Landssamband íslenskra Kvennakóra

Fimmtudaginn 29. október stendur Freyjukórinn fyrir einstöku konukvöldi í Logalandi í Borgarfirði í tilefni af 100 ára kosningarétti kvenna. Gleðin hefst kl. 20:30.

Sigríður Klingenberg og Soffía Björg Óðinsdóttir verða sérstakir gestir kvöldsins.

Freyjur taka gleðihopp og syngja hressilega nokkur lög, einnig sýna þær fatnað frá Muffin TopKiller. 20% afsláttur af völdum aðhaldsbuxum.

Verð aðgöngumiða kr. 2.500, posi á staðnum.

Seldar verða léttar veitingar á vægu verði.

Skemmtun í sveitinni eins og hún gerist best!

Senjórítukórinn heldur hausttónleika ásamt Ragnari Bjarnasyni í Seltjarnarneskirkju laugardaginn 24. október 2015 kl. 16:00. Á dagskránni eru aðallega létt og skemmtileg dægurlög, sem mörg hver eru lög sem Ragnar hefur sungið í gegnum tíðina. 

Stjórnandi er Ágota Joó. Vilberg Viggósson leikur á píanó en hann hefur útsett flest lögin sem sungin eru á tónleikunum. Undirleikarar með honum á tónleikunum eru Gunnar Hrafnsson á bassa og Erik Róbert Quick slagverksleikari.

Einsöngvarar eru Ragna Bjarnadóttir og Sigrún Ósk Ingadóttir.

Senjórítukórinn fagnar nú 20 ára afmæli. Haustið 1995 stofnaði Margrét Pálmadóttir, kórstjóri Kvennakórs Reykjavíkur, kór fyrir konur 60 ára og eldri. Tilgangurinn var að gefa áhugasömum eldri konum tækifæri til að halda áfram að syngja eftir sextugt. Konur, sem um langt skeið höfðu sungið með ýmsum kórum, en voru hættar, fögnuðu tilboði Margrétar og mættu á æfingu. Fyrsti kórstjórinn var Rut Magnússon. Margrét Pálmadóttir valdi nafnið á kórinn, Senjórítur, sem núna er Senjórítukórinn. Senjórítunum hefur fjölgað ört. Á fyrstu tónleikum kórsins árið 1996 sungu 25 konur með kórnum, en núna eru nálægt 80 konur skráðar í kórinn.

Miðaverð á tónleikunum er 3000 kr. Frítt fyrir 12 ára og yngri. 
Ath. ekki er hægt að borga með korti.

Tónleikar í Hjallakirkju miðvikudaginn 14. október 2015 kl. 20:30.

Stjórnandi er Margrét J. Pálmadóttir. Guðný Einarsdóttir leikur á sembal og Helga Aðalheiður Jónsdóttir leikur á blokkflautu.

Miðvikudaginn 14. október næstkomandi heldur Vox feminae tónleika í Hjallakirkju í Kópavogi þar sem flutt verður dægurtónlist frá 16. öld. Madrigalar voru nokkurs konar dægurlög miðalda, en söngvarnir voru alla jafna ástar- og tregaljóð. Á miðöldum var flutningur þeirra oftast í höndum þjálfaðra tónlistarmanna sem sungu saman í litlum hópum sem oft voru eingöngu skipaðir konum. Á þessum tíma var konum meinað að syngja í kirkjum og þar af leiðandi voru þetta oft einu tækifæri kvenna til að iðka tónlist sína. Vox feminae finnst við hæfi að gera þessari tegund tónlistar hátt undir höfði, nú þegar við minnumst 100 ára afmælis kosningaréttar kvenna á Íslandi.

Vox feminae var stofnaður árið 1993 af Margréti J. Pálmadóttur og hefur hún verið listrænn stjórnandi kórsins frá upphafi. Kórinn hefur fengið tvær tónlistarkonur til liðs við sig á þessum tónleikum, þær Guðnýju Einarsdóttur sem leikur á sembal og Helgu Aðalheiði Jónsdóttur sem leikur á blokkflautu.

Tónleikarnir í Hjallakirkju hefjast kl. 20:30. Miðaverð er kr. 2900 og miðasala er við innganginn og hjá kórfélögum.

Nordisk Damekors Nätverk, NDN, Norræna kvennakórasambandið er stofnað 1997 og var Raakel Solvin frá Finnlandi ein af stofnendum. NDN er meðlimur í Musik i Norden sem eru regnhlífasamtök fyrir áhugamannakóra og kórasamtök í norrænu löndunum. Í samtökunum eru öll Norðurlöndin ásamt Grænlandi, Færeyjum og Álandseyjum. Raakel Solvin situr einnig í stjórn Musik i Norden.

NDN hefur staðið fyrir þremur norrænum kvennakóramótum frá stofnun. Fyrsta mótið var haldið á Íslandi árið 2000, næst var það haldið í Noregi 2008 og nú síðast var það haldið í Åbo í Finnlandi vorið 2014.

Í maí 2014 í kringum mótið í Finnlandi var farið að tala um að efla samstarfið milli norrænu landanna. Erindi barst til Gígjunnar þar sem leitað var eftir því að Ísland tilnefndi tvo aðila úr sínum röðum til að taka þátt í þessu verkefni. 

Gígjan ákvað á fundi sínum að senda tvo stjórnarmeðlimi á þennan fyrsta fund og úr varð að Dagbjört Ottósdóttir og Guðlaug Ásgeirsdóttir fóru í lok maí 2015 á fund til Stokkhólms.

Á fundinn mættu fulltrúar frá Svíþjóð, Finnlandi og Íslandi. Fulltrúi Noregs boðaði forföll og ekki náðist í fulltrúa Dana.

Á þessum fundi gekk Gígjan formlega inn í Norræna kvennakórasambandið og Dagbjört og Guðlaug voru valdar í stjórn sambandsins.

Þá var einnig mikið rædd staða kvennakóra í aðildarlöndum og kom í ljós að Danmörk og Svíþjóð eiga engin samtök sem halda utan um kvennakóra. En hins vegar er til fjöldinn allur af öðrum sérsamböndum. Noregur, Finnland og Ísland eiga öll sín samtök, sambærileg Gígjunni.

Þá var einnig rætt hvort skrá ætti Nordisk Damekors Nätverk sem fullgild samtök og var ákveðið að gera það. "Heimahöfn" samtakanna verður í Svíþjóð.

Markmið samtakanna er fyrir utan að efla samstarf milli þjóða, að efla og styrkja stöðu norrænna kvennakóra, að örva og hvetja meðlimi sína til tónlistarmenntunar, að samtökin brúi bilið, búi til "söngbrú" á milli landa með skilvirkum upplýsingum um starfsemi aðildarkóranna og séu dugleg að kynna nýja tónlist og tónverk fyrir hver öðrum.

Allir kvennakórar geta gengið í Norræna kvennakórasambandið, hvort heldur sem einn kór, eða kórasamband. Í bígerð er að stofna fésbókarsíðu sambandsins. Þar er meiningin að skiptast á upplýsingum, skoðunum og setja inn tilkynningar til notenda.

Á þessum fundi var einnig ákveðið að næsta Norræna kvennakóramót verði í Stokkhólmi í lok apríl 2018 og er undirbúningur fyrir það þegar hafinn. 

Meðfylgjandi mynd var tekin af þátttakendum á norræna kvennakóramótinu í Åbo í Finnlandi vorið 2014.