Landssamband íslenskra Kvennakóra

Tónleikar til styrktar Mæðrastyrksnefnd Akureyrar.

Þann 21. nóvember nk. heldur Kvennakór Akureyrar sína árlegu styrktartónleika fyrir Mæðrastyrksnefnd Akureyrar. Að þessu sinni fær kórinn til liðs við sig Æskulýðskór Glerárkirkju undir stjórn Olgu Ásrúnar Stefánsdóttur og undirleikari er Risto Laur.  Kvennakórnum stjórnar að venju Daníel Þorsteinsson sem einnig er undirleikari.

Efnisskráin er fjölbreytt, þar verða íslensk og erlend lög, bæði jólalög og ekki jólalög, þar sem enn verður rúmur mánuður til jóla þegar tónleikarnir eru haldnir. 

Þetta er í 9. sinn sem kórinn heldur tónleika til styrktar Mæðrastyrksnefnd og nú á tímum er ekki síst þörf fyrir allan þann stuðning sem hægt er að veita þeim sem lítið hafa milli handanna þegar jólahátíðin nálgast.

Við viljum því hvetja sem flesta til að mæta í Akureyrarkirkju þennan dag, hlusta á fallega tónlist og styrkja um leið gott málefni.

Tónleikarnir verða í Akureyrarkirkju  21. nóvember kl. 16:00 og miðaverð er 2000 krónur.

Kvennakórinn Ljósbrá ásamt Kyrjukórnum frá Þorlákshöfn og Uppsveitarsystrum halda tónleika í Hvoli, Hvolsvelli, föstudaginn 12. nóvember. 

Hver kór flytur nokkur lög og síðan taka kórarnir lagið saman. Flutt verða létt og leikandi lög við allra hæfi.
Tónleikarnir hefjast kl. 20:30.
Aðgangseyrir kr. 1500.
Frítt fyrir 16 ára og yngri
Ath. ekki posi á staðnum.

Hlökkum til að sjá ykkur           

 
Kóramótið í Menningarhúsinu Hofi á Akureyri þann 23. október þótti takast með eindæmum vel og var það mál margra að gera þyrfti slíkt kóramót að árlegum viðburði.

24 kórar tóku þátt í mótinu og áætlað var að um 700 manns hafi verið að syngja í Hofi þennan dag.  Áhorfendur voru einnig fjölmargir og líklega um 600 þegar allir kórarnir sungu saman í lokin.
Dagskráin fór fram á stóra sviðinu og var salurinn, Hamraborgin, opinn gestum og gangandi meðan á dagskránni stóð.

Á mótinu komu fram 8 kirkjukórar, 3 kórar eldri borgara, 4 aðrir blandaðir kórar, 5 karlakórar og 4 kvennakórar.

Kvennakórarnir sem fram komu eru:

Kvennakórinn Embla, Akureyri

Salka kvennakór, Dalvík

Kvennakór Akureyrar, Akureyri

Iðnu Lísurnar, Húsavík

Kórarnir komu frá starfssvæði Eyþings sem er landshlutasamtök sveitarfélaga á Norðausturlandi frá Fjallabyggð að vestan að Langanesbyggð að austan, en innan Eyþings eru 13 sveitarfélög með liðlega 29.000 íbúa.

Styrktaraðilar voru Menningarráð Eyþings, Rarik og Samband íslenskra karlakóra.

Kvennakór Akureyrar prýðir myndina með þessari frétt.

Kvennakór Kópvogs, í samstarfi við Digraneskirkju, stendur fyrir tónleikum til stuðnings Mæðrastyrksnefnd Kópavogs.  

Kvennakórinn hefur fengið til liðs við sig fjölda frábærra listamanna bæði kóra og einsöngvara en fram koma auk Kvennakórs Kópavogs, Kór Kársnesskóla, Barnakór Álfhólsskóla, félagar úr Skólahljómsveit Kópavogs, Margrét Eir, Regína Ósk, Guðrún Gunnarsdóttir og Kristján Jóhannsson. 

Ræðumaður kvöldsins verður Gunnar Sigurjónsson prestur í Digraneskirkju.   

Allir sem koma fram og þeir sem vinna við skipulagningu og framkvæmd tónleikanna gefa vinnu sína og miðaverð rennur því óskipt til Mæðrastyrksnefndar Kópavogs.

Við hvetjum unga sem aldna til að fjölmenna á tónleikana, njóta góðrar skemmtunar og styrkja gott málefni í leiðinni. 

Tónleikarnir verða haldnir í Digraneskirkju þann 7. nóvember kl. 16:00 og er áætlað að þeim ljúki um kl. 18:00. 

Hægt er að panta miða með því að senda póst á netfangið hondkk@gmail.com. Einnig verður hægt að kaupa miða við innganginn meðan húsrúm leyfir. Aðgangseyrir er 2.000 kr.