Landssamband íslenskra Kvennakóra

Kvennakór Suðurnesja fagnar vori með tónleikum í Bíósal Duushúsa mánudaginn 30. apríl og fimmtudaginn 3. maí. Tónleikarnir hefjast kl. 20 báða dagana. Á tónleikunum flytur kórinn úrval íslenskra og erlendra laga sem senda sumaryl í hjörtu þeirra sem á hlýða. Þar á meðal eru tvö lög eftir Hrafnhildi Bryndísi Rafnsdóttur sem er félagi í kvennakórnum. Einnig munu einsöngvarar úr röðum kórsins flytja nokkur lög, en það eru þær Birta Rós Arnórsdóttir, Steinunn Björg Ólafsdóttir og Una María Bergmann.

Helgina 19. - 20. maí ætlar kórinn síðan að halda í ferðalag á Snæfellsnes og munu kórkonur ylja Snæfellingum með söng sínum auk þess að skoða sig um á þessu fallega svæði.

Stjórnandi kórsins er Dagný Þórunn Jónsdóttir og meðleikari á píanó er Geirþrúður Fanney Bogadóttir.

Miðaverð á tónleikana er 2.000 kr. við innganginn en hægt er að kaupa miða í forsölu á 1.500 kr. hjá kórkonum. Einnig er hægt að hringja og panta miða í síma 8974776 og 8987744 eða senda tölvupóst á netfangið kvennakorsudurnesja@gmail.com.

Kvennakórinn Uppsveitasystur var stofnaður á vordögum 2006, nánar tiltekið þann 24. apríl, með það að markmiði að konur gætu komið saman til að syngja og skemmta sér. Kórinn hefur komið reglulega fram á tónleikum við ýmis tilefni og tekið þátt í kóramótum, síðast í fyrravor á Selfossi.

Kórinn syngur allskonar tónlist og hefur fengið allskonar hljóðfæraleikara og einsöngvara til liðs við sig. Þetta vorið verða tónleikar Uppsveitarsystra miðvikudagskvöldið 2. maí kl. 20:30 í Félagsheimilinu á Flúðum og koma fram með kórnum dansarar, einsöngvari og hljóðfæraleikari. Heiti tónleikanna er "Uppsveitasystur í tangó takti".

Nú eru starfandi 20 konur í kórnum. Formaður kórsins er Sigríður Runólfsdóttir og stjórnandi Gróa Hreinsdóttir.

Nú líður senn að lokum vetrarstarfs Jórukórsins. Hann ætlar að ljúka vetrinum með tvennum tónleikum í Selfosskirkju, sunnudaginn 29. apríl kl. 17.00 og þriðjudaginn 1. maí kl. 20.00.
Efnisskrá kórsins að þessu sinni er afar fjölbreytt því kórinn hefur í vetur verið að spreyta sig örlítið á háklassískri tónlist, eftir til dæmis Schubert og Vivaldi. Auk þess fer kórinn á kunnuglegar slóðir þar sem meiri léttleiki ræður ríkjum og alla leið yfir í netta jazzsveiflu. Félagar úr kórnum koma einnig fram og syngja bæði sóló og í minni hópum.
Stjórnandi kórsins er Helena R. Káradóttir og undirleikari á píanó er Þórlaug Bjarnadóttir. Einnig leika með kórnum þeir Smári Kristjánsson á kontrabassa og Örlygur Benediktsson á klarínett. Hlökkum til að sjá ykkur á skemmtilegum tónleikum.

Kvennakór Hornafjarðar var stofnaður 9. september 1997 en áður söng kórinn í eitt ár undir nafni Leikfélags Hornafjarðar. Kórinn hefur starfað af fullum krafti öll þessi ár. 

Stjórnandi kórsins er Heiðar Sigurðsson. Undirleikari er, og hefur verið frá stofnun kórsins, Jónína Einarsdóttir. 

Fjöldi kórfélaga í gegnum árin hefur verið á bilinu 20 - 45. Lagaval hefur verið mjög fjölbreytt og einkennst af léttleika og áskorunum.

Stærsta verkefni kórsins til þessa er vafalítið sjöunda landsmót íslenskra kvennakóra sem haldið var á Höfn í apríl 2008.  Undirbúningur mótsins krafðist mikillar vinnu og skipulagningar. Á það mót komu um 350 konur. Kóramótið var mikill viðburður hér á Höfn í Hornafirði. Kórkonur stóðu þétt saman, ásamt mökum sínum, í að gera mótið sem eftirminnilegast.

Konur í Kvennakór Hornafjarðar eru sammála um að það er gaman að syngja og að syngja með öðrum er enn skemmtilegra. Þær leggja nú land undir fót og ætla að veita höfuðborgarbúum tækifæri til að hlýða á vorprógramm sitt í Árbæjarkirkju laugardaginn 21. apríl kl 15.00. Með í för eru einnig hornfirskir hljóðfæraleikarar sem munu leika undir á ýmis hljóðfæri.

Aðgangseyrir er 1500 kr. Allir velkomnir.

Vortónleikar kórsins verða svo í Hornafirði 3. maí.