Landssamband íslenskra Kvennakóra

Kvennakór Suðurnesja heldur tónleika í Guðríðarkirkju í Grafarholti mánudaginn 29. september kl. 20:00.

Í byrjun október fer kórinn til Minneapolis í Bandaríkjunum þar sem hann tekur þátt í hátíð Leifs Eiríkssonar og verður Kvennakór Suðurnesja fyrsti íslenski kórinn til að koma fram á þessari hátíð. Kórinn verður því á þjóðlegu nótunum og syngur eingöngu íslensk lög á tónleikunum; þjóðlög, ættjarðarlög, dægurlög, trúarlega tónlist og lög eftir íslensk samtímaskáld.

Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir.

Kórkonur hafa tekið sér ýmislegt fyrir hendur í fjáröflunarskyni til að fjármagna starfsemi kórsins og ferðina sem framundan er. Þær hafa m.a. tekið að sér hlutverk í kvikmyndum og leikverki, tínt rusl á flugvallarsvæðinu og haldið kökubasara. Stærsta verkefnið var þó bæjarhátíðin Sandgerðisdagar sem haldin er í lok ágúst ár hvert í Sandgerði. Kórkonur hafa séð um skipulagningu og framkvæmd hátíðarinnar undanfarin tvö sumur og hefur verið mikil ánægja með störf þeirra. Auk þessa hefur Reykjanesbær gert þjónustusamning við kórinn mörg undanfarin ár og stutt myndarlega við starf hans. Ýmis fyrirtæki hafa einnig styrkt kórinn og kunna kórkonur öllum þessum aðilum miklar þakkir fyrir stuðninginn.

Tónleikarnir verða sem áður segir í Guðríðarkirkju mánudaginn 29. september kl. 20:00. Miðaverð er 1500 kr. og verður miðasala við innganginn.

Þar sem nýtt starfsár Kvennakórs Hornafjarðar er að hefjast er ekki úr vegi að segja fá því hvað er á döfinni.

Aðalfundur kórsins var haldinn í Sindrabæ föstudagskvöldið 12. september s.l. og var góð mæting. Þó nokkur ný andlit létu sjá sig í bland við eldri félaga. Ný stjórn var kosin og hana skipa: Ólöf Gísladóttir formaður, Lucia Óskarsdóttir gjaldkeri, Þórhildur Kristjánsdóttir ritari og Arna Ósk Harðardóttir og Guðlaug Úlfarsdóttir meðstjórnendur. Eftir fundinn var farið í óvissuferð þar sem var grillað og haft gaman fram eftir kvöldi.

Fyrsta kóræfing vetrarins verður í Sindrabæ miðvikudagskvöldið 8. október kl. 19:30.

Kórinn hefur aldrei verið stærri en nú en alltaf er hægt að bæta við söngglöðum konum og bjóðum við því nýjar konur velkomnar.

Helgina 5.-7. september síðast liðinn hélt Kvennakór Garðabæjar í æfingabúðir og var förinni heitið í Hlíðardalssetur, stutt frá Hveragerði. Ingibjörg Guðjónsdóttir kórstjóri var að venju vel undirbúin og fékk kórinn ýmis krefjandi verkefni að glíma við.
Þetta starfsár, sem er 15 ára afmælisár kórsins, verður mjög spennandi og munum kórinn flytja tónlist af margvíslegum toga við hin ýmsu tækifæri á árinu. Er þá bæði um að ræða efni sem kórinn hefur flutt áður, sem og ný verk.

Söngur og samvera
Tilgangur æfingabúða er augljóslega að lesa nótur og æfa söng, en félagslegi þátturinn er ekki síður mikilvægur, því samheldni og samvinna er gríðarlega stór þáttur í kórastarfi. Sá þáttur hefur alltaf skipað stóran sess hjá Kvennakór Garðabæjar og leggja allar kórkonur sig fram um að hlúa að starfinu og eiga saman góðar stundir við söng og samveru.
Við mætum því glaðar og endurnærðar til starfa eftir vel heppnaðar æfingabúðir og hlökkum til að syngja fyrir ykkur á komandi starfsári.

Haustvaka
Þann 16. október næst komandi mun Haustvaka Kvennakórs Garðabæjar fara fram í Kirkjuhvoli. Þetta er hefðbundinn dagskrárliður hjá kórnum og munum við fá góða gesti til okkar eins og endranær. Dagskráin verður auglýst frekar þegar nær dregur.

Framundan hjá Kvennakór Garðabæjar
• 10. október: Söngur fyrir Rotary
• 16. október: Haustvaka
• Nóvember: Þátttaka í styrktartónleikum í Langholtskirkju
• Desember: Aðventutónleikar
• Desember: Jólasöngur hér og þar

Kvennakór Garðabæjar er á facebook
Hægt er að fylgjast með starfssemi kórsins á facebook síðu Kvennakórs Garðabæjar:
https://www.facebook.com/kvennakorgb

Allar frekari upplýsingar um Kvennakór Garðabæjar veitir fjölmiðlafulltrúi kórsins
Ólafía Einarsdóttir, gsm: 895 8388 og netfang: kvennakorgb@gmail.com

Kvennakór Garðabæjar tekur til starfa að nýju næst komandi þriðjudag 26. ágúst og mæta kórkonur kátar og orkumiklar eftir langt og gott sumarfrí. Síðasta starfsár var viðburðarmikið og nóg um krefjandi og skemmtileg verkefni. Starfsárinu lauk með vortónleikum í Guðríðarkirkju í maí. Tónleikarnir voru að venju mjög vel sóttir, góður andi ríkjandi og að gömlum og góðum sið Kvennakórsins, var tónleikagestum boðið upp á léttar veitingar í lokin.

Afmælisár framundan - Kvennakór Garðabæjar 15 ára
Á þessu starfsári fagnar Kvennakór Garðabæjar 15 ára starfsafmæli, en öll árin hefur kórinn starfað undir farsælli stjórn Ingibjargar Guðjónsdóttur sópransöngkonu. Eins og gengur og gerist hafa konur komið og farið, sumar staldrað stutt við, aðrar lengur. En kórinn hefur átt því láni að fagna, að kjarni kvenna sem byrjaði í kórnum á fyrsta starfsárinu starfar enn með kórnum að fullum krafti og eru í því fólgin ómetanleg verðmæti. Sú þekking og reynsla af kórstarfinu sem þær hafa miðlað óeigingjarnt áfram, skilar sér í sífellt meiri metnaði og áhuga kórkvenna.

Dagskrá afmælisárs
Þessum áfanga ber að fagna, og hefur stjórn lagt drög að dagskrá afmælisársins. Dagskráin verður að kynnt á Facebook síðu kórsins og með öðrum hætti, þegar hún skýrist.

Um Kvennakór Garðabæjar
Stofnandi Kvennakórs Garðabæjar og stjórnandi hans frá upphafi er Ingibjörg Guðjónsdóttir, sópransöngkona og söngkennari við Tónlistarskóla Hafnarfjarðar. Kvennakórinn er skipaður u.þ.b. 32 konum. Kórinn æfir í Tónlistarskóla Garðabæjar á þriðjudagskvöldum frá kl. 19.30-22.00 og annan hvern laugardagsmorgun. Auk söngsins er mikið félagsstarf unnið í kórnum og ríkir góð stemning og samheldni meðal kórkvenna. Kórinn er afar þakklátur fyrir þann digga hóp stuðningsmanna og tónleikagesta sem hafa fylgt honum frá upphafi og fer sá hópur ört vaxandi.

Viltu slást í hópinn?
Vanar kórkonur sem hafa áhuga á að fá inngöngu í Kvennakór Garðabæjar, er bent á að hafa samband við Ingibjörgu Guðjónsdóttur kórstjóra á netfanginu: kvennakorgb@gmail.com

Kvennakór Garðabæjar á Facebook
Hægt er að fylgjast með starfssemi kórsins á facebook síðu Kvennakórs Garðabæjar