Landssamband íslenskra Kvennakóra

Haustmarkaður KvAk verður haldinn 10. september í Hlöðunni að Hömrum (tjaldstæðinu / útilífsmiðstöð skáta) eins og í fyrra. Stefnt er á að þetta verði með líku sniði og undanfarin ár, til sölu verður ýmislegt nytsamlegt og ætt, til dæmis handverk, fatnaður, fjallagrös og annar jarðargróður og hvaðeina sem kórkonum dettur í hug að selja. Það verður heitt á könnunni og ekki er ólíklegt að kórinn dragi upp hljóðfæri og taki lagið á léttari nótunum. Markaðurinn verður opinn frá kl. 13 til 17.

Vetrarstarfið hefst hjá Kvennakór Akureyrar með fyrstu æfingu n.k. sunnudag 4. september kl. 17:00 í Brekkuskóla og framundan er spennandi og viðburðaríkur vetur.
Nýjar raddir eru sérstaklega boðnar velkomnar og raddprófanir fara fram 4. og 11. sept. kl. 16:15.  Stjórnandi er sem fyrr Daníel Þorsteinsson en nýr formaður er Una Þórey Sigurðardóttir.

Kvennakór Suðurnesja býður konum á Suðurnesjum sem hafa áhuga á að syngja i kór á opna æfingu mánudagskvöldið 5. september kl. 20. Æfingar kórsins eru haldnar í Listasmiðjunni á Ásbrú á mánudögum kl. 20 og raddæfingar á sama tíma á miðvikudögum. Þær konur sem ekki komast á opnu æfinguna en hafa þó áhuga á að starfa með kórnum eru velkomnar á æfingu hvenær sem þær vilja.
Það er ýmislegt framundan í vetur, haldnir verða jólatónleikar og vortónleikar, farið í æfingabúðir og næsta vor ætlar kórinn í söngferð til Færeyja.
Kórinn tók þátt í Ljósanótt sem lýkur í dag, sunnudaginn 4. september. Á föstudagskvöldið var viðburðurinn "Klikkaður kærleikur" haldinn í Víkingaheimum og var eftirfarandi umfjöllun á vf.is í gær:
"Tískusýning á Suðurnesjafatnaði undir töfratónum þungarokks og kvennakórs sló í gegn í Víkingaheimum á Ljósanótt í Reykjanesbæ í gærkvöldi.
Klikkaður kærleikur var nafn dagskrárinnar sem var hugmynd þeirra Spiral-systra Írisar Jónsdóttur og Ingunnar E. Yngvadóttur ásamt þeim Guðnýju Kristjánsdóttur og Davíð Óskarssyni en þau tvö síðastnefndu hafa verið tengd starfsemi Leikfélags Keflavíkur í langan tíma.
Sýningarhópur Spiral hönnunar sýndi nýjan fatnað undir tónlist Deep Jimi en með þeim sem og einn og sér söng Kvennakór Suðurnesja. Umhverfið með Víkingaskipið Íslending var afskaplega skemmtilegt og gestir sem troðfylltu Víkingaheima skemmtu sér vel á þessari óvanalegu en skemmtilegu uppákomu."
Á laugardaginn var tónleikasyrpan "Syngjandi sveifla" í Duushúsum þar sem kórinn söng fyrir troðfullum Bíósal.
Það er því margt skemmtilegt sem kórinn tekur sér fyrir hendur og tilvalið fyrir söngglaðar konur að drífa sig í kórinn núna.

Ljósanótt 2011 er haldin í Reykjanesbæ dagana 1. - 4. september og tekur Kvennakór Suðurnesja þátt í hátíðinni nú sem endranær.

Það sem einkennir Ljósanótt í ár meira en Ljósanótt síðustu ára eru öll þau stóru og yfirgripsmiklu verkefni sem alfarið eru unnin af heimamönnum. Í ár eru fjölmörg stór atriði á dagskrá Ljósanætur sem alfarið eru sett saman og unnin af heimafólki.

Eitt þessara atriða verður „Klikkaður kærleikur“ sem settur verður upp í Víkingaheimum föstudagskvöldið 2. september kl. 21.

Klikkaður kærleikur er kynnt sem tískusýning og tónleikar í Víkingaheimum, öðruvísi sýning þar sem teflt verður saman tónlist, leiklist, myndlist og hönnun.
Þeir sem koma fram eru: Deep Jimi and the Zep Creams, Kvennakór Suðurnesja, Leikfélag Keflavíkur, Lína Rut og Spiral hönnun svo eitthvað sé nefnt. Húsið opnar kl. 20:30 og eru allir hjartanlega velkomnir.
Afrakstur kvöldsins mun renna í sérstakan styrktarsjóð sem nefnist "Kærleiksbörn" en hann hefur verið stofnaður með það fyrir augum að styrkja börn m.a. vegna veikinda eða fötlunar sinnar.
Sérstök einkennisfígúra Klikkaðs kærleika verður hinn svokallaði „Happy face“ sem er skapaður af listakonunni Línu Rut. Mun fígúran m.a. prýða boli sem seldir verða á hátíðinni til styrktar Kærleiksbörnum.

Kvennakór Suðurnesja mun einnig syngja á tónleikum í Bíósal Duushúsum laugardaginn 3. september kl. 16.30, en tónleikasyrpa verður í Duushúsum á laugardaginn frá kl. 14.30 - 17.30 en auk Kvennakórsins koma þar fram Karlakór Keflavíkur, Félag harmonikkuunnenda, Söngsveit Suðurnesja, brasilíska söngkonan Jussanam Da Silva og Söngsveitin Víkingarnir.

Margt fleira verður á dagskrá hátíðarinnar alla dagana sem hún stendur, s.s. tónleikar, listasýningar, íþróttakeppnir, bíla- og bifhjólasýning, tískusýningar, dansleikir og margt fleira að ógleymdri hinni glæsilegu flugeldasýningu og tendrun ljósanna á Berginu á laugardagskvöldinu.

Dagskrá Ljósanætur í heild sinni er á heimasíðu hátíðarinnar, ljosanott.is.