Landssamband íslenskra Kvennakóra

Kvennakór Hafnarfjarðar fagnar tuttugu ára starfsafmæli á þessu ári og heldur tvenna tónleika nú í vor til þess að minnast þessara tímamóta. Fyrri tónleikarnir verða í Hamarssal Flensborgarskólans í Hafnarfirði sunnudaginn 26. apríl og hefjast kl. 16:00 en hinir síðari verða í Fella- og Hólakirkju laugardaginn 2. maí og hefjast kl. 15:00.

Á tónleikunum mun kórinn líta yfir farinn veg, dusta rykið af gömlum nótum og endurnýja kynni við fjölmörg falleg lög sem kórinn hefur sungið á liðnum árum. Flest þessara laga hafa öðlast sérstakan sess í hjörtum kórkvenna á tuttugu ára starfsævi kórsins. Einnig verður frumflutt lag sem Þóra Marteinsdóttir samdi sérstaklega fyrir Kvennakór Hafnarfjarðar í tilefni afmælisins við ljóð eftir Örn Árnason.

Ekkert hefur verið til sparað til að gera afmælistónleikana sem glæsilegasta og hefur kórinn fengið til liðs við sig tvo hafnfirska listamenn, þau Margréti Eir og Pál Rósinkranz sem nýverið gáfu saman út geisladiskinn „If I needed you“. Stjórnandi Kvennakórs Hafnarfjarðar er Erna Guðmundsdóttir, hljóðfæraleikarar verða Antonía Hevesi sem leikur á píanó, Jón Rafnsson á bassa og flautuleikari er Kristrún Helga Björnsdóttir. Kynnir á tónleikunum verður Þuríður Óttarsdóttir.

Á 20 ára afmælistónleikunum mun Kvennakór Hafnarfjarðar vígja glæsilega, nýja kórkjóla sem hannaðir voru af Snædísi Guðmundsdóttur hjá Dís íslensk hönnun.

Miðar verða seldir í forsölu á 2500 kr. og fer miðasala fram hjá kórkonum. Miðaverð við innganginn er 3000 kr. Frítt er fyrir börn 12 ára og yngri. Tónleikagestum verður boðið að þiggja kaffi og konfekt í tónleikahléi.

Kvennakór Garðabæjar fagnar nú 15 ára afmæli sínu en kórinn var stofnaður á haustmánuðum árið 2000.

Í tilefni þessa merku tímamóta mun kórinn halda afmælistónleika sunnudaginn 10. maí í Guðríðarkirkju.

Nýársgleði í upphafi árs
Nýárgleði kórsins var haldin í byrjun janúar. Þar fjölmenntu kórkonur ásamt mökum og áttu skemmtilega kvöldstund saman. Nokkrir eiginmenn tóku að sér að skipuleggja kvöldið sem var allt hið glæsilegasta. Þemað var Spánn í tilefni af söngferð kórsins til spænsku borgarinnar Barcelona næsta haust. Skemmtunin hófst á metnaðarfullu tónlistaratriði frá ungum tónlistarnemum í FÍH. Formaður kórsins flutti ræðu og fólk steig á stokk með gamanmál af ýmsum toga. Mikið var sungið enda ekki annað við hæfi þegar kór gerir sér glaðan dag.

Styrkur til Konukots
Í febrúar færði kórinn fulltrúa Konukots styrk að upphæð 60.000 kr. en styrkurinn er ágóði af sölu jólamerkis kórsins fyrir síðustu jól. Konukot er athvarf fyrir heimilslausar konur og rekið af Rauða krossinum og Reykjavíkurborg. Kórinn þakkar Garðabæingum og öðrum velunnurum fyrir ómetanlegan stuðning við kaup á merkinu á aðventunni.

Konudagsmessa í Vídalínskirkju
Konudagsmessan í Vídalínskirkju skipar fastan sess í hugum kórkvenna enda orðin að árlegum viðburði í kórstarfinu síðast liðin tíu ár. Kórinn bregður sér í hlutverk kirkjukórs og sér um almennan safnaðarsöng auk þess að syngja nokkur vel valin kirkjuverk. Þennan dag var kirkjan þéttsetin af konum og öðrum góðum gestum sem tóku fagnandi þessu flotta framtaki kirkjunnar og séra Jónu Hrannar Bolladóttur, sóknarprests.

Kóramót á Spáni
Árlegur aðalfundur kórsins var haldinn í marsmánuði þar sem fram fóru hefðbundin aðalfundarstörf svo sem lagabreytingar, kosning í stjórn og árskýrsla formanns. Á fundinum var tekin sú ákvörðun að skrá sig til þátttöku í alþjóðlegu kóramóti sem haldið verður á Barcelona á Spáni seinnihluta októbermánaðar 2015.

Hátíðartónleikar 10. maí í Guðríðarkirkju
Mestur tími kórkvenna, í upphafi nýs árs, hefur farið í æfingar og undirbúning fyrir afmælistónleika kórsins sem haldnir verða í Guðríðarkirkju sunnudaginn 10. maí kl. 16. Að vanda verður efnisskrá tónleikanna fjölbreytt með klassískum kórverkum í bland við léttari sönglög. Að tónleikum loknum er öllum tónleikagestum boðið upp á léttar veitingar að hætti kórkvenna. Við biðjum alla velunnara okkar að taka daginn frá en við munum auglýsa tónleikana vel hér á Gígjunni og á facebook síðunni okkar.

Fjórir kvennakórar standa fyrir tónleikum klukkan 17.00 á sumardaginn fyrsta, 23. apríl í Norðurljósasal Hörpu. Kórarnir eru Aurora, Cantabile, Hrynjandi og Vox feminae. Kórsöngvarar eru samtals um það bil 140 á ýmsum aldri. Kórarnir æfa allir í sönghúsinu sínu Domus Vox við Laugaveg.  Stjórnendur kóranna eru Margrét J. Pálmadóttir og Maríus Hermann Sverrisson. Kvennakórinn Hrynjandi hóf göngu sína fyrir fjórum árum og er Maríus stjórnandi hans. Kórar Margrétar eiga sér allir þrír um tuttugu ára sögu.

Tónleikarnir eru með þessu samstarfi tileinkaðir 100 ára afmæli kostningarréttar kvenna á Íslandi. Efnisskráin er vafningur þekktra ljóða og tónverka sem fylgt hafa þjóðinni í áratugi og varðveist hafa frá kynslóð til kynslóðar. Karlakórar hafa í heila öld nýtt þennan fjársjóð til söngs, en nú hafa konur um land allt smíðað og fínpússað hljóðfærið kvennakór. Kvennakórar búa yfir öðrum litum í samhljómi en karlakórar er gefa okkar dásamlegu kórverkum nýjan og hlýjan þokka. Með kórunum og stjórnendunum verða einnig listamennirnir Sigrún Hjálmtýsdóttir sópran, Matthías Stefánsson fiðluleikari og Arnhildur Valgarðsdóttir píanóleikari.

Miðaverð er 3000 kr. á midi.is og harpa.is. Forsöluafsláttur er á miðum hjá kórfélögum og í Domus Vox.

Vortónleikar Kvennakórs Kópavogs verða haldnir í sal Ferðafélags Íslands í Mörkinni í Reykjavík miðvikudagskvöldið 22. apríl, síðasta vetrardag. Tónleikarnir hefjast kl. 20:30 en húsið opnar klukkustund fyrr með fordrykk og lifandi tónlist. 

Að þessu sinni verður létt klúbbastemning hjá kvennakórnum. Gestir sitja við borð og geta keypt veitingar á barnum sem verður opinn meðan á tónleikunum stendur. Eftir tónleikana verður síðan áfram lifandi tónlist og opinn bar eitthvað fram eftir kvöldi.

Hluti tónleikanna er tileinkaður íslenskum lögum allt frá þjóðlögum að dægurlögum s.s. Blástjarnan, Ást og Betri tíð. Annar hluti dagskrárinnar er settur saman af þekktum erlendum lögum í jazzútsetningum. Þar er að finna lög eins og Blue Moon, Dream a little dream og Summertime.

Það er kórkonum ánægja að kynna að með þeim í för að þessu sinni eru frábærir listamenn. Söngkonan Stefanía Svavarsdóttir, Richard Korn leikur á bassa, Ellert S. B. Sigurðarson á trommur og gítar og síðast en ekki síst John Gear sem leikur á trompet og píanó en hann er jafnframt stjórnandi kórsins.

Eftir rysjóttan vetur svífur andi ástar, drauma og kannski örlítil von um sólríkt sumar yfir tónleikunum. Vonast kór konur eftir að sem flestir komi með í þetta ferðalag, það sakar ekki að láta sig dreyma.