Landssamband íslenskra Kvennakóra

Léttsveit Reykjavíkur heldur sína sívinsælu aðventutónleika í Eldborgarsal Hörpu fyrsta sunnudag í aðventu, 27. nóvember kl. 16. 130 konur syngja nú með Léttsveitinni sem er áreiðanlega stærsti kór landsins. Með Léttsveitinni að þessu sinni koma fram einsöngvararnir Valgerður Guðnadóttir, Hildigunnur Einarsdóttir og Ívar Helgason en þau eru öll af kynslóð ungra söngvara sem hafa getið sér gott orð í tónlistarlífi landsins. Hljómsveit kórsins skipa fiðluleikarinn Gréta Salóme Stefánsdóttir, Tómas R. Einarsson bassaleikari, Kjartan Guðnason trommuleikari og Aðalheiður Þorsteinsdóttir píanóleikari og hljómsveitarstjóri. Stjórnandi á tónleikunum er Jóhanna V. Þórhallsdóttir. Á dagskránni verða gömul og ný jólalög m.a. lag eftir dr. Þórunni Guðmundsdóttur. Hluti dagskrárinnar er til heiðurs Ingibjörgu Þorbergs og mun kórinn syngja nokkur af hennar yndislegu lögum, og jafnframt frumflytja eftir hana nýtt lag. Ingibjörg mun verða heiðursgestur Léttsveitarinnar á tónleikunum. Miðasala er á midi.is og harpa.is

Kvennakór Akureyrar hefur starfað síðan 2001 og heldur því upp á 10 ára afmæli sitt í ár. Kórinn hefur á að skipa öflugum og skemmtilegum konum á öllum aldri sem eiga það sameiginlegt að hafa gaman af því að syngja saman, fyrir sig og aðra.

Kórinn tekst á við skemmtileg og ögrandi verkefni af ýmsu tagi og íslensk tónskáld eru honum einkar hugleikin. Kórinn æfir einu sinni í viku og aukaæfingar eru haldnar eftir þörfum. Tónleikar eru haldnir nokkrum sinnum á ári og farið í söngferðalög reglulega utan sem innanlands. Sumarið 2012 stefnir kórinn á Íslendingaslóðir í Kanada og svo mun kórinn takast á við það skemmtilega verkefni að halda Landsmót Kvennakóra árið 2014. Því er í nógu að snúast hjá Kvennakór Akureyrar.

Í tilefni af afmælinu heldur kórinn tónleika n.k. laugardag þann 19. nóvember í Hömrum, Hofi kl. 15:00. Þar mun kórinn stikla á stóru yfir þessi 10 viðburðaríku ár og flytja lög sem spanna sögu kórsins. Einnig  mun kórinn frumflytja afmælislagið Árstíðirnar eftir texta Önnu Dóru Gunnarsdóttur kórfélaga við lag Daníels Þorsteinssonar stjórnanda kórsins. Með kórnum á tónleikunum spilar hljómsveit skipuð Aladár Rácz á píanó, Pétur Ingólfsson á kontrabassa og Emil Þorri Emilsson á slagverk.

Miðaverð á tónleikana er kr. 2000 og hægt að kaupa miða á www.menningarhus.is eða í afgreiðslunni í Hofi. Frítt er fyrir 14 ára og yngri.

Að tónleikunum loknum eða um kvöldið verður skemmtun í félagsheimilinu Hlíðarbæ, rétt utan Akureyrar, þar sem kórfélagar, stjórnendur og gestir borða saman, skemmta sér og rifja upp söguna í máli og myndum.

Kvennakór Öldutúns og Kvennakór Háskóla Íslands halda sameiginlega tónleika í Hafnarfjarðarkirkju sunnudaginn 20. nóvember. Yfirskrift tónleikanna er Laudate og verður flutt kirkjutónlist frá 10 löndum; Íslandi, Ítalíu, Rússlandi, Þýskalandi, Frakklandi, Austurríki, Englandi, Brasilíu, Kanada og Finnlandi.

Stjórnendur kóranna eru Brynhildur Auðbjargardóttir og Margrét Bóasdóttir. Organisti er Lenka Mátéová.

Tónleikarnir hefjast kl. 16 og er aðgangseyrir kr. 1500.

Sunnudaginn 6. nóvember n.k. mun Kvennakór  Kópvogs, í samstarfi við Digraneskirkju, standa fyrir tónleikum til styrktar Mæðrastyrksnefnd Kópavogs. Þetta er þriðja árið í röð sem Kvennakór Kópavogs stendur fyrir slíkum tónleikum undir yfirskriftinni Hönd í hönd. Auk Kvennakórs Kópavogs, sem syngur nú í fyrsta skipti undir stjórn nýs kórstjóra, Gróu Hreinsdóttur, mun fjöldi frábærra tónlistarmanna koma fram og skemmta gestum. Þeir sem stíga á stokk eru: Gissur Páll Gissurarson, Sigríður Thorlacius og Guðmundur Óskar Guðmundsson úr Hjaltalín, Sigurður Guðmundsson úr Hjálmum, Sönghópurinn Spectrum og Ingveldur Ýr, Ólöf Jara Skagfjörð og Hulda María Halldórsdóttir sem syngur á táknmáli. Einnig ætla félagar úr Skólahljómsveit Kópavogs, Vallargerðisbræður og Drengjakór Hafnarfjarðar að leggja okkur lið. Ræðumaður verður Gunnar Sigurjónsson prestur í Digraneskirkju.   

Allir listamenn svo og aðrir sem koma að skipulagningu og framkvæmd tónleikanna gefa vinnu sína og miðaverð rennur því óskipt til Mæðrastyrksnefndar Kópavogs.

Við hvetjum alla til að leggja hönd á plóginn og mæta á tónleikana, njóta góðrar skemmtunar og styrkja í leiðinni gott málefni. Tónleikarnir verða haldnir í Digraneskirkju þann 6. nóvember n.k. kl. 16:00 og er áætlað að þeim ljúki um kl. 18:00. Hægt er að panta miða með því að senda póst á netfangið hondkk@gmail.com. Einnig verður hægt að kaupa miða við innganginn meðan húsrúm leyfir. Aðgangseyrir er 2.500 kr.