirleikarar eru Kristín Jóna Þorsteinsdóttir á trommur og Tómas R. Einarsson á bassa. Píanóleikari er Aðalheiður Þorsteinsdóttir.
Stjórnandi kórsins er Jóhanna V. Þórhallsdóttir.

Miðaverð á jólatónleikana er kr. 2000. Miðar eru seldir hjá kórkonum og við innganginn.
Einnig er hægt að panta miða í síma 897-1885 eða senda tölvupóst á lettsveit - midasala(hjá)googlegroups.com

Léttsveitin er hundrað kvenna kór sem hefur starfað í Reykjavík í 13 ár og hefur haldið fjölda tónleika hér á landi og víða um heim

Jólatónleikar Kyrjanna verða haldnir fimmtudaginn 4. desember, kl. 20:00 í Seltjarnarneskirkju.

Kveikt er ljós við ljós er yfirskrift jólatónleika Kyrjanna að þessu sinni. Dagskráin er afar falleg og hátíðleg og er það von okkar og trú að hún muni veita birtu inn í hugi og hjörtu þeirra sem á hlýða.

Stjórnandi Kyrjanna er Sigurbjörg Hvanndal Magnúsdóttir og píanóleikari er Halldóra Aradóttir.

Miðasala verður við innganginn, verð 1500 kr.

Með jólakveðju,
Kyrjurnar

Freyjukórinn boðar til aðventutónleika í Borgarneskirkju sunnudagskvöldið 30. nóvember kl. 20.00 að staðartíma. 

Stjórnandi kórsins er Zsuzanna Budai.

Fjölbreytt (og að sjálfsögðu jólaleg) dagskrá fyrir allar tegundir áhorfenda. 
Miðaverð er aðeins kr. 1.500.- íslenskar krónur. Frítt fyrir 14 ára og yngri. Athugið að ekki er tekið við kortum (ekki einu sinni jólakortum). 

Komið og látið Freyjukórinn í Borgarfirði koma ykkur í jólaskap.

Sunnudaginn þann 30. nóvember kl. 16.00 verða haldnir jólatónleikar í Akureyrarkirkju til styrktar Mæðrarstyrksnefnd Akureyrar. Kvennakór Akureyrar hefur undanfarin ár staðið fyrir sams konar tónleikum til þess að gefa fólki tækifæri til að láta gott af sér leiða og styrkja þá sem lítið hafa milli handanna. 

Í ár er þetta sérstaklega nauðsynlegt þar sem víða er samdráttur og fjöldi fólks hefur misst vinnuna. Andi jólanna felst ekki síst í því að gefa þeim sem þurfa og ekki er verra að geta um leið notið þess að hlusta á þrjá stóra kóra flytja jólalög.

Í þetta skipti hefur Kvennakór Akureyrar fengið til liðs við sig Karlakór Akureyrar Geysi og Söngfélagið Sálubót. Kórarnir flytja hver sína dagskrá og syngja síðan tveir og loks þrír saman.  Stjórnandi Kvennakórs Akureyrar og Söngfélagsins Sálubótar er Jaan Alavere en stjórnandi Karlakórs Akureyrar Geysir er Valmar Väljaots. Undirleikarar á píanó eru stjórnendurnir Jaan Alavere og Valmar Väljaots og að auki Tarvo Nómm á bassa.

Þetta er í fimmta skiptið sem tónleikar sem þessir eru haldnir. Í fyrra safnaðist vel og er það einlæg von kóranna að fólk sjái sér fært að eiga notalega stund í Akureyrarkirkju og að styrkja um leið mjög gott málefni.

Verð aðgöngumiða er 1500 kr. fyrir fullorðna, ekkert gjald er fyrir börn, en frjáls framlög eru einnig vel þegin. Í lok tónleikanna verður að venju afraksturinn færður óskiptur Mæðrastyrksnefnd Akureyrar. Allir sem að tónleikunum koma, þ.e. tónlistarfólkið, auglýsendur og Akureyrarkirkja, leggja sitt af mörkum til að styrkja þetta málefni.

Tónleikarnir eru sunnudaginn 30. nóvember í Akureyrarkirkju og hefjast kl. 16.00.