Landssamband íslenskra Kvennakóra

Kvennakórinn Seljur heldur "Konu-skemmtikvöld" í Seljakirkju þriðjudaginn 19. febrúar.
Ýmislegt fróðlegt og skemmtilegt verður á dagskrá, t.d. fyrirlestrar, förðun, tískusýning, söngur og kaffihlaðborð.

Verð kr. 2000

Seljurnar vonast til að sjá sem flestar konur.

Helgina 2.-3. mars næstkomandi mun Freyjukórinn í Borgarfirði standa fyrir söngbúðum í Hjálmakletti í Borgarnesi. 

Söngbúðirnar bera heitið „Syngjandi konur á Vesturlandi“. Markmiðið er að efla söng og söngþjálfun meðal kvenna á Vesturlandi, dýpka og breikka sviðið með því að fá eina færustu djass söngkonu Íslands, Kristjönu Stefánsdóttur til að leiðbeina.

Þetta er í annað skiptið sem Freyjukórinn stendur fyrir svona sönghelgi en í fyrra tóku um sjötíu konur þátt í söngbúðunum.

Þetta er frábært tækifæri og eru allar konur sem áhuga hafa hvattar til að vera með. 

Aðstandendur vilja fá sem flestar konur, úr sem flestum kórum en einnig er þetta kjörið tækifæri fyrir þær sem ekki eru í kór.

Nánari upplýsingar um söngbúðirnar má sjá hér.

Næstkomandi sunnudag þann 3. febrúar kl. 15 mun Vox feminae syngja á tónleikum í Háteigskirkju undir merkjum Myrkra músikdaga.
Yfirskrift tónleikanna er "Maríumessa" en á tónleikunum frumflytur kórinn hátíðarmessu í sex þáttum eftir Báru Grímsdóttur, en verkið samdi hún fyrir Vox feminae og Margréti J. Pálmadóttur stjórnanda hans.
Kórinn fékk styrk frá Hlaðvarpanum og tónverkasjóði Gígjunnar til verkefnisins árið 2011 og er nú komið að frumflutningi verksins.  Það er mikið fagnaðarefni þegar svo metnaðarfull verk eru samin fyrir kvennakóra og Vox feminae mikill heiður að fá tækifæri til þess að frumflytja verkið á Myrkum músíkdögum.

Auk messunnar mun kórinn flytja verk samin til heiðurs Maríu mey; "Ég vil lofa eina þá" eftir Báru Grímsdóttur og þrjú ólík verk sem öll eru samin við latneska textann "Salve Regina" (Heill þér María) og eru þau eftir Hjálmar H. Ragnarsson, Javier Busto og Gerhard Deutschmann.

Tónleikarnir á sunnudaginn hefjast kl. 15 og er miðasala við innganginn.

Á haustdögum 1992 voru nokkrar konur á námskeiði í kórskóla í Kramhúsinu hjá Margréti Pálmadóttur. Að loknu námskeiðinu og tónleikum í Kristskirkju fyrir jólin varð þeim öllum ljóst að þær yrðu að halda áfram. Margrét hafði átt þann draum að stofna stóran kvennakór og nú gerðist undrið. Auglýst var eftir fleiri félögum og 25. janúar 1993 var fyrsta æfing Kvennakórs Reykjavíkur haldin. Margrét var fyrsti stjórnandi kvennakórsins og á fjórum árum óx hann og dafnaði og gat af sér fleiri kóra og 1997 voru fimm kórar starfandi undir nafni Kvennakórs Reykjavíkur með 400 – 500 félaga, en þeir voru auk hans Vox Feminae, Léttsveitin, Gospelsystur og Senjórítur. Árið 2000 skiptust kórarnir í sjálfstæðar rekstrareiningar.

Segja má að frumkvöðlastarf kvennanna 1993 hafi hrundið af stað tónlistarævintýri. Þetta varð hvatning að stofnun fleiri kvennakóra sem glætt hafa tónlistarlíf um land allt æ síðan.

Stjórnendur Kvennakórs Reykjavíkur frá upphafi eru Margrét Pálmadóttir (1993 – 1997), Sigrún Þorgeirsdóttir (1997 – 2010) og Ágota Joó síðan 2010.