Tónleikar í Þorgeirskirkju

Kvennakór Akureyrar heldur jólatónleika þann 5. desember nk. í Þorgeirskirkju við Ljósavatn í Suður-Þingeyjarsýslu og hefjast þeir kl. 14:00. Með kórnum syngur einsöng Eyrún Unnarsdóttir mezzosópran. Stjórnandi og undirleikari kórsins er Daníel Þorsteinsson.

Á þessum tónleikum er efnisskráin tileinkuð jólunum og aðventunni og meðal annars mun kórinn frumflytja jólalag eftir Jaan Alavere fyrrverandi stjórnanda kórsins sem hann tileinkar kórnum. Einnig fá nokkrar perlur frá Megasi að fylgja með.

Þetta verður því hátíðleg og yndisleg stund í fallegri kirkju.

Miðaverð er 2000 kr. en frítt er fyrir 12 ára og yngri. Ekki verður tekið við greiðslukortum.

Kvennakórinn Heklurnar og Valskórinn halda sameiginlega jólatónleika í Friðrikskapellu við Valsheimilið, sunnudaginn 5. desember kl. 17:00. Stjórnandi Heklanna er Björk Jónsdóttir og stjórnandi Valskórsins er Bára Grímsdóttir. Undirleikari er Jónas Þórir.

Ágætu kvennakórar.

Á aðalfundi Gígjunnar í október sl. var Landsmótið á Selfossi kynnt fyrir fundargestum. Við vorum þar með stutt kynningarmyndband sem við höfum útbúið og einnig vorum við með upplýsingar um vinnuhópana og sameiginlegu lögin sem verða á mótinu. Það hefur dregist hjá okkur að senda þetta út því við þurftum að laga myndbandið aðeins en nú er það tilbúið og hér með fylgir tengill inn á þetta myndband. Upplýsingar um vinnuhópana er kominn inn á landsmótssíðuna hér á vefsetrinu.

http://vimeo.com/16980171

Það lítur út fyrir mjög góða mætingu hingað á Selfoss næsta vor því margir kórar hafa látið vita að þeir ætla að mæta, en okkur langar samt að biðja alla þá sem ætla að koma að senda landsmótsnefnd eftirfarandi upplýsingar:

1)  Hve margar konur mæta líklega frá kórnum.
2)  Hvar kórinn er með gistingu.
3)  Óskir um vinnuhópa, velja 3 vinnuhópa. 

1. val - er sá vinnuhópur sem kórinn vill helst taka þátt í.

2. val - er vinnuhópur sem er í öðru sæti hjá kórnum.

3. val - er vinnuhópur sem er í þriðja sæti hjá kórnum.

Ekki er hægt að lofa því að allir komist í þann vinnuhóp sem er í 1. vali. Einnig er rétt að taka fram að ætlast er til að kórkonur verði búnar að æfa lögin fyrir vinnuhópana. Því er gert ráð fyrir að kórinn fari allur í sama vinnuhóp, nema þegar um er að ræða mjög stóran kór og einnig ef stjórnandi viðkomandi kórs treystir sér til þess að æfa fyrir fleiri en einn vinnuhóp. 

Staðfestingargjaldið er 5.000 kr á konu og er óafturkræft, það þarf að greiða í síðasta lagi 15.janúar 2011.
Reikningsnúmerið er 1169-26-1631 og kt. 631097-3249.

Vinsamlegast sendið upplýsingar á netfangið kolbrunka@gmail.com þegar staðfestingargjaldið er greitt.

Mótsgjaldið er ekki komið á hreint en verður allavega innan við 20.000 kr.

Fljótlega eftir 15.janúar 2011 þegar viðkomandi kór hefur greitt staðfestingargjaldið verða nótur sendar út.

Við hlökkum til að heyra í ykkur
Bestu kveðjur frá Landsmótsnefndinni Selfossi

Kvennakór Suðurnesja og Söngsveitin Víkingar halda sameiginlega aðventutónleika í Hljómahöllinni í Stapa miðvikudaginn 1. desember kl. 20.

Á dagskránni verða jólalög úr ýmsum áttum auk kirkjulegra verka og munu kórarnir syngja í sitthvoru lagi en enda síðan tónleikana með því að syngja nokkur lög saman. Í haust tók hinn kunni söngvari Jóhann Smári Sævarsson við sem stjórnandi Víkinganna en Dagný Þórunn Jónsdóttir sópransöngkona er stjórnandi Kvennakórs Suðurnesja eins og undanfarin ár. Um hljóðfæraleik sjá Geirþrúður Fanney Bogadóttir á píanó, Birna Rúnarsdóttir á þverflautu og Einar Gunnarsson á harmonikku. Þetta verður söngveisla sem kemur öllum í jólaskap í byrjun aðventu.  Miðasala verður við innganginn og er miðaverð kr. 2000.

Kvennakórskonur hafa verið önnum kafnar undanfarið, en auk þess að æfa stíft fyrir tónleikana skelltu þær sér eina helgi í byrjun nóvember á Sólheima í Grímsnesi þar sem þær saumuðu álfabúninga sem notaðir verða á þrettándagleði Reykjanesbæjar, en kórinn tekur þátt í þeirri hátíð á hverju ári.  Um síðustu helgi hittust kórkonur síðan ásamt fjölskyldum síðan og skáru út og steiktu 1500 laufabrauð, en laufabrauðssalan er orðinn fastur liður í fjáröflun kórsins og er laufabrauðið frá kvennakórnum mjög vinsælt.  Þeir sem hafa áhuga á að kaupa laufabrauð geta sent pöntun á netfangið hringlist@hotmail.com eða haft samband við kórkonur.

Eftir áramót fer kórinn síðan að undirbúa sig fyrir landsmót kvennakóra sem haldið verður á Selfossi 29. apríl – 1. maí 2011 auk þess sem kórinn mun að venju halda vortónleika næsta vor.  Liður í þeim undirbúningi eru æfingabúðir í Skálholti en þangað fer kórinn í byrjun febrúar.