Landssamband íslenskra Kvennakóra

Nýjasti aðildarkór Gígjunnar, Kvennakór Breiðholts-Valkyrjur héldu sína fyrstu tónleika í Árskógum þann 14. apríl sl. og gengu þeir vel.
Tónleikarnir voru undir yfirskriftinni "Söngskemmtun" en kórkonur buðu gestum og gangandi upp á kaffi og vöfflur með rjóma.
Þær fluttu þar um tíu eighties lög og fengu til liðs við sig einsöngvarana Halla Reynis trúbador sem kom og flutti 3 lög ásamt Elínrós, og eins kom söngvarinn Elvar Þór og söng með Valkyrjum nokkur lög. Síðan sungu einsöngvarar úr röðum kórsins dúetta og einsöngslög. Fjöldi kórkvenna var 18 konur.
Kórinn hlaut góðar móttökur gesta og var mæting góð. Fólk talaði um að efnisskráin hafi verið fjölbreytt og skemmtileg og mikil sönggleði hjá þessum nýstofnaða kór. Valkyrjur voru ánægðar með þessa tónleika sína, en eru nú komnar í sumarfrí.

Vortónleikar Kvennakórsins Emblu verða í Glerárkirkju á Akureyri sunnudaginn 10.6. kl. 16.00. Í þetta sinn syngur kórinn a capella tónlist sem er skrifuð fyrir kvennaraddir frá 12. öld til okkar daga. Aðalverk tónleikanna verður hið undurfagra verk Heitor Villa-Lobos: Missa Sao Sebastiao.
Mánudaginn 11. 6. kl. 20.00 syngur kórinn svo í Landakotskirkju í Reykjavík. Kórinn hlakkar sérstaklega til að syngja þar, því þar er einmitt rétti hljómburðurinn fyrir þessa tónlist.
Svo gott fólk, nú er bara að mæta og láta Emblurnar leiða ykkur inn í paradís tónheimanna.

Freyjukórinn heldur vortónleikana "Mót sumri og sól" í Reykholtskirkju sunnudaginn 3. júní næstkomandi. Stjórnandi kórsins er Zsuzsanna Budai, undirleikarar verða Sigurður Jakobsson á bassa og Jónína Erna Arnardóttir leikur á píanó. Tónleikarnir eru liður í undirbúningi kórsins fyrir Ítalíuferð þar sem sungin verða bæði ítölsk og íslensk lög eins og Viva tutte, Ma come balli bella bimba, Vikivaki, Einu sinni á ágústkvöldi og fleira og fleira. Starf kórsins hefur verið með öflugra móti í vetur en eins og margir muna hélt Freyjukórinn söngbúðirnar Syngjandi konur á Vesturlandi þar sem djasssöngkonan Kristjana Stefáns leiddi hópinn. Söngbúðirnar voru kórnum eins og  góð vítamínssprauta. Það iðar allt af lífi og óhætt að segja að það ríki gleði og kraftur í Freyjukórnum sem telur um 40 konur þetta árið. Það verður enginn svikinn af að mæta í Reykholt á sunnudaginn kemur kl. 20.30 og njóta með Freyjum Borgarfjarðar.

Vortónleikar Kvennakórs Akureyrar eru tileinkaðir söngför til Kanada á komandi sumri.

Kvennakór Akureyrar er nú á 11. starfsári og hefur í vetur haldið þrenna tónleika. Fyrstir voru 10 ára afmælistónleikar í nóvember, síðan árlegir tónleikar til styrktar Mæðrastyrksnefnd fyrir jólin og nú fyrir stuttu tónleikar á Siglufirði með Karlakór Akureyrar-Geysi og Karlakór Siglufjarðar.

Nú er komið að fjórðu tónleikunum, en það eru hinir árlegu vortónleikar sem að þessu sinni verða haldnir í Laugarborg þann 28. maí.

Kórinn stefnir í ágúst á sína þriðju tónleikaferð til útlanda. Árið 2005 var farið til Slóveníu, 2008 til Eistlands en nú er förinni heitið á Íslendingaslóðir í  Kanada. Kórinn mun koma fram á Íslendingadeginum í Gimli en heldur auk þess tónleika í Riverton og Minneapolis.

Söngskráin á tónleikunum er afar fjölbreytt og má þar finna bæði íslensk og erlend lög, allt frá þjóðlögum til nýrra tónsmíða og þarna má m.a. finna sýnishorn af því sem kórinn ætlar að flytja fyrir frændur okkar í Vesturheimi. Má þar m.a. nefna Ísland ögrum skorið, God save the Queen, ítalska lagið Con te Partiro, þjóðsöng Kanada og Haust á Akureyri, en það er lag og ljóð Akureyringanna Birgis Helgasonar og Arnar Snorrasonar.

Í upphafi og á milli laga á tónleikunum verða smá innslög með ýmsum fróðleik sem tengjast Vestur-Íslendingum á einhvern hátt. Stjórnandi Kvennakórs Akureyrar er Daníel Þorsteinsson og mun hann einnig annast undirleik.

Tónleikarnir verða haldnir í Laugarborg annan í hvítasunnu, þann 28. maí kl. 15:00. Miðaverð er 2000 krónur, en frítt fyrir 14 ára og yngri. Því miður er ekki hægt að taka við greiðslukortum en að tónleikum loknum verður gestum boðið upp á kaffi og vöfflur.