Landssamband íslenskra Kvennakóra

Vortónleikar Kvennakórs Háskóla Íslands verða í Hátíðarsal Háskólans sumardaginn fyrsta, fimmtudaginn 19. apríl,  kl. 16.00. 
Kórinn skipa um 30 nemendur háskólans. Stjórnandi kórsins er Margrét Bóasdóttir.

Fyrri hluti tónleikanna er fjölbreytt úrval íslenskra vor- og sumarlaga og seinni hlutinn forvitnileg og glæsileg kórlög frá 10 þjóðlöndum; m.a, Venezuela, Brasilía, Japan, Spánn, Þýskaland, Ungverjaland og Norðurlöndin. Flest lögin eru sungin á frummálinu.
Þessi glæsilegi hópur bæði syngur, leikur á hljóðfæri, kynnir lögin og býður upp á kaffi og heimabakað meðlæti í hléi!

Einsöngur: Anna Sólveig Árnadóttir, Auður Örlygsdóttir og Bryndís Erlingsdóttir
Fiðlur: Auður Ýr Sigurðardóttir og Elín Rún Birgisdóttir
Klarinett: Elísa G. Brynjólfsdóttir og Kristín Þóra Pétursdóttir
Trompet: Ingibjörg Rúnarsdóttir
Píanó: Marie Huby

Aðgangseyrir: 2000 kr./1500 kr. fyrir námsmenn.
Miðasala við innganginn og hjá kórfélögum.

Kvennakórinn Léttsveit Reykjavíkur heldur tvenna tónleika í Gamla bíói þann 19. apríl næstkomandi sem ber upp á sumardaginn fyrsta. Tónleikarnir verða kl. 14:00 og kl. 17:00. 
Í ár eru liðin 100 ár frá fæðingu Guðmundar Sigurðssonar, sem var einn fremsti revíu- og gamanvísnahöfundur Íslands á 20. öld, og í tilefni þess verður yfirskrift  þessara tónleika „Revíur og rómantík“.  Flestir Íslendingar sem komnir eru til ára sinna muna einnig eftir Haraldi Á. Sigurðssyni revíuleikara en kórinn syngur lög úr gömlum revíum eftir þessa horfnu heiðursmenn. Á dagskránni verða einnig lög frá stríðsárunum og nýrri dægurlög eftir þau Röggu Gísla, Bubba og Mugison ásamt íslenskum sönglögum sem minna okkur á sumarkomuna. 
Einsöngvarar eru tvær ungar söngkonur, Kristín Birna Óðinsdóttir sem var fulltrúi Póstsins og söng svo skemmtilega til styrktar Geðhjálpar um jólin síðustu og Lilja Björk Runólfsdóttir sem er útskrifuð úr djassdeild F.Í.H. og leggur stund á tónsmíðanám í Listaháskóla Íslands.  Hljómsveitina skipa auk Aðalheiðar Þorsteinsdóttur píanóleikara, Gunnar Hrafnsson bassaleikari og Kjartan Guðnason trommuleikari.
Stjórnandi er Jóhanna Þórhallsdóttir. Þess má geta að þetta verða síðustu tónleikar Jóhönnu með kórnum en hún lætur nú af störfum eftir 17 ára farsælt starf sem stjórnandi Léttsveitarinnar. Miðaverð er 3.500 krónur.
Miðar eru seldir á midi.is og í miðasölu Gamla bíós.

Domus vox heldur tvenna tónleika í Norðurljósasal Hörpu á sumardaginn fyrsta, þann 19. apríl kl. 14 og 16.
Inntak tónleikanna er óður til lands og þjóðar þar sem sumarkomunni er fagnað með  flutningi úrvals íslenskra söng- og ættjarðarlaga. 
Listrænn stjórnandi er Margrét J. Pálmadóttir sem færir nú fram það fjölskrúðuga menningarstarf sem Sönghúsið Domus vox hefur fóstrað. Einsöngvarar sönghússins, kvennakórarnir Vox feminae og Cantabile ásamt Stúlknakór Reykjavíkur stilla saman strengi sína og syngja við undirleik hljómsveitar Agnars Más Magnússonar.
Margrét J. Pálmadóttir, söngkona og kórstjóri, stofnaði Sönghúsið Domus vox haustið 2000. Skólinn skartar öflugu stúlkna- og kvennakórastarfi og þar er einnig starfrækt ört vaxandi einsöngsdeild sem opin er jafnt körlum sem konum. Stúlknakór Reykjavíkur hefur vaxið og dafnað frá stofnun árið 1994 en kórinn skipa nú 120 stúlkur á aldrinum fimm til nítján ára. Þá hafa kvennakórarnir Cantabile og Vox feminae lifað blómlegu sönglífi hátt á annan áratug. Efnisval kvennakóranna hefur einkennst af trúarlegri tónlist og íslenskum þjóð- og sönglögum en jafnframt hefur  Vox feminae lagt sérstaka rækt við samtímatónlist eftir íslensk tónskáld.
Söngfólk Domus vox mun fylla Norðurljósasal Hörpunnar söng á sumardaginn fyrsta. Má þar heyra margar þær perlur sem yljað hafa íslenskri þjóð gegnum tíðina og hér gefst tónleikagestum tækifæri til að syngja inn sumarið með kórunum.
Hægt er að nálgast miða í Domus vox á Laugarvegi 116 og á midi.is.

Kvennakór Kópavogs heldur upp á tíu ára starfsafmæli með veglegum tónleikum í Salnum í Kópavogi á sumardaginn fyrsta, 19. apríl, kl. 20:00.

Þar munu ástin og vorið svífa yfir vötnum og bægja frá vetri og kulda en kórinn mun flytja alíslenska dagskrá sem spannar allt frá þjóðlögum til dægurlaga samtímans.

Stjórnandi Kvennakórs Kópavogs er Gróa Hreinsdóttir og undirleikari er Helgi Már Hannesson.

Aðgangseyrir er 2.500 kr. og miðar eru seldir á midi.is.