Landssamband íslenskra Kvennakóra

Sunnudaginn 3. desember kl. 20 halda Jórukórinn og Karlakór Selfoss sameiginlega jólatónleika í Menningarverstöðinni Hólmaröst á Stokkseyri. Kórarnir munu syngja hvor í sínu lagi og einnig nokkur lög sameiginlega. Á efnisskránni eru þekkt og sívinsæl jólalög. Stjórnandi Jórukórsins er Hlín Pétursdóttir og stjórnandi Karlakórs Selfoss er Loftur Erlingsson. Aðgangseyrir að tónleikunum er kr. 1500 og eru miðar seldir við innganginn. Aðgangur ókeypis fyrir börn. Á tónleikunum munu einnig koma fram strengjasveit frá Tónlistarskóla Árnessýslu undir stjórn Guðmundar Kristmundssonar og stúlknatríóið Perlurnar sem syngja nokkur jólalög. Sunnudaginn 10. desember mun Jórukórinn aftur koma fram á tónleikum á þá í Selfosskirkju þar sem haldnir verða sameiginlegir tónleikar allra kóra og hljómsveita á svæðinu.

Föstudaginn 8. desember kl 20:00 verður Freyjukórinn ásamt ungu fólki úr Borgarfirði með jólatónleika og skemmtun í Reykholtskirkju. Stjórnandi tónleikanna er Zsuzsann Budai en fjöldi ungs fólks og ýmsir tónlistarmenn mun koma fram á þessum tónleikum með Freyjunum.Kátt er um jólin !
Freyjukórinn sem nú samanstendur af um 25 konum undir stjórn Zsuzsönnu Budai mun halda jólaskemmtunina - Kátt er um jólin. Fjöldi jólalaga verður á dagskrá, m.a. verður fluttur nýr íslenskur jólatexti „Eitt lítið jólatré“ eftir Ásdísi Ingimarsdóttur kennara í Grunnskólanum í Borgarnesi í útsetningu Gunnars Ringsted og nýlegur jólatexti „Vísa á jólakvöldi“ sem þýddur er af Bjarna Guðmundssyni á Hvanneyri. Undirleikari Freyjanna verður Ástríður Haraldsdóttir. Fjöldi ungs fólks mun auk þess spila og syngja með Freyjunum. Þar má nefna systurnar Ástu og Unni Þorsteinsdætur frá Fróðastöðum, Önnu Sólrúnu Kolbeinsdóttur frá Stóra Ási, Daníel Einarsson frá Borgarnesi, Aðalheiði Karlottu Guðlaugsdóttur frá Hvanneyri og Þorgerði Ólafsdóttur frá Sámsstöðum. Fluttar verða örsögur og verður bryddað uppá fjölbreyttum undirleik þar sem fiðlur, trommur og ekki síst steinharpa Páls á Húsafelli fær að óma. Unnur Halldórsdóttir hótelrekandi og hagyrðingur mun sjá um að kynna dagskráliði og skreyta dagskrána að eigin hætti.

“Tendrum ljós á tré” er yfirskrift glæsilegra aðventutónleika sönghússins Domus Vox sem haldnir verða í Hallgrímskirkju 12. og 13. desember. Á tónleikunum koma fram undir stjórn Margrétar J. Pálmadóttur rúmlega 200 söngkonur á öllum aldri ásamt einsöngvara og hljóðfæraleikurum. Kórarnir sem taka þátt í þessum tónleikum eru: Vox feminae, Vox junior, Stúlknakór Reykjavíkur og Gospelsystur Reykjavíkur. Einsöngvari tónleikanna er sópransöngkonan Hanna Björk Guðjónsdóttir. Báðir tónleikarnir hefjast kl. 20.00. Forsala aðgöngumiða er hjá kórfélögum og í sönghúsinu Domus Vox, Laugavegi 116, mánudaga til fimmtudaga kl. 14-18. Hægt er að kaupa miða í gegnum síma 511 3737 og 893 8060. Miðaverð er kr. 2500 (kr. 2000 í forsölu).

Hinir árlegu aðventutónleikar Kvennakórs Garðabæjar verða haldnir laugardaginn 9. desember kl. 17.00 í Digraneskirkju, einni hljómfegurstu kirkju landsins. Að vanda verður efnisskráin metnaðarfull og hátíðleg en sungin verða mörg þekkt jólalög sem ættu að koma tónleikagestum í sannkallaða jólastemmningu. Sérstakur gestur kórsins að þessu sinni er hinn nýstofnaði Stúlknakór Garðabæjar sem Bára Grímsdóttir stjórnar. Einnig munu hljóðfæraleikarar auka á hátíðleikann. Stjórnandi Kvennakórs Garðabæjar er Ingibjörg Guðjónsdóttir, sópransöngkona og píanóleikari er Kristinn Örn Kristinsson. Aðgangseyrir er 2000 kr. en 1700 kr. í forsölu og fyrir lífeyrisþega. Frítt er fyrir 12 ára og yngri. Forsala aðgöngumiða fer fram í Bókabúðinni Grímu, Garðatorgi og hjá kórkonum. Sjá nánari upplýsingar um kórinn á heimasíðu hans www.kvennakor.is.

Hinir árlegu aðventutónleikar Kvennakórs Garðabæjar verða haldnir laugardaginn 9. desember kl. 17.00 í Digraneskirkju, einni hljómfegurstu kirkju landsins. Að vanda verður efnisskráin metnaðarfull og hátíðleg en sungin verða mörg þekkt jólalög sem ættu að koma tónleikagestum í sannkallaða jólastemmningu. Sérstakur gestur kórsins að þessu sinni er hinn nýstofnaði Stúlknakór Garðabæjar sem Bára Grímsdóttir stjórnar. Einnig munu hljóðfæraleikarar auka á hátíðleikann. Stjórnandi Kvennakórs Garðabæjar er Ingibjörg Guðjónsdóttir, sópransöngkona og píanóleikari er Kristinn Örn Kristinsson. Aðgangseyrir er 2000 kr. en 1700 kr. í forsölu og fyrir lífeyrisþega. Frítt er fyrir 12 ára og yngri. Forsala aðgöngumiða fer fram í Bókabúðinni Grímu, Garðatorgi og hjá kórkonum. Sjá nánari upplýsingar um kórinn á heimasíðu hans www.kvennakor.is.