Landssamband íslenskra Kvennakóra

Kvennakór Garðabæjar tekur þátt í tónleikum til styrktar Einhverfusamtökunum í Langholtskirkju laugardaginn 15. nóvember kl. 16. Tónleikarnir bera yfirskriftina Fagra veröld og þar koma fram margir frábærir kórar og einsöngvarar.

Einhverfusamtökin og Kammerkór Reykjavíkur, undir stjórn Sigurðar Bragasonar, eiga frumkvæðið að þessum tónleikum. Sigurður Bragason fagnar einnig 40 ára starfsafmæli um þessar mundir og verður tónlist eftir hann flutt á tónleikunum. Meðal annars verður frumflutt verk Sigurðar, "Alfaðir, snertu við heims hjarta", auk þess sem mörg af sönglögum hans verða flutt.

Allur ágóði af tónleikunum rennur til Einhverfusamtakanna. Miðasala er á skrifstofu Einhverfusamtakanna Háaleitisbraut 13, opið miðvikudaga 9-15 og föstudaga 9-13, sími 562 1590.

Kvennakór Kópavogs heldur sína árlegu styrktartónleika 9. nóvember næstkomandi. Í ár munu tvö félög njóta góðs af þeim, Mæðrastyrksnefnd Kópavogs og Líknardeild LSH í Kópavogi.

Hönd í hönd er yfirskrift tónleikanna og er þetta sjötta árið sem þeir fara fram en allt frá upphafi hefur Mæðrastyrksnefnd Kópavogs notið góðs af ágóðanum. Síðustu fjögur árin höfum við verið í samstarfi við Digraneskirkju en fyrsta árið voru tónleikarnir haldnir í Hjallakirkju. Í ár ákváðum við að flytja okkur um set því tónleikarnir hafa einfaldlega stækkað og nú verða haldnir tvennir tónleikar í fyrsta skipti. Allir flytjendur og aðrir sem koma að tónleikunum gefa vinnu sína.

Tónleikarnir verða haldnir í Austurbæ, gamla Austubæjarbíó á Snorrabraut. Fyrri tónleikar hefjast kl. 16:00 og þeir seinni kl. 20:00. Tónleikarnir eru um 90 - 100 mínútur og er gert ráð fyrir hléi.

Verð á tónleikana er kr. 3.000,- og er uppselt á þá fyrri.

Flytjendur eru:

Söngur: Páll Óskar Hjálmtýsson
           Alma Rut Kristjánsdóttir
           Drengjakór íslenska lýðveldisins, stjórnandi Sólveig Sigríður Einarsdóttir
           Kvennakór Kópavogs, stjórnandi John Gear
Harpa:  Monika Abendroth
Gítar:    Ásgeir Ásgeirsson
Bassi:    Richard Korn
Fiðla:    Roland Hartwell
Trommur/útsetningar:  Ellert Sigurðarson
Hljómborð: John Gear

Miðasala er hafin á midi.is

Laugardaginn 8. nóvember verður glæsileg söngskemmtun í Mosfellsbæ. Þrír karlakórar og einn kvennakór þenja þar raddböndin. Kórarnir eru: Kvennakór Akureyrar, Karlakórinn Stefnir í Mosfellsbæ, Karlakór Kópavogs og Karlakórinn Söngbræður úr Borgarfirði.

Þessir glæsilegu kórar halda saman tónleika í Íþróttahúsinu að Varmá í Mosfellsbæ kl. 16:00. Hver kór mun syngja nokkur lög og svo mynda þeir saman blandaðan kór.

Léttsveit Reykjavíkur er stærsti kvennakór landsins og telur að jafnaði um 120 konur. Kórinn var stofnaður í september 1995 og er því að hefja 20. starfsár sitt. Mikið stendur til, afmælinu á að fagna allt afmælisárið. Afmælisgleðin hefst með jólatónleikum  kórsins laugardaginn 6. desember í Langholtskirkju, kl. 14 og 17. Laugardaginn 14. febrúar 2015 verður sögusýning í Ráðhúsi Reykjavíkur og þangað eru allir velkomnir. Sýndir verða búningar, myndir og fleira og að sjálfsögðu stígur kórinn á svið. Afmælistónleikar verða laugardaginn 9. maí. Að loknum vortónleikum og upptökum flýgur kórinn til Englands þar sem afmælisgleðin heldur áfram. Dvalið verður á sveitahóteli fyrir utan London og að minnsta kosti tvennir tónleikar eru fyrirhugaðir þar.

Það er að venju mikið líf og fjör í Léttsveitinni, kórinn leggur áherslu á að syngja „létta“ tónlist af ýmsu tagi. Abba, Eurovision og íslensk og erlend dægurlög eru meðal annars á efnisskránni. Léttsveitin hefur ferðast víða, flakkað um landið og sungið í öllum landshlutum og erlendis hefur kórinn sungið á Kúbu, Ítalíu, í Tívolíinu í Kaupmannahöfn og Montserrat klaustrinu á Spáni svo eitthvað sé nefnt. 

Jóhanna Þórhallsdóttir stjórnaði kórnum frá upphafi og til ársins 2012. Þegar hún kvaddi kórinn tók Gísli Magna við en Aðalheiður Þorsteinsdóttir hefur setið við píanóið frá upphafi. Aðalheiður hefur útsett mörg lög fyrir kórinn og einnig Gísli eftir að hann tók við. Aðalheiður fær aðra tónlistarmenn til liðs við sig á tónleikum og hefur alla tíð séð um að stjórna og útsetja fyrir hljómsveitina.

Kórkonur vonast til að sjá sem flesta á afmælisviðburðum Léttsveitarinnar.