Freyjukórinn býður upp á sælkeramáltíð og glæsiball með ítölsku sniði í Hjálmakletti í Borgarnesi síðasta vetrardag, 18. apríl. Skemmtun þessi er liður í undirbúningi fyrir fyrirhugaða ferð kórsins til Ítalíu í júní.

Boðið verður upp á fordrykk og 5 rétta máltíð. Yfirkokkur er Gísli, sem gjarnan er nefndur "Mr. Gourmet" og veislustjóri er Sveinbjörn Eyjólfsson "progressisti".

Freyjukórinn syngur, leynigestir troða upp, boðið verður upp á uppistand og fleira til skemmtunar.

Hljómsveit Marinós spilar fyrir danssveiflu fram á rauða nótt.

Húsið opnar kl. 20:00. Miðaverð er 4.500 kr. Miðapantanir í símum: 893 3109 Jói, 843 5355 Jón og 861 3260 Siggi.

Lesa meira

Kvennakór Breiðholts-Valkyrjurnar ætla að standa fyrir söngskemmtun laugardaginn 14. apríl í Árskógum kl. 16:00 ásamt fleiri góðum gestum, þar sem setið verður til borðs og boðið upp á kaffi og vöfflur á meðan kórinn flytur ýmis skemmtileg lög, m.a. eighties lög og sitthvað fleira.

Með kórnum koma fram Breiðhyltingurinn Elvar Þór Steinarsson sem gaf út disk nú fyrir skömmu og söngkonurnar Kristín R. Sigurðardóttir sópran, Oddný Óskarsdóttir sópran, Rós Ingadóttir sópran, Lára Aðalsteinsdóttir sópran, Dagbjört Andrésdóttir sópran og Sesselja Friðriksdóttir.

Sérstakur heiðursgestur er Halli Reynis trúbador.

Stjórnandi kórsins er Kristín R. Sigurðardóttir og undirleikari er Elín Halldórsdóttir.

Miðaverð er kr. 1500 og verða seldir miðar við innganginn.

Lesa meira

Kvennakór Breiðholts - Valkyrjurnar var stofnaður á síðasta ári og hafa þær sótt um inngöngu í Gígjuna, landssamband íslenskra kvennakóra en umsóknin verður tekin fyrir á næsta stjórnarfundi Gígjunnar. Má telja öruggt að umsóknin verði samþykkt.

Kvennakór Breiðholts er með eighties þema þetta árið og mun enda á vortónleikum þar sem á dagskránni verða bæði íslensk og erlend lög frá eighties áratugnum.
 
Kórinn vill hins vegar ekki binda sig endilega einvörðungu við  dægurtónlist í framtíðinni og vill syngja allt á milli himins og jarðar, allt frá madrigölum upp í lög til dagsins í dag, sem sagt hafa frjálst lagaval.
 
Kórinn var stofnaður 25. maí 2011 og hóf síðan starfsemi í september.  Ekki hefur skort verkefni, en kórinn hafði nóg að gera fyrir áramót;
 
Fyrstu tónleikar kórsins voru á Breiðholtsdögum þann 18. nóvember í Sundlaug Breiðholts á svokölluðu "Kvennasundi", þar sem þær komu fram með hljómsveit sem kallar sig "Sundhetturnar" úr Breiðholti.
 
Aðrir tónleikar sem þær sungu á voru einnig liður í Breiðholtsdögum og voru haldnir í Fella- og Hólakirkju þann 22. nóvember en það voru góðgerðartónleikar til styrktar Grensás, og sungu þær ásamt fleira góðu fólki svo sem Ragnari Bjarnasyni, Þorgeiri Ástvalds, Svavari Knúti, Karlakór Kjalnesinga, Gerðubergskórnum og fleira góðu listafólki.
 
Jólatónleikarnir Valkyrjanna voru síðan "Gleði og friðarjól" í Hallgrímskirkju þann 8.desember sem voru góðgerðartónleikar til styrktar Fjölskylduhjálp Íslands og Rauða krossinum, en þar komu einnig fram hið vinsæla söngvaskáld Magnús Eiríksson, rappararnir Ástþór Óðinn og KFB, Vocal Project, Barnakór Háteigsskóla, Femmes fatales og Kammerkór Reykjavíkur.
 
Nú í vor þann 12. maí verða Valkyrjurnar með tónleika í Fella- og Hólakirkju kl. 17:00 þar sem kórinn mun flytja lög frá áttunda áratugnum eins og áður sagði, og fá óvænta góða gesti sér til liðs.
 
Kórinn verður með æfingabúðir á Hótel Hlíð 9. -11. mars, og æfir alla mánudaga í Hólabrekkuskóla kl. 17:30, en á æfingum hefur verið sungið af mikilli gleði, mikið hlegið og gaman í kaffipásum og jákvæður andi.
 
Það verða einnig nokkrar uppákomur sem kórinn hyggst halda, svo sem kaffitónleikar ásamt ýmsum upprennandi listamönnum, auk þess sem kórinn mun syngja á árshátíðum og einhverjum skemmtunum ma. í Breiðholti og víðar svo eitthvað sé nefnt.
 
Það er takmark hjá kórnum að fjölga meðlimum um helming fyrir vortónleika, og því bjóða þær hressar og söngvísar konur hjartanlega velkomnar í kórinn. Áhugasamar eru beðnar að hafa samband við Sesselju Barðdal í síma 863 3933, en eins má skrá sig á facebókarsíðu Valkyrjanna.
 
Kórstjóri er Kristín R. Sigurðardóttir en undirleikur er í höndum Elínar Halldórsdóttur.

Lesa meira

Boðað er til vinnuhelgar með Kristjönu Stefánsdóttur, djass söngkonu, þar sem öllum syngjandi konum á Vesturlandi er velkomið að taka þátt. 

Söngbúðirnar verða í Hjálmakletti í Borgarnesi helgina 3.-4. mars 2012. Þátttakendur munu læra og æfa söng undir stjórn Kristjönu Stefánsdóttur. 

Markmiðið er að:

  1. Efla söng og þjálfun meðal kvenna á Vesturlandi. Dýpka og breikka sviðið með því að einbeita sér að ákveðnum þætti tónlistar; djassinum og kalla til aðstoðar eina færustu djass söngkonu landsins, Kristjönu Stefánsdóttur.
  2. Að hvetja ungar konur til að ganga til liðs við kóra á Vesturlandi til að tryggja endurnýjun með því að bjóða þeim upp á söngdagskrá sem ætti að höfða til þeirra.
  3. Að kalla til samstarfs konur víðsvegar að úr landshlutanum.
  4. Að gefa konum sem syngja í blönduðum kórum kost á að æfa og syngja með kvennakór.
  5. Að sýna afrakstur starfsins með tónleikahaldi
  6. Að kynna hið öfluga kórastarf sem fram fer á Vesturlandi

Dagskrá:

Laugardagur 3. mars:

Mæting kl. 9-10

Kl.10 Söngæfingar

Kl. 12-13 Hádegishlé

Kl. 13-17 Söngæfing

Kl. 19 Hátíðarkvöldverður, valfrjálst, greiðist sér

Sunnudagur 4. mars:

Kl.10-12 Söngæfingar

Kl. 12-13 Hádegishlé

Kl. 13-15  Söngæfingar

Kl. 17 Tónleikar í Hjálmakletti í Borgarnesi.

Síðan er ætlunin að halda 3 til 4 tónleika; á Akranesi, í Reykjavík, á Snæfellsnesi og mögulega aðra í Borgarfirði. Þátttaka í tónleikunum er valfrjáls en auðvitað verður þetta bara gaman og við vonum að allar söngkonur taki þátt þegar þær geta.  

"Syngjandi konur á Vesturlandi" verður frábær samstarfsvettvangur fyrir konur á Vesturlandi sem elska að syngja. Hópurinn með Kristjönu í fararbroddi mun læra og leika, halda nokkra tónleika með það að markmiði að efla tónlistarlíf, fjölbreytileika og samstöðu syngjandi kvenna á Vesturlandi. Öllum syngjandi konum er velkomið að taka þátt í verkefninu.

Undirbúningur, skipulag og stjórn verkefnisins er í höndum Freyjukórs. Fjármögnun er í gegnum þátttökugjöld og styrki.  Menningarráð Vesturlands styrkir verkefnið.

Kostnaður:

Þátttökugjald: 10.000 kr. (Þátttakendur fá nótur sendar til að æfa fyrirfram)

Hádegismatur og síðdegishressing í tvo daga 2.000 kr

Hátíðarkvöldverður (valfrjálst) 4.000 kr

Þær konur sem vilja gista á staðnum (Borgarnesi og nágrenni) hafa sjálfar samband við gististaði og panta gistingu.  Þá staði sem benda má á eru Hótel Borgarnes, Farfuglaheimilið í Borgarnesi, Hótel Hamar, Borgarnes B&B, Bjarg, Hvíti Bærinn. Fleiri staði má finna í nágrenninu.

Skráning:

Skráning fer fram í gegnum vefslóðina www.vefurinn.is/freyjur  fyrir 13. febrúar 2012.  Hver og ein kona þarf að skrá sig; ekki hægt að skrá margar í einu.  Fylla þarf út allar upplýsingar: Nafn, kennitala, nafn á kór (ef það á við), þátttaka í hátíðarkvöldverði og þátttaka í hádegisverðum og kaffi.

Þátttakendur skrá sig með bindandi staðfestingargjaldi 4000 kr. sem er óafturkræft á reikninginn 0354-26-2738 kt. 690497-2049

Lesa meira

Eldri fréttir