Landssamband íslenskra Kvennakóra

Suðrænn tangó og afríkanskt hljóðfall verða í fyrirrúmi á tvennum tónleikum Léttsveitarinnar í Íslensku óperunni þann 10. apríl næstkomandi. Taktur, töfrar og tilfinning eru orð dagsins og  töfruð verður fram stemmning sem annars má aðeins finna á heitum kvöldum í Buenos Aires og New Orleans eða í dögun á víðlendum Afríku. Trommur, trommur og meiri trommur.... Kristín Jóna Þorsteinsdóttir og Kjartan Guðnason sjá um áslátt. Gunnar Hrafnsson spilar á bassa og Aðalheiður Þorsteinsdóttir á píanóið.

Einsöngvari er Bergþór Pálsson og öllu stjórnar Jóhanna V. Þórhallsdóttir.

Tónleikarnir hefjast kl. 17 og kl. 20.

Miðasala er hjá kórfélögum, á netfangi Léttsveitarinnar og í miðasölu Óperunnar á tónleikadegi.

Jórukórinn hefur haft í mörgu að snúast þennan veturinn vegna Landsmóts kvennakóra, sem verður á Selfossi í lok apríl.  Þar sem Landsmótið er stórviðburður á tónleikavorinu þá eru vortónleikar kórsins fyrr á ferðinni en verið hefur og hafa þær fengið til liðs við sig Kvennakórinn Ljósbrá. Tvennir tónleikar eru fyrirhugaðir, sunnudaginn 3. apríl í Selfosskirkju kl. 20.00 og þriðjudaginn 5. apríl kl. 20.30 í Digraneskirkju í Kópavogi. 
Stjórnandi Kvennakórsins Ljósbrár er Eyrún Jónasdóttir og Jórukórnum stjórnar Helena R. Káradóttir.  Píanóleikarar eru Gróa Hreinsdóttir með Ljósbrám og Þórlaug Bjarnadóttir með Jórum.  Þeir Jóhann Stefánsson og Smári Kristjánsson leika með í nokkrum lögum. 
Efnisskrá kóranna er fjölbreytt og í léttari kantinum, dægurlög í bland við klassík og íslenskar söngperlur.  Kórarnir eru með sitt hvora efnisskrána og sameina einnig krafta sína í nokkrum lögum.  Óhætt er að lofa skemmtilegum tónleikum með þessum frábæru kórum.

Kertaljós, kaffiilmur og konfektmolar fyrir jafnt augu, eyru sem og bragðlauka settu svip sinn á Góugleði Kvennakórs Garðabæjar sem haldin var í Kirkjuhvoli í Garðabæ 3. mars sl. í samstarfi við Menningarmálanefnd Garðabæjar.

Halla Margrét Jóhannesdóttir leikkona brá sér í hlutverk veislustjóra og sló taktinn strax í upphafi með sögum í léttum dúr af mönnum og málefnum. Skemmtileg upprifjun bernskuáranna í Garðabænum hitti beint í mark.

Ingrid Kuhlman, framkvæmdastjóri Þekkingarmiðlunar, minnti okkur öll á hversu mikilvægt jákvætt hugafar er við leik og störf er hún varpaði fram hverri myndrænni frásögninni af annarri í hugvekju sinni.  Valið er okkar, er glasið hálf fullt eða hálf tómt?!

Tónlistin skipaði stóran sess á kvöldinu og af nógu var að taka. Aron Örn Óskarsson nemandi í rafgítarleik við Tónlistarskóla Garðabæjar heillaði gesti með leik sínum. Bæjarlistamaður Garðabæjar 2010, Agnar Már Magnússon,djasspíanóleikari, ásamt bassaleikaranum Þorgrími Jónssyni tóku nokkur lög við góðar undirtekir gesta. Boðið var upp á óvæntan glaðning þegar Sigríður Lárusdóttir, söngnemi við Tónlistarskóla Hafnarfjarðar söng tvö lög við meðleik Sigurðar Marteinssonar, píanóleikara. Sigríður undirbýr sig nú fyrir útskrift  af framhaldsstigi þann 1.apríl n.k. er hún syngur lokatónleika sína.

Kvennakór Garðabæjar hóf og lauk Góugleði á flutningi íslenskra og erlendra kórverka undir stjórn Ingibjargar Guðjónsdóttur við píanóundirleik Sólveigar Önnu Jónsdóttur. Ekki spillti fyrir að í lokalagi kórsins léku þeir Agnar Már og Þorgrímur með kórnum.

Í tilefni af landssöfnunarátaki styrktarfélagsins Lífs, klæddust kórkonur bol félagsins og tóku þannig þátt í að styrkja kvennadeild Landspítalans.

Kórinn þakkar þeim sem komu að vel heppnaðri Góugleði hjartanlega fyrir og  óskar öllum gæfu og gleði við hækkandi sól.

Vortónleikar Vox feminae, Þar skein sól í heiði,  verða haldnir í Grensáskirkju kl. 15 nk. laugardag, þann 26. mars. Listrænn stjórnandi er Margrét J. Pálmadóttir og Vox feminae til fulltingis hljóma gullnar raddir yngismeyja úr Stúlknakór Reykjavíkur, auk fleiri góðra gesta. Undirleik annast Antonia Hevesi.   

Meðan Vetur  konungur þrjóskast við að sleppa tökum sínum á ísaköldu landi leitar hugur kórsystra til Veróna og Feneyja, þangað sem för kórsins er heitið í byrjun sumars og  hyggjast þær nú freista þess að seiða sjálfa Vorgyðjuna að Íslandsströndum. Verkin sem flutt verða á tónleikunum eru jafnt á andlegum sem veraldlegum nótum, þar má heyra blíðlegt ákall til móður Guðs á jörð í verkum þeirra Schuberts, Kaldalóns og Biebl ásamt alþýðlegum sönglögum um ástarbrall á búðarloftum og í Skólavörðuholtinu fyrir margt löngu síðan. Dagskráin höfðar því til allra þeirra sem dreymir um ást og vor og láta hvorki veður né ófærð aftra sér frá því að njóta sín á tónleikum. 
Miðaverð er kr. 1.500 og þeir fást við innganginn. Forsala aðgöngumiða er hjá kórfélögum og í síma 863 4404.