Landssamband íslenskra Kvennakóra

Aðventutónleikar Jórukórsins og Karlakórs Selfoss verða haldnir í Hólmaröst á Stokkseyri miðvikudaginn 1. desember kl. 20.30.

Jórukórinn á Selfossi heldur aðventutónleika ásamt Karlakór Selfoss í Hólmaröst á Stokkseyri miðvikudaginn 1. desember kl. 20.30.  Kórarnir munu flytja hvor sína efnisskrá en syngja einnig saman og mynda þá nær 100 manna blandaðan kór.  Stjórnandi Jórukórsins er Helena R. Káradóttir og Þórlaug Bjarnadóttir leikur með þeim á píanó.  Stjórnandi Karlakórs Selfoss er Loftur Erlingsson og hjá þeim sér Jörg Sondermann um píanóleik. 

Miðaverð er kr. 2000 en frítt er fyrir 12 ára og yngri.

Himnanna drotting - aðventutónleikar Kyrjanna í Neskirkju sunnudaginn 28. nóvember.

Aðventutónleikar kvennakórsins Kyrjanna verða að þessu sinni í Neskirkju við Hagatorg fyrsta sunnudag aðventu, 28. nóvember kl. 17. Yfirskrift tónleikanna í ár er Himnanna drottning. Dagskráin er í senn innileg og hátíðleg og fluttar verða ýmsar Maríubænir. Er það von okkar að þessi ljúfa tónlist verði áheyrendum gott veganesti á aðventunni. Einsöngvari á tónleikunum er sópransöngkonan Auður Gunnarsdóttir. Stjórnandi að vanda er Sigurbjörg Hvanndal Magnúsdóttir og píanóleikari Halldóra Aradóttir. Miðasala við innganginn. Miðaverð 1700 kr.

Aðventutónleikar Kvennakórs Reykjavíkur.

Sungið til dýrðar heilagri guðsmóður,
Jesúbarninu og almættinu.

Kvennakór Reykjavíkur býður alla velkomna á aðventutónleika kórsins sem haldnir verða í Neskirkju, fimmtudaginn 25. nóvember kl. 20 og laugardaginn 27. nóvember kl. 17.

Að vanda býður kórinn til fjölbreyttrar tónlistarveislu. Á dagskránni eru hátíðleg verk sem tileinkuð eru heilagri guðsmóður, svo sem Ave María eftir Liszt og Salve Regina eftir Kocsár. Í Gloríu eftir Orbán er sungið almættinu til dýrðar og sungið er um Jesúbarn blítt í undurblíðu ljóði eftir Margréti Jónsdóttur við lag eftir Bach.

Einnig er slegið á léttari strengi í Cool Yule og Santa Baby, og í Various themes on Fa-la-la er jafnvel farið býsna frjálslega með nokkur frægustu tónverk sögunnar.

Ekki er allt upptalið hér að ofan en allir munu finna eitthvað við sitt hæfi, jafnt hátíðleikann sem fjörleg og skemmtileg jólalög.

Stjórnandi kórsins er Ágota Joó, en hún er nú að ljúka fyrsta starfsári sínu með kórnum.

Píanóleikari á tónleikunum er Vilberg Viggósson, Nína Hjördís Þorkelsdóttir leikur á flautu og Jón Björgvinsson á margskonar slagverk.

Miðaverð er kr. 2.500 í forsölu en kr. 3.000 við innganginn, eldri borgarar og börn 6-18 ára, kr 1.500.

Hægt að fá keypta miða hjá kórfélögum eða panta á netfanginu kvkor@mmedia.is eða í síma 896-6468 (eftir kl. 16). 

Jólatónleikar Kvennakórs Hafnarfjarðar og Heru Bjarkar.

 Kvennakór Hafnarfjarðar og Hera Björk halda jólatónleika í Víðistaðakirkju, fimmtudaginn 25. nóvember, kl 20. 

Kórinn hefur fengið til liðs við sig hina landsþekktu söngkonu Heru Björk sem tók þátt í Söngvakeppni evrópskra sjónvarpsstöðva fyrir hönd Íslands síðastliðið vor. Hera Björk stundaði söngnám hjá Ernu Guðmundsdóttur kórstjóra Kvennakórs Hafnarfjarðar, það er því sérstaklega skemmtilegt að hún skuli vera gestur okkar á jólatónleikunum í ár. Efnisskráin er undurfögur að þessu sinni, þar má finna gamlar og nýjar söngperlur eftir íslenska og erlenda höfunda. Má þar m.a. nefna Pie Jesu, Panis angelicus, Ave Maria eftir Eyþór Stefánsson og spænsk jólalög.  Hera Björk mun syngja einsöng við undirleik Antoníu Hevesi og einnig syngur hún lög með kórnum.

Stjórnandi Kvennakórs Hafnarfjarðar er Erna Guðmundsdóttir og undirleikari er Antonía Hevesi.  Miðaverð er 2.000 krónur og eru miðar seldir við innganginn, en einnig er hægt að kaupa miða með því að senda á netfangið kvennakor.hafnarfjardar@gmail.com.