Landssamband íslenskra Kvennakóra

Kvennakór Hornafjarðar heldur sína árvissu jólatónleika miðvikudagskvöldið 9. desember kl. 20:00 í Nýheimum. Kórinn mun syngja bæði jólalög og ýmis önnur hugljúf og falleg lög sem eiga vel við á aðventunni. Að loknum söng geta gestir gætt sér á margrómuðu tertuhlaðborði kvennakórskvenna.
Stjórnandi kórsins er Heiðar Sigurðsson og annast hann jafnframt undirleik ásamt hljómsveit, en í henni eru þeir Bragi Karlsson á trommur, Bjartmar Ágústsson á bassa, Þorkell Ragnar Grétarsson á gítar, Agnar Jökull Imsland Arason á slagverk og Oddleifur Eiríksson á harmoniku.

Miðaverð er 3.000 kr. og 1.500 kr. fyrir 6 - 12 ára, frítt fyrir 5 ára og yngri (tónleikar og kaffihlaðborð). Ath. að ekki er tekið við greiðslukortum.

Árlegir aðventutónleikar Kvennakórs Garðabæjar
verða haldnir í Digraneskirkju miðvikudagskvöldið
9. desember kl. 20.

Að vanda verður efnisskráin fjölbreytt með íslenskum og erlendum jólalögum en mörg laganna eru flestum kunn.

Sérstakur gestur tónleikanna verður Peter Tompkins, óbóleikari. Píanóleikari er Sólveig Anna Jónsdóttir og kórstjóri Ingibjörg Guðjónsdóttir stofnandi Kvennakórs Garðabæjar.

Kaffi og jólasmákökur
Eftir tónleikana er tónleikagestum boðið í hliðarsal að þiggja kaffi og heimabakaðar jólasmákökur í boði kórkvenna. Það er von okkar að þið eigið notalega kvöldstund með okkur í aðdraganda jólanna.

Miðasala er hafin 
Forsöluverð tónleikamiða er 2500 kr. og hægt er að kaupa miða hjá kórkonum eða með því að senda tölvupóst á netfang kórsins: kvennakorgb@gmail.com

Miðar verða einnig seldir við innganginn á 3000 kr.

Með bestu jólakveðju,
Kvennakór Garðabæjar

Kvennakór Garðabæjar er á Facebook:

https://www.facebook.com/kvennakorgb/?fref=ts

Fimmtudaginn 3. desember 2015 syngur Senjórítukórinn ásamt Kvennakór Reykjavíkur jólalög í Breiðholtskirkju kl. 20:00. Ýmis jólalög verða sungin af kórunum bæði í sitthvoru lagi og saman. Heitt súkkulaði eftir tónleikana, samsöngur kóra og gesta.

Stjórnandi er Ágota Joó og við flygilinn verður Vilberg Viggósson.

Frír aðgangur og allir velkomnir!

Kvennakór Hafnarfjarðar heldur jólatónleika í Víðistaðakirkju 3. desember n.k. sem bera yfirskriftina Dansaðu vindur. Gestasöngvarar á þessum tónleikum verða nokkur börn og ungmenni sem öll eiga það sameiginlegt að tengjast kórkonum fjölskylduböndum og munu þau vafalaust ljá tónleikunum skemmtilegan svip.

Á þessu ári eru liðin tuttugu ár frá stofnun Kvennakórs Hafnarfjarðar og var þess minnst á margvíslegan hátt á árinu. Ber þar hæst tvenna glæsilega afmælistónleika sem haldnir voru s.l. vor til þess að fagna þessum tímamótum. Í tilefni af afmælinu lét kórinn einnig hanna og sauma nýja kórkjóla sem vígðir voru á afmælistónleikunum.

Nú á aðventunni er hins vegar komið að hefðbundnum jólatónleikum kórsins en hjá mörgum er það orðinn ómissandi þáttur í undirbúningi jólanna að taka frá stund á aðventunni og hlusta á fallega tónlist sem færir okkur andblæ jólanna. Dagskrá tónleikanna í Víðistaðakirkju verður fjölbreytt en þar mun Kvennakór Hafnarfjarðar flytja hefðbundin jólalög, kirkjulega tónlist og helgikvæði í bland við nútímalega jólasöngva.

Stjórnandi Kvennakórs Hafnarfjarðar er Erna Guðmundsdóttir. Píanóleikur er í höndum Antoníu Hevesi og flautuleikari er Kristrún Helga Björnsdóttir.

Jólatónleikar Kvennakórs Hafnarfjarðar verða í Víðistaðakirkju fimmtudaginn 3. desember og hefjast kl. 20:00. Miðaverð er 2.500 kr. og fer miðasala fram hjá kórnum og við innganginn. Frítt er fyrir börn 12 ára og yngri.

Hægt er að fylgjast með starfi Kvennakórs Hafnarfjarðar á Facebook og á vefnum www.kvennakorinn.org