Landssamband íslenskra Kvennakóra

Kvennakórinn Léttsveit Reykjavíkur var stofnaður 19. september 1995 og á því 20 ára afmæli í haust. Að sjálfsögðu verður haldið upp á afmælið með margvíslegum hætti og ætla kórkonur að gera sér glaðan dag nokkrum sinnum á árinu. Fyrsti afmælisviðburðurinn er sögu- og minjasýning í Ráðhúsi Reykjavíkur laugardaginn 14. febrúar. Þar verður saga kórsins sögð og sýnd í máli, myndum og söng. Sýningin verður opin kl. 13 – 17. Kórinn tekur lagið kl. 14 og 16.

Léttsveitin var stofnuð undir merkjum Kvennakórs Reykjavíkur en árið 2000 var samstarfinu slitið og kórinn varð sjálfstæður. Léttsveitin er stærsti kvennakór landsins en að jafnaði syngja um 120 konur í kórnum. Stjórnandi fyrstu 17 árin var Jóhanna Þórhallsdóttir en haustið 2012 tók Gísli Magna Sigríðarson við. Aðalheiður Þorsteinsdóttir spilar með á píanóið og hefur gert frá upphafi. Gísli og Aðalheiður útsetja flest sem kórinn syngur.

Kórfélagar hlakka til að sjá sem flest áhugafólk um kórstarf og sérstaklega fyrrverandi Léttsveitarkonur.

Kvennakór Garðabæjar hefur lagt línurnar fyrir starfsárið 2015 en margir spennandi viðburðir eru framundan:

• Konudagsmessa
• Kirkjulegir tónleikar
• 15 ára afmæli
• Vortónleikar og
• Söngferð til Spánar

Nýársgleðin
Það var því við hæfi að halda glæsilega nýársgleði til þess að fagna nýju starfsári og stilla saman strengi.

Karlakór Kvennakórs Garðabæjar skipulagið gleðina með miklum myndarbrag og þemað í myndatökunni var Spánn í tilefni að söngferð okkar til Barcelona næsta haust.

Gleðilegt nýtt ár
Eflaust verður hægt að finna hitann á uppákomum okkar í vetur en við hlökkum til söngs og samveru við tónleikagesti okkar á nýju ári. 

Facebook
Kvennakór Garðabæjar er á facebook þar er hægt að fylgjast með öllum viðburðum kórsins:
https://www.facebook.com/kvennakorgb

Gígjan, landssamband íslenskra kvennakóra, óskar félögum í aðildarkórum sambandsins gleðilegra jóla, blessunar og friðar með þökk fyrir samstarfið á árinu sem er að líða.

Megi nýja árið verða gott til handa kvennakórum landsins og starf þeirra vaxa og dafna með hækkandi sól.

Aðventutónleikar Kvennakórs Garðabæjar
Miðvikudaginn 10. desember hélt kórinn aðventutónleika sína og voru þeir vel sóttir eins og mörg undanfarin ár. Aðventutónleikarnir skipa alltaf sérstakan sess í hugum kórkvenna og þykir okkur ákaflega vænt um hversu margir koma að hlýða á þá, ár eftir ár. Þá leggjast allir á eitt, jafnt tónleikagestir sem kórkonur, um að skapa fallega jólastemningu.

Við þökkum tónleikagestum kærlega fyrir komuna og fyrir að gera þessa stund einstaklega ánægjulega.

Jólamerki Kvennakórs Garðabæjar 2014
Nú fer sölu jólamerkis kórsins senn að ljúka. Sala á merkinu hófst í byrjun desember og hefur því verið feikna vel tekið, enda hafa kórkonur látið hendur standa fram úr ermum við sölu á merkinu víðsvegar í bæjarfélaginu. Það er auðvitað mikið í húfi fyrir kórinn, þar sem hluti af söluhagnaði fer í rekstur kórsins en hluti fer til styrktar Konukoti.

Eins og áður hefur verið sagt frá, er Konukot athvarf fyrir heimilislausar konur, flestar í fíkniefna- eða áfengisneyslu, og þökkum við öllum þeim sem stutt hafa þessi málefni með kaupum á merkinu í ár.

Áhugasamir um kaup á merkinu geta enn nálgast merkið á netfanginu: kvennakorgb@gmail.com

Verkefni fyrir Tryggingarmiðstöðina
Kórinn hefur fengist við mörg skemmtileg verkefni á þessu hausti. Það sem líklega stendur þó upp úr var að syngja jólalag TM, bæði í hljóðveri og síðan fyrir viðskiptavini TM í heimahúsum og fyrirtækjum.

Gengu kórkonur milli húsa á frostköldum vetrarkvöldum desembermánaðar, þar sem jólaljósin tindruðu á trjám og runnum, bönkuðu upp á og brustu í söng. Heimilisfólk varð að vonum æði undrandi þegar hópur syngjandi kvenna með grænar jólasveinahúfur stóð á tröppunum hjá þeim og söng um sósu sem klúðrast, jólasvein sem festist í strompi og kerti sem veldur íkveikju.

Má nú heyra sönginn óma í auglýsingatímum ljósvakanna og í netheimum.

Gleðilegt jól og farsælt komandi ár 2015
Kvennakór Garðabæjar er nú kominn í jólafrí og hefjast æfingar aftur í byrjun janúar. Framundan eru kirkjulegir tónleikar í mars og munum við halda áfram að æfa fyrir þá. Samhliða verður unnið að dagskrá vortónleikanna sem verða haldnir í maí.
Kvennakór Garðabæjar óskar gleðilegra jóla, friðar og farsældar á nýju ári.

Við þökkum einlæglega fyrir allar gleðistundirnar á árinu.