Landssamband íslenskra Kvennakóra

Árleg Haustvaka Kvennakórs Garðabæjar, menningarvaka í tali og tónum, verður haldin föstudaginn 31. október kl. 20.00 í Safnaðarheimilinu Kirkjuhvoli. Eins og mörg undanfarin ár mun Kristín Helga Gunnarsdóttir rithöfundur stjórna Haustvökunni. Aðrir listamenn úr Garðabæ munu einnig koma fram, auk kórsins. Að venju verður heimilisleg kaffihúsastemmning ríkjandi á vökunni. Gestir sitja við dúkuð borð og kertaljós, boðið verður upp á gosdrykki, rjúkandi kaffi og að sjálfsögðu heimagert meðlæti kórkvenna sem farnar eru að blaða ákaft í smákökuuppskriftum. Kórstjóri og jafnframt stofnandi kórsins er Ingibjörg Guðjónsdóttir sópransöngkona og píanóleikari er Sólveig Anna Jónsdóttir. Boðið verður upp á fjölbreytta söngdagskrá. Aðangseyrir er sá sami og undanfarin ár eða 1500 kr. og 1200 kr. fyrir lífeyrisþega og ungmenni 12 ára og yngri.

Í mörg horn að líta

Haustið hefur verið afar viðburðaríkt og skemmtilegt hjá Kvennakór Garðabæjar. Þann 16. september söng kórinn í Perlunni fyrir um sex hundruð gesti á hátíðarsamkomu Vestnorræna ráðsins.
Sunnudaginn 19. október var haldinn hátíðlegur Menningardagur Kjalarnessprófastsdæmis í flestum kirkjum prófastsdæmisins. Kórinn tók af því tilefni þátt í samkomu í Garðakirkju og söng þekkt trúarleg verk og einnig nokkur veraldleg.

Þá söng kórinn, ásamt fimm öðrum gestakórum, í 50 ára afmælisfagnaði  Kórs Átthagafélags Strandamanna, í Langholtskirkju laugardaginn 25. október sl. Flutti hver kór  sína efnisskrá en einnig var myndaður einn stór kór sem flutti falleg, íslensk kórlög. Það var Kvennakór Garðabæjar sönn ánægja að fá að samgleðjast átthagafélagskórnum fimmtuga á þessum tímamótum.

Að Haustvöku lokinni munu æfingar hefjast af krafti fyrir tvenna hátíðlega aðventutónleika sem haldnir verða í Digraneskirkju snemma í desember. Áður en að þeim kemur mun kórinn þó að sjálfsögðu frumflytja við messu í Vídalínskirkju fyrsta sunnudag í aðventu, eins og aðrir kvennakórar landsins í sínum kirkjum, afmælislag Jóns Ásgeirssonar við undurfagurt ljóð Snorra Hjartarsona, Ég heyrði þau nálgast.

Á næsta aðalfundi Gígjunnar 18. október flytur Helgi Gunnarsson fjármálastjóri UMFÍ erindið "Hlutverk stjórna í kórum í þeim tilgangi að efla starf þeirra".

Í erindi sínu mun hann m.a. koma inn á málefnin; umhverfi og umgjörð stjórna, dreifing valds og ábyrgðar, góða stjórnunarhætti, hlutverk nefnda og samstarf þeirra við stjórn svo nokkur atriði séu nefnd. Þetta fræðsluerindi er undir liðnum önnur mál og boðið verður upp á umræður á eftir.

Margar konur eru e.t.v ekki meðvitaðar um hlutverk stjórna í sínum kór og sumar taka að sér stjórnarsetu með litla reynslu á því sviði. Þetta erindi mun vonandi gefa innsýn inn í starf stjórna og þeirra mikilvæga hlutverk í hverjum kór.

Aðildarkórar Gígjunnar geta sent eins marga fulltrúa til fundarins og þeir vilja.

Laugardaginn 18. október á milli kl. 17:00 og 19:00 verður aðalfundur Gígjunnar haldinn í Söngskólanum Domus Vox, Laugavegi 116, 105 Reykjavík. Aðildarkórar Gígjunnar eru hvattir til þess að senda stjórnir og stjórnendur sína á fundinn. Við viljum vekja sérstaklega athygli á að hver kór getur sent eins marga fulltrúa og hann lystir á fundinn. Tveir fulltrúar hvers aðildarkórs hafa atkvæðisrétt á aðalfundi samkvæmt lögum Gígjunnar. Aðildarkórar eru hvattir til að koma með tilnefningar í tengslum við stjórnarkjör, því lögum samkvæmt á að kjósa um tvo fulltrúa í aðalstjórn og þrjá fulltrúa í varastjórn sambandsins. Sérstök athygli er vakin á því að stjórnin leggur til breytingar á árgjaldi sambandsins og leggur einnig fram skipulagsskrá fyrir tónverkasjóð Gígjunnar. Þessar upplýsingar hafa verið sendar aðildarkórum í fundarboði. Sjáumst hress og kát á aðalfundinum.

Dagskrá aðalfundar Gígjunnar er sem hér segir:
1) Skýrsla stjórnar.
2) Reikningar
3) Umræða um skýrslu og reikninga
4) Tillögur og lagabreytingar
5) Ákvörðun árgjalds
6) Kosning formanns
7) Kosning stjórnar og varamanna
8) Kosning tveggja skoðunarmanna reikninga
9) Önnur mál.
Helgi Gunnarsson, fjármálastjóri UMFÍ flytur erindið
“Hlutverk stjórna í kórum í þeim tilgangi að efla starf þeirra”.

Kvennakór Akureyrar heldur útgáfutónleika sína í Lóni við Hrísalund á Akureyri föstudaginn 10. október kl. 21:00. Sungin verða lög af nýja diskinum "Sólardans á vori" ásamt öðru nýju efni. Við þetta tækifæri kveður kórinn stjórnandann Arnór vilbergsson og fagnar nýjum stjórnanda Jaan Alavere og munu þeir skipta með sér kórstjórn og undirleik á tónleikunum. Komið og fagnið með okkur, takið þátt í frábærri skemmtun og eignist diskinn á gjafverði. Húsið opnar kl. 20:00. Miðaverð kr. 1.000.- Miði og diskur kr. 2.700.-