Landssamband íslenskra Kvennakóra

Kvennakórinn Heklurnar tekur þátt í hátíðartónleikum til styrktar krabbameinsdeild Landspítalans, 11E. Tónleikarnir verða í hádeginu þann 12. desember í Laugarneskirkju og hefjast kl. 12. Miðaverð er 2000 krónur. Dagskráin er fjölbreytt og mega tónleikagestir búast við hátíðarstemningu og gleði í anda jólanna.

Einsöngvarar á tónleikunum eru Viðar Gunnarsson bassi, Auður Gunnarsdóttir sópran og Nathalía D Halldórsdóttir mezzosópran. Kammerhópurinn Stilla annast undirleik.

Að syngja í kór eru forréttindi, sérstaklega á aðventunni þegar jólalögin taka að óma.

Klukknanna köll er eitt þeirra laga sem er ómissandi á jóla-söngviðburðum Kvennakórs Garðabæjar nú fyrir þessi jól.

Aðventutónleikar 10. desember
Við minnum á aðventutónleika kórsins miðvikudaginn 10. desember kl. 20 í Digraneskirkju í Kópavogi.

Kvennakór Garðabæjar er á facebook
https://www.facebook.com/kvennakorgb

Sala á nýju jólamerki Kvennakórs Garðabæjar 2014 hófst laugardaginn 22. nóvember síðast liðinn. Merkið er ætlað til upphengingar á jólatré eða á jólapakkann og með því fylgir gyllt snúra.

Jólamerkið til styrktar kórstarfinu og góðgerðarmálefni
Þetta er annað árið í röð sem kórinn lætur hanna sérstakt jólamerki með það fyrir augum að styrkja góðgerðarmálefni með hluta af söluágóða merkisins. Hönnuður merkjanna er kórkonan Guðrún Anna Magnúsdóttir, grafískur hönnuður sem rekur auglýsingastofuna Grafika.
Kórkonur munu selja merkið fram að jólum og verða þær sýnilegar víðs vegar um bæinn við hin ýmsu tækifæri.

Konukot fær styrk frá Kvennakór Garðabæjar
Konukot varð fyrir vali kórkvenna í ár og mun það hljóta ágóða af sölu jólamerkisins. Konukot er næturathvarf fyrir heimilislausar konur og er rekið sem samstarfsverkefni Rauða krossins í Reykjavík og Reykjavíkurborgar. Um leið og við vonum að styrkurinn komi sér vel fyrir athvarfið, sendum við þeim konum sem gista Konukot okkar bestu kveðjur og óskum þeim allra heilla og blessunar á jólum.

Aðventutónleikar miðvikudaginn 10. desember í Digraneskirkju
Kórinn æfir þessa dagana af mikilli elju fyrir komandi aðventutónleika. Allar eru konurnar að komast í jólaskapið og jólatónlistin, sem vissulega á sinn þátt í að göfga jólaandann, hljómar nú ljúflega á heimilium kvennanna þar sem æft er að miklu kappi milli kóræfinga. Tónleikarnir verða auglýstir nánar er nær dregur.

Framundan hjá Kvennakór Garðabæjar:

• 29. nóvember; þátttaka í góðgerðardegi á Álftanesi
• Í desember; jólasöngur hér og þar
• 6. desember; ljósin tendruð á jólatrénu í Garðabæ
• 7. desember kl. 20; þátttaka í aðventukvöldi í Vídalínskirkju
• 10. desember kl. 20; aðventutónleikar kórsins í Digraneskirkju

Kvennakór Garðabæjar á facebook
https://www.facebook.com/kvennakorgb

Kvennakór Reykjavíkur býður gesti hjartanlega velkomna á aðventutónleika í Fella- og Hólakirkju sunnudaginn 7. desember kl. 17:00 og 20:00.  Það er von okkar að gestir njóti þess að hlusta á kórinn syngja fallegan jólalsöngvaseið við kertaljós á öðrum sunnudegi í aðventu. Lagavalið er fjölbreytt og alþjóðlegt eins og oft áður. 
Sungið er um spennuna sem fylgir aðventunni, jólaljósin, hjátrúna, veðrið og hina helgu nótt. Jólakötturinn eftir Jóhannes úr Kötlum vð lag Ingibjargar Þorbergs, í útsetningu Vilbergs Viggósonar er í sérstöku uppáhaldi. Einnig hið ungverska Englar og hirðar eftir Z. Kodály í íslenskri þýðingu Rúnars Einarssonar. 

Sérstakir gestir Kvennakórs Reykjavíkur á fyrri tónleikum dagsins eru Senjórítur, kór eldri kvenna sem svo sannarlega slá í gegn hvar sem þær koma fram. Senjórítur telja yfir 80 konur og flytja þær sín jólalög en kórarnir syngja einnig saman nokkur lög. Stjórnandi beggja kóra er Ágota Joó og undirleik annast Vilberg Viggósson.

Í kjölfar hvorra tónleika um sig, býður Kvennakór Reykjavíkur gestum að staldra við og þiggja léttar og jólalegar veitingar og njóta samverunnar við léttan samsöng og spjall.
Miðaverð: 
2500 kr. í forsölu.
3000 kr. við innganginn.

Miðar fást hjá kórkonum, í síma 896 6468, eða með því að senda póst á postur@kvennakorinn.is.