Landssamband íslenskra Kvennakóra

Kórferðir á Íslendingaslóðir í Vesturheimi hafa löngum verið vinsælar hjá íslenskum kórum enda hafa þeir notið mikillar gestrisni heimamanna.
Ferða- og fræðslunefnd Þjóðræknisfélags Íslendinga hefur séð um að skipuleggja hópferðir í samráði við félög Íslendinga í Vesturheimi en þau eru nú á þriðja tug um gervallt Vestur-Kanada og í mörgum ríkjum Bandaríkjanna. Algengir áfangastaðir íslenskra kóra hafa verið Mountain og Gimli en félagið kappkostar að fjölga áfangastöðum. Íslenskir kórar geta nú farið á Íslendingaslóðir t.d. í San Francisco, Seattle, Vancouver, Edmonton, Calgary, Winnipeg og Minneapolis svo dæmi séu tekin. Eins og gefur að skilja er nauðsynlegt að skipuleggja þessar ferðir með góðum fyrirvara. Þeir kórar sem áhuga hafa á slíkri ferð er bent á að hafa samband við Jónas Þór, tölvupóstfang: jtor@mmedia.is og Jonas.Thor@eu.dodea.edu. Frekari upplýsingar um ÞFÍ, Þjóðræknisfélag Íslendinga má finna á vefsetrinu: http://www.inl.is/

Gígjunni hefur borist bréf frá undirbúningsnefnd Kvennakórs Hafnafjarðar.
Hafnarfirði 4. feb. 2005 Ágætu söngsystur, Ég vil fyrir hönd okkar í undirbúningsnefndinni byrja á því að óska ykkur gleðilegs árs, og þakka ykkur biðlundina. Ég veit að ykkur ef farið að lengja eftir upplýsingum um kóramótið í vor. Eins og fram kom í bréfinu sem við sendum ykkur í haust verður kóramótið haldið dagana 29. apríl – 1. maí 2005. Sameiginleg lög eru í burðarliðnum og verða send ykkur innan hálfs mánaðar. Verið er að gera könnun á gistimöguleikum í bænum þ.e.a.s. gistiheimili, einnig getum við hugsanlega fengið inni í skólastofum ef þið viljið hafa smá útilegustemmingu og koma með svefnpoka og dýnu. Kostnaður við mótið er ekki kominn í ljós, en fljótt á litið verður það líklega svipað og á siðasta landsmóti. Kær kveðja f.h. undirbúningsnefndar Kvennakórs Hafnarfjarðar. Ragna Jóna Helgadóttir ragnajona@visir.is gsm. 966-4140

Árlegur basar Kvennakórs Garðabæjar verður haldinn á Garðatorgi á næsta laugardag en basarinn hefur fyrir löngu skipað sér fastan sess í bæjarlífinu í Garðabæ. Til sölu verður ýmiskonar varningur svo sem eins og heimabakað bakkelsi, bolir, húðvörur og Metta mittisnetta uppskriftarbók kórsins. Allir velkomnir.Frétt frá Kvennakór Garðabæjar
Basar Kvennakórs Garðabæjar hefur nú skipað sér fastan sess í bæjarlífinu. Á nokkurra vikna fresti mæta kórkonur gallvaskar á Garðatorg með heimagert bakkelsi sem þær selja gestum og gangandi. Viðtökurnar hafa verið mjög góðar og oftar en ekki er allt uppselt upp úr hádegi! Áhersla er lögð á að hafa úrvalið sem fjölbreyttast til að bæði þeir sem eru í leit að hollustubita og þá sem langar í eitthvað gúmmelaði finni eitthvað við sitt hæfi. Einnig er til sölu ýmis varningur kórsins, svo sem bolir, húðvörur og uppskriftabók kórsins, Metta mittisnetta. Gaman er að segja frá því að basarinn hefur eignast sinn fasta viðskiptamannahóp, sem kemur ítrekað til að kaupa flatkökurnar og rúgbrauðið hennar Hrefnu og ástarpungana hans Inga hennar Rakelar. Einnig hafa ánægðir viðskiptavinir haft samband og beðið um uppskriftir og lagt fram pantanir fyrir næsta basar! Basarinn er mikilvæg tekjulind fyrir kórinn, ekki síst nú þegar stefnt er á söngferð til Austurríkis og Tékklands næsta sumar. Kvennakór Garðabæjar þakkar velunnurum kærlega fyrir stuðninginn á liðnum árum. Og minnir jafnframt á að næsti basar er laugardaginn 12. febrúar n.k.

Frétt frá Gospelsystrum Reykjavíkur. Margrét J. Pálmadóttir hefur verið sæmd Riddarakrossi hinnar íslensku Fálkaorðu og Riddarakrossi hinnar konunglegu Norðurstjörnu.
Það er okkur, Gospelsystrum Reykjavíkur, ánægjuefni að greina frá því að forseti Íslands, herra Ólafur Ragnar Grímsson sæmdi stjórnandann okkar hana Margréti J. Pálmadóttur Riddarakrossi hinnar íslensku Fálkaorðu 17. júní 2004. Fálkaorðuna hlaut hún fyrir frumkvöðlastarf á sviði tónlistar en Margrét hefur meðal annars stofnað fjölmarga stúlkna- og kvennakóra á starfsferli sínum og unnið þar metnaðarfullt og farsælt starf. Þá sæmdi Karl Gustav XVI. konungur Svía, Margréti, Riddarakrossi hinnar konunglegu Norðurstjörnu í opinberri heimsókn sinni til Íslands í september 2004.