Landssamband íslenskra Kvennakóra

Í haust hefur Kvennakór Kópavogs unnið að undirbúningi „Hönd í hönd”, árlegra styrktartónleika kórsins. Þessir tónleikar hafa verið árlegur viðburður í starfi kórsins mörg undanfarin ár og hefur afrakstur tónleikanna runnið til ýmissa góðra málefna. „Hönd í hönd” er einn ánægjulegasti viðburður kórsins ár hvert og í ár mun afraksturinn renna til Umhyggju, félags langveikra barna.   Umhyggja vinnur að bættum hag langveikra barna og fjölskyldna þeirra. Áþreifanleg tekjuskerðing á sér stað hjá mörgum fjölskyldum sem lenda í þeirri aðstöðu að barn greinist með alvarlegan og langvarandi sjúkdóm. Mörg dæmi eru þess að foreldrar hreinlega missa eignir sínar þar sem þeir neyðast til að hætta allri atvinnuþátttöku.    Nú sem fyrr eru það frábærir listamenn sem leggja verkefninu lið. Þetta eru Sigríður Beinteinsdóttir, Stefán Hilmarsson, Alda Dís Arnardóttir og Pörupiltar. Kvennakór Kópavogs mun einnig koma fram undir stjórn John Gear en þeir Ellert S. B. Sigurðarson munu einnig leika á hljóðfæri. Allir flytjendur sem og þeir sem koma að framkvæmd tónleikanna gefa vinnu sína og eru kórkonur þeim ákaflega þakklátar fyrir þeirra framlag.    Tónleikarnir verða haldnir að þessu sinni í samstarfi við Lindakirkju í Kópavogi fimmtudaginn 5. nóvember n.k. og hefjast kl. 20:00.

Miðaverð er kr. 3000 og verður hægt að panta hjá kórkonum, á netfanginu midasalakveko@gmail.com en einnig verða miðar seldir við innganginn.

Kvennakór Garðabæjar, skipaður áhugasöngkonum úr Garðabæ og nágrenni, vann til tvennra verðlauna í alþjóðlegri kórakeppni Canta al mar á Spáni sem fór fram dagana 21.- 25. október.



Kórinn vann til gullverðlauna í flokki kvennakóra og var sigurvegari þess flokks og í flokki kirkjuverka vann kórinn til silfurverðlauna. Ingibjörg Guðjónsdóttir er kórstjóri og stofnandi Kvennakórs Garðabæjar.

Um Canta Al Mar kórakeppnina
Alþjóðlega kórakeppnin og hátíðin Canta al mar er með stærri kórakeppnum í Evrópu. Það er þýska fyrirtækið Interkultur sem skipuleggur keppnina en þeir standa fyrir fjölda kóraviðburða árið um kring. Canta al mar er árleg keppni og fara allir viðburðirnir fram í Barcelona og nágrannabænum Calella.

Í ár tóku alls um 49 kórar þátt frá 29 löndum eða rúmlega 1500 manns. Dagskráin var þéttsetin alla dagana. Keppt var í 12 ólíkum flokkum, frá barnakórum til kammerkóra sem sungu bæði í kirkjum og á torgum úti. Glæsileg opnunarhátíð og veglegt lokahóf settu svip sinn á dagskránna.

Boð um að taka þátt í hátíðartónleikum
Mánuði fyrir brottför barst kórnum póstur frá skipuleggjendum keppninnar þar sem boðið var að taka þátt í sérstökum í hátíðartónleikum í Dómkirkjunni í Barcelona ásamt kórum frá Georgíu og Svíþjóð.

„After the artistic committee has checked all submitted sound recordins, your choir Kvennakór Garðabæjar has been chosen due to its high quality, to perform at a special concert at "Le Cathedral" in Barcelona“.

Tónleikastaðir og lagaval
Það var í einni af stærri kirkjum Barcelona, Santa Maria del Pi, sem kórinn söng í flokki kirkjuverka. Hver kór söng þrjú ólík verk og Kvennakór Garðabæjar söng verk eftir Báru Grímsdóttur, Javier Busto og Frode Fjellheim.

Í flokki kvennakóra söng kórinn verk eftir Mist Þorkelsdóttur, Norskt þjóðlag útsett af Henrik Ödegaard og Ola Gjeilo en sú keppni fór fram í Església de Santa Maria i Sant Nicolau í Calella. Kórinn var einstaklega stoltur af að kynna tvö íslensk kórverk fyrir spænskum áheyrendum og dómnefnd.

Alþjóðleg dómnefnd
Dómnefndin var skipuð virtum kórstjórum og tónskáldum hvaðan æfa úr heiminum: 

• Òscar Boada (Spáni)
• Javier Busto (Spáni)
• Rosalind Hall (USA)
• Christoph Mac-Carty (Hollandi)
• Albert Deprius (Spáni)
• Alexander Vatsek (Úkraínu)
• Aleksander Ryzhinskiy (Rússlandi)
• Beverly Shangkuan-Cheng (Filipseyjum)
• Tony Margeta (Svíþjóð) og
• Mathew Wright (Bretlandi)

Aðventutónleikar næsta verkefni kórsins
Kórinn undirbýr sig nú fyrir árlega aðventutónleika sem að þessu sinni verða haldnir miðvikudaginn 9. desember í Digraneskirkju, kl. 20. Að vanda verður boðið upp á fjölbreytta og hátíðlega efnisskrá.

Kvennakór Garðabæjar er á Facebook
https://www.facebook.com/kvennakorgb/?fref=ts

Kvennakór Akureyrar heldur tvenna tónleika um næstu helgi. Tónleikarnir Dívur og drottningar sem haldnir voru s.l. vor verða endurteknir, fyrst í Hömrum í Hofi 31. október kl. 16:00 og svo í Ýdölum, Aðaldal 1. nóvember kl. 15:00.
Í dagskránni er lögð áhersla á metnaðarfullar útsetningar popplaga, í bland við kórlög úr ýmsum áttum.
Einsöngvarar verða Ívar Helgason og Þórhildur Örvarsdóttir.
Aladár Rácz píanóleikari og Pétur Ingólfsson bassaleikari verða meðleikarar, Daníel Þorsteinsson stjórnar.
Aðgangseyrir kr. 3000 en ókeypis fyrir börn undir 14 ára. Miðasala á www.tix.is.

Kórinn hefur fengið til samstarfs við sig Kvenfélag Aðaldæla, en þær ágætu konur verða með kaffisölu í hléi á tónleikunum í Ýdölum. Kvenfélagskonurnar reiða fram krásir sem seldar verða fyrir 1300 krónur á mann, en allur ágóði af veitingasölu rennur í sjóð Kvenfélagsins. Kvenfélagið er reyndar ekki með posa, svo munið að taka með reiðufé.

Kvennakór Akureyrar hefur nóg að gera eins og oft áður. Haustið fór vel af stað, nýjar konur bættust í hópinn og aðrar hættu eins og gengur og eru nú skráðar 59 konur í kórinn.

Nóg verður um að vera í allan vetur og sungið verður á Akureyri og í nágrannasveitum.

Á 40 ára afmæli kvennafrídags 24. október tók kórinn þátt í tónleikunum Norðlenskar konur í tónlist sem haldnir voru í Akureyrarkirkju. Flutt var tónlist íslenskra og erlendra tónlistarkvenna sem þær hafa samið og flutt ógleymanlega.
Fram komu:
Helga Kvam, píanó
Kristjana Arngrímsdóttir, söngur
Lára Sóley Jóhannsdóttir, fiðla og söngur
Þórhildur Örvarsdóttir, söngur

Sérstakir gestir voru:
Kvennakór Akureyrar undir stjórn Daníels Þorsteinssonar
Ella Vala Ármannsdóttir, horn
Margrét Arnardóttir, harmóníka
Ragnheiður Gröndal, söngur og píanó

Næsta sumar verður svo haldið í fjórðu tónleikaferð kórsins á erlenda grund. Að þessu sinni er ferðinni heitið til Króatíu dagana 28. júní til 6. júlí og flogið í beinu flugi frá Akureyri til Ljubljana í Slóveníu og ekið þaðan í átt að Adriahafi til bæjarins Vrsar á króatísku ströndinni, þar sem gist verður allar 8 næturnar.

Sunnudaginn 1. nóvember mun kvennakórinn Heklurnar halda hausttónleika í Guðríðarkirkju. Á efnisskránni verða síðrómantísk frönsk verk eftir ýmis tónskáld. Má þar nefna Berlioz, R. Hahn, Reinecke, G. Fauré og Poulenc og meðal verka er La mort d'Ophilie eða Dauði Ofelíu eftir Berlioz. Með Heklunum spilar fimm manna strengjasveit. 
Stjórnandi er Lilja Eggertsdóttir.

Tónleikarnir hefjast kl. 15 og taka um tæpa klukkustund. 
Aðgangseyrir er 2.500 kr. 
Ath. að ekki er tekið við greiðslukortum.