Kvennakór Hafnarfjarðar getur bætt við sig konum sem hafa áhuga á að syngja í skemmtilegum félagsskap. Raddprófun fer fram í Tónlistarskóla Hafnarfjarðar fimmtudaginn 1. september kl. 19. Stjórnandi kórsins er Erna Guðmundsdóttir.
Nánari upplýsingar gefa:
Hulda Björnsdóttir, sími 849-4153
Arnfríður Arnardóttir, sími 856-6559
kvennakor.hafnarfjardar@gmail.com
Dagana 13. til 20. júní næstkomandi heldur kvennakórinn Vox feminae í langþráða tónleikaferð til Ítalíu.
Í tilefni ferðarinnar verða haldnir kveðjutónleikar í Dómkirkjunni mánudaginn 30. maí.
Tónleikarnir bera yfirskriftina “Yl og trú andar þú” en á efnisskránni eru trúarleg verk eftir íslenska og erlenda höfunda, verk sem hljóma munu í ítölskum kirkjum og tónleikasölum.
Stjórnandi er Margrét J. Pálmadóttir og undirleikari er Antonía Hevesi.
Á Ítalíu mun Vox feminae halda tónleika í Verona, Piacenza og í Feneyjum, þar sem kórinn mun einnig syngja við messu í Markúsarkirkjunni. Þá mun kórinn taka lagið við nokkur önnur tilefni á ferðalaginu.
Margrét Pálmadóttir nam söng á Ítalíu og hefur hún staðið fyrir ferðum til Ítalíu sem margir kórfélagar hafa tekið þátt í. Þetta er hins vegar fyrsta formlega söngferð Vox feminae til Ítalíu.
Tónleikarnir í Dómkirkjunni á mánudaginn hefjast kl. 20, miðasala er við innganginn og miðaverð er 2.000 krónur.
Eftirfarandi bréf barst frá Jórukórnum að loknu landsmótinu sem þær héldu með miklum glæsibrag á Selfossi 29. apríl - 1. maí:
Kæru landsmótsgestir.
Jórukórinn þakkar ykkur öllum kærlega fyrir síðast og einnig þökkum við allar þær hlýju kveðjur sem við höfum fengið sendar eftir mótið, þær ylja svo sannarlega. Við erum alsælar með hvernig til tókst og einnig stoltar af mótinu í heild sinni. Það var ógleymanleg upplifun fyrir okkur Jórur að sjá margra mánaða vinnu skila sér í þessu landsmóti. Minningin um þessa helgi mun ávallt fylgja okkur.
Það eru í vinnslu hljóðupptökur af tónleikunum og einnig mynddiskur með ýmsu efni frá mótinu. Þessir diskar verða sendir út um leið og þeir eru tilbúnir.
Við þökkum ykkur öllum fyrir að hafa deilt þessum vordögum með okkur hér á Selfossi.
Við förum nú syngjandi sælar út í sumarið og sólina.
Nú er bara að stefna á Akureyri vorið 2014 - Jórukórinn er allavega búinn að bóka á Hótel KEA ;-)
Kærar kveðjur frá Jórukórnum Selfossi.
Vilt þú stjórna kvennakór?
Kvennakórinn Ljósbrá í Rangárvallarsýslu leitar að nýjum kórstjóra til starfa frá og með september 2011.
Í kórnum starfa 35 - 40 konur á öllum aldri og eru æfingar á þriðjudagskvöldum kl. 19:30 - 22:30. Æft er á Laugalandi eða Hellu og Hvolsvelli.
Við leitum að metnaðarfullum og hressum kórstjóra sem hefur hug á að bæta kunnáttu kórmeðlima svo kórinn vaxi og dafni. Við leggjum mikið upp úr góðum anda og að kórstarfið sé lifandi og skemmtilegt en jafnframt krefjandi.
Nánari upplýsingar um starfið má nálgast hjá Olgu formanni í síma 487-5359 eftir kl. 17:00 eða Margréti Hörpu ritara í síma 487-5717. Umsóknir sendist á omargret@simnet.is
