Landssamband íslenskra Kvennakóra

Jóladiskur Kvennakórs Hornafjarðar er kominn út. Á disknum eru tíu jólalög úr ýmsum áttum. Titillag disksins er Jólalogi, eftir Heiðar Sigurðsson stjórnanda kórsins við texta Kristínar Jónsdóttur. Einnig er þar að finna lag Sigjóns Bjarnasonar Með ljúfum klukknakliði við texta Guðbjarts Össurarsonar. Það lag hefur verið á efninsskránni hjá kórnum fyrir hver jól frá því Sigjón var stjórnandi kórsins. Píanó og orgelleik á disknum annast Jónína Einarsdóttir en annar undirleikur er í höndum Heiðars. Auk þessara hornfirsku laga eru á disknum meðal annars lögin Nóttin var sú ágæt ein, Yfir fannhvíta jörð og Hvít jól.

Diskurinn kostar 2500 kr. og er til sölu hjá kvennakórskonum.

Gígjan, landssamband íslenskra kvennakóra óskar félögum í aðildarkórum sambandsins gleðilegra jóla, blessunar og friðar með þökk fyrir samstarfið á árinu sem er að líða. Megi nýja árið verða gott til handa kvennakórum landsins og starf þeirra vaxa og dafna með hækkandi sól. 

Kórar sönghússins Domus Vox efna til tvennra aðventutónleika í Hallgrímskirkju nk. miðvikudagskvöld, þann 14. desember kl. 18:00 og 20:30. Vox feminae, Cantabile, Stúlknakór Reykjavíkur, ásamt einsöngvurum og hljómsveit, fagna komu ljóssins með flutningi fagurrar jólatónlistar. Listrænn stjórnandi er Margrét J. Pálmadóttir.  

Yfirskrift tónleikanna er Kom ljóssins engill enda er yfirbragð tónleikanna með hugljúfum helgibrag. Kórarnir  telja yfir 200 stúlkubörn og konur á öllum aldri sem allar hafa notið listfengis Margrétar J. Pálmadóttur og annarra kennara hússins við undirbúning þessa árlega hátíðarviðburðar Sönghússins Domus vox.  Einsöngvarar eru þau Hanna Björk Guðjónsdóttir sópran og Maríus Sverrisson barítón. Hljóðfæraleik annast Antonia Hevesi, Eydís Franzdóttir, Hallfríður Ólafsdóttir og Stefanía Ólafsdóttir. Guðrún Árný Guðmundsdóttir stjórnar tveimur yngstu deildum Stúlknakórsins.

Flutt verða bæði kirkjuleg verk og þekktar jólaperlur sem kalla fram ljúfar minningar í hugum áheyrenda.  Seinni tónleikarnir eru haldnir Verndarenglum Domus vox til heiðurs. Allir þeir sem standa vilja vörð um starfsemi eina kvennasönghúss landsins eiga kost á að gerast verndarenglar og eru velkomnir meðan húsrúm leyfir. Hægt er að nálgast miða í Domus vox, Laugavegi 116, í síma 511 3737,  hjá kórfélögum og við innganginn.

Kvennakór Hornafjarðar heldur sína árlegu jólatónleika í Mánagarði miðvikudaginn 7. des  kl 20.00. Á efnisskránni verða flutt  jólalög og ljóð úr ýmsum áttum sum gömul og þekkt, en önnur nýrri. Til dæmis verða flutt tvö lög og ljóð eftir hornfirska höfunda.  Annars vegar er það Með ljúfum klukknakliði eftir Sigjón Bjarnason við texta Guðbjarts Össurarsonar og hins vegar Jólalogi eftir Heiðar Sigurðsson við texta Kristínar Jónsdóttur.

Að tónleikunum loknum er svo komið að hinu margrómaða kaffihlaðborði Kvennakórsins. Það verður að venju hlaðið tertum, brauðréttum og öðru góðgæti. Aðgangseyrir á tónleikana og hlaðborðið er kr 2.000,- en frítt fyrir 12 ára og yngri í fylgd með fullorðnum.

Kvennakórinn hefur staðið í ströngu síðustu vikurnar og hefur nú lokið við upptökur á jólageisladiski sem mun koma út á næstu dögum. Diskurinn verður til sölu hjá kórkonum sjálfum og er nú þegar farið að taka niður pantanir á honum. Heiðar Sigurðsson stjórnandi kórsins sá um upptökur og Jónína Einarsdóttir er undirleikari á geisladiskinum og eins á tónleikunum.