Landssamband íslenskra Kvennakóra

Kvennakór Reykjavíkur mun halda vortónleika sína í Lindakirkju sunnudaginn 9. maí kl. 17:00 og kl. 20:00.

Tímamót eru nú hjá kórnum þar sem nýr stjórnandi, Ágota Joó, hefur nú tekið við stjórn kórsins. Þetta eru fyrstu tónleikar hennar með kórnum og má með sanni segja að tónar berist frá öllum heimshornum, því sungið
verður á 7 tungumálum. Efnisskráin er að vanda fjölbreytt, hátíðlegt fyrir hlé og síðan slegið á léttari strengi eftir hlé.

Kórinn mun syngja hugljúf verk eftir eldri meistara svo sem Rossini og Schumann; seiðandi tangó eftir Piazzolla og sveiflutónlist sem er nýrri af nálinni eftir Luis Prima, Aron Copland og John Davenport og nýlegt ungverskt tónverk eftir József Karai, svo nokkuð sé nefnt.

Píanóleikari verður Vignir Þór Stefánsson og með honum leika Vadim Fjodorov á harmóníku, Gunnar Hilmarsson á gítar og Leifur Gunnarsson á kontrabassa.

Miða er hægt að fá hjá kórkonum eða panta í síma 896-6468 (eftir kl. 16), og svo við innganginn.

Sjáumst á tónleikunum 9. maí.

Nú líður að lokum vetrarstarfs Jórukórsins.  Að þessu sinni heldur kórinn tvenna tónleika. Föstudaginn 30. april í Selfosskirkju kl. 20.00 og í Félagsheimilinu Árnesi sunnudaginn 2. maí kl. 16.00.  Í Árnesi verður kaffihúsastemning ráðandi og tónleikagestum boðið upp á kaffi og konfekt.

Helena R. Káradóttir tók aftur við stjórn kórsins s.l. haust, eftir 5 ára hlé og undir stjórn hennar hefur kórstarfið blómstrað í vetur.  Efnisskráin er mjög fjölbreytt og með léttu yfirbragði.  Þar er að finna rómantískar ballöður í bland við sveiflu og lagasyrpuna  Óður til Arethu Franklin.  Tvær glæsilegar útsetningar kórstjórans á vinsælum lögum eftir Selfyssinga verða frumfluttar.  

Undirleik á píanó annast Þórlaug Bjarnadóttir og sérstakur gestasöngvari er Halla Dröfn Jónsdóttir sópran. Eins og oft áður leggja góðir hljóðfæraleikarar kórnum lið en það eru þeir Jóhann Stefánsson á trompet, Smári Kristjánsson á bassa og Gunnar Jónsson á slagverk.

Það verður bara gaman á tónleikum Jórukórsins í ár.  Hlökkum til að sjá ykkur í Selfosskirkju og Árnesi.

Aðgangseyrir er kr. 2000 fyrir 13 ára og eldri.

Fjölbreytt efnisskrá og endurnýjuð kynni við uppáhaldslög kórkvenna
Kvennakór Garðabæjar heldur upp á tíunda starfsár sitt með veglegum afmælistónleikum í Langholtskirkju, sunnudaginn 2. maí kl.16.00.

Stofnandi og jafnframt stjórnandi kórsins, Ingibjörg Guðjónsdóttir sópransöngkona, hefur frá upphafi lagt áherslu á að takast á við og bjóða upp á fjölbreytta söngdagskrá með markvissri og metnaðarfullri þróun í lagavali. 
Nú býðst tónleikagestum að rifja upp tónlistarsögu kórsins og endurnýja kynni við verk sem hrifið hafa jafnt kórkonur sem gesti. Úr miklu efni er að moða eins og gefur að skilja og ógjörningur að gera öllu skil á einum tónleikum. Kórinn er stoltur af endanlegri söngskrá þar sem íslenskum kvenkyns tónskáldum verður gert hátt undir höfði, kirkjuleg verk fá að hljóma auk annarra verka úr ýmsum áttum.

Með kórnum leikur píanóleikari kórsins, Sólveig Anna Jónsdóttir,  auk fimm manna strengjasveitar.
Miðaverð við innganginn er 2.500 kr., fyrir lífeyrisþega 2.000 kr. og 500 kr. fyrir börn 12 ára og yngri.
Forsöluverð er 2.000 kr. en forsala er í höndum kórkvenna.  Einnig er hægt að senda póst á kvennakor@kvennakor.is.

Þann 4. september nk. mun Kvennakór Garðabæjar fagna afmæli sínu með veglegri afmælishátíð í tali og tónum sem auglýst verður síðar.

Íslenski Kvennakórinn í Kaupmannhöfn heldur tvenna tónleika núna í vor.

Þann 29. apríl heldur kórinn sameiginlega tónleika með Stúlknakór Fríhavnskirkjunnar í Frihavnskirken, Willemosesgade 68, 2100 København Ø. Stúlknakórinn er að leggja í tónleikaferð til Íslands. Á tónleikunum verður boðið upp á tvö klassísk verk og þjóðlög.

6. júní verður Íslenski Kvennakórinn í Kaupmannahöfn með vortónleika í bústað sendiherra Íslands, Fuglebakkevej 70, ambassadør bolig, 2000 Frederiksberg.
Þema tónleikanna verður sjómenn. Þar syngur kórinn sjómannaslagara meðal annars Einsi kaldi, Íslands hrafnistumenn, Hafið blá hafið og Hvítir mávar.